Artıq neçə gündür ki, sosial şəbəkələrdə özünü radikal müxalif partiyanın lideri hesab edən şəxsin – yəni Əli Kərimlinin yazdırdıqları söyüş və təhqir dolu statuslar cəmiyyətdə birmənalı şəkildə etiraza səbəb olub.

Təhqir dolu statuslardan birinin müəllifi Ayət İsmayıl adlı şəxs dediyimiz kimi Əli Kərimliyə çox yaxın olan birisidir. Konkret desək, onun icazəsi, göstərişi və şəxsi tapşırığı olmadan nə danışmır, nə də sosial şəbəkədə nəsə yazmır, paylaşmır.

Bu dəfə də Razi Nurullayev və AXCP Etimad Qurultayı Təşkilat Komitəsinə daxil olanlar haqqında bu adamın yazdığı statusun sifarişi birmənalıdır ki, Əli Kərimlidən gəlib. Bu sübuta ehtiyacı olmayan faktdır.

Əli Kərimli öz düşüncələrini sadəcə bu adamın adından paylaşıb. Küçə söyüşləri ilə dolu, heç bir əxlaqa, mədəni davranışa, etikaya sığmayan şərəfsizcəsinə yazılan statusu yazan gənc olsa da, sifarişi verən bəlli olsa da, bu statusu bəyənənlər nisbətən daha təcrübəli sayıla biləcək, siyasi mübarizə qaydalarından az-çox xəbərdar olmalı olan, ən azından söyüşün mübarizə vasitəsi yox, zəiflik və acizlik nümunəsi olduğunu bilməyə yaşları imkan verən adamlar, partiya üzvləridir (bəziləri Milli Şura üzvləridir-müəl.).

AXCP-nin Əli Kərimli qanadında təmsil olunanların Razi Nurullayevin rəhbəri olduğu AXCP Etimad Qurultayı Təşkilat Komitəsinin üzvlərinə qarşı yazılan söyüş və təhqir dolu statusları bəyənən, özlərini siyası fiqur hesab edən və cəmiyyətdən də özlərinə qarşı belə münasibət gözləyən bəzi adamlar və funksionerlər daha sonra etdikləri hərəkətin fərqinə vararaq, bəyəndikləri status haqda məlumatsız olduqlarını deməklə, yaxud sadəcə açıqlama verməkdən yayınmaqla vəziyyətdən çıxış yolu axtarırlar.

Fakt isə faktlığında qalır- tərbiyə və əxlaq sərhədini aşanlara bu yolda “yaşıl işıq” yandırmaq mahiyyətcə bir-birindən o qədər də fərqlənmir. Məsələn, kəskin etirazlara səbəb olan təhqir dolu statusları bəyənənlərdən biri, Milli Şuranın Koordinasiya Mərkəzinin üzvü İbrahim İbrahimli bu haqda məlumatsız olduğunu və “bu mövzularda müsahibə vermirəm” deyərək çıxış yolunu telefonu söndürməkdə gördü.

Statusu bəyənənlər sıyahısında adı olan daha bir nəfər, Azərbaycan Dövlət İqtisad Universitetinin müəllimi, AXCP-nin Əli Kərimli qolunun Rəyasət Heyətinin üzvü Eldar Hüseynov da görəsən əslində nəyin altına “imza” qoyduğunun sonradan fərqində olubmu? Hər halda telefon zənglərinə cavab verməyən Eldar bəy bununla universitet müəllimi kimi tərbiyə sərhədini aşan sözlərlə həmfikir olduğunu, siyasi mübarizəsinin ancaq söyüş və təhqirdən ibarət olduğunu nümayiş etdirmiş oldu. İndi belə bir müəllimin tələbələrinə necə nümunə olacağı sual altındadır. Belə bir “siyasətçi”nin cəmiyyətə faydasından danışmağa dəyməz.

Əslində bu tip adamlar elə cəmiyyətdə də, işlədikləri müəssisələrdə də alaq otlarıdır. Təcrid olunmalı və təmizlənməli. Universitet müəlliminin təkcə bilik vermək yox, həm də sağlam düşüncəli gənclik yetişdirmək kimi bir məsuliyyəti var. Ancaq indiki halda Eldar Hüseynovun bu məsuliyyətin öhdəsindən necə gələcəyi aydındır. Deməli, onun leksikonu tələbələrinə də sirayət edəcək.

Tələbələri də söyüşü, təhqiri həyat kredosu seçəcək, necə ki Eldar Hüseynov seçib. Belə bir şəxsin universitet auditoriyasına buraxılması özü yolverilməzdir.

Ümid edirik ki, universitet rəhbərliyi bununla bağlı ölçü götürəcək. Biz də Cəbhə.info olaraq, məsələni diqqətdə saxlayacaq və onun çalışdığı Azərbaycan Dövlət İqdisad Universitetinin rəhbərliyindən də bu müəllimin hərəkətinə mövqe öyrənməyə çalışacağıq.

Vilayət Muxtar