Əziz Əzizovun idarəçiliyi Komitə sədrinə problemlər yaradılır

Cəlilabad da başqa rayonlar kimi gözdən uzaq bir məkana çevrilib. Rayon sakinləri ilə onca dəqiqə söhbət etmək kifayət edər ki, problemlərdən hali olasan. İşsizlik, kommunal problemlər, rayonda olan hərc-mərclik... sayı-hesabı olmayan, dizəcən problemlər məngənəsində boğulan cəlilabadlıların dadına çatan yoxdur...
Vəziyyət gündən-günə ağırlaşır...
Bizimlə söhbət edən Cəlilabad sakinləri bildirirlər ki, hazırkı məqamda rayonda əksər müəssisələr fəaliyyət göstərmədiyindən, işsizlik problemi yaşayırlar. Sovet dövründə xeyli sayda istehsal sahələrinin olması ilə ad çıxarmış Cəlilabadda isə indi belə sahələrin sayını barmaqla saymaq olar. Hələ SSRİ dağıldıqdan sonra sıradan çıxarılan həmin müəssisələrin yenidən bərpası isə mümkün olmayıb.
Sakinlər deyirlər ki, əsas ümidləri son illər rayonda salınmış kartof və üzüm sahələridir. Onlar deyirlər ki, mövsümi olsa da, əkin sahələrində çalışmaqla güzaranlarını qismən qura bilirlər. Belə ki, günəmuzd fəaliyyət nəticəsində gündəlik 7-8 manat zəhməthaqqı alan cəlilabadlılar əslində, güzaranlarını deyil, gündəlik qarınlarını doyurmaqla kifayətlənməli olurlar. Onlar deyirlər ki, əgər Rusiya və Bakıda işləyən qohum-əqrabaları olmasaydı, rayonda çoxdan aclıq fəlakəti yaşanardı.
Ancaq bir başqa problem də yerli məmurların özbaşınalığı və qeyri-qanuni hərəkətləri ilə bağlıdır. Rayon camaatı deyir ki, ən kiçik dövlət müəssisəsindən tutmuş İcra Hakimiyyətinə qədər görüləcək hər bir iş üçün rüşvət tələb olunur. Cəlilabadlılar deyirlər ki, bəzən adi arayışı almaq üçün onlardan 2-3 manat pul tələb olunur. İlk baxışdan bu rəqəmin elə də böyük olmadığını deyən sakinlər toplam halında aylıq belə haqların böyük rəqəmlərlə ifadə edildiyini vurğulayırlar.

Kəndlər işıqsız qalırlar

Cəlilabadın mərkəzində fasiləsiz elektrik və təbii qaz olsa da, bunu kəndlərinə aid etmək olmaz. Bakı-Astara şossesinin üzərində yerləşən belə bir rayonun, həm də əsas magistral kəmərlərə də öz ərazisindən yer verən rayon hələlik kəndlərinin problemlərini həll edə bilmir. Məsələ belədir ki, dağətəyə və İranla sərhəd kəndlərdə durumun daha da ağırdı.
Zəhmətabad, Həziabad, Komanlı, Bəcrəvan və digər kəndlərin yollar illərdən bəri asfalt örtüyü gözləsə də, hələlik bu arzular reallaşmayıb. Kənd camaatı isə deyir ki, onlar arzularının reallaşacağına ümid də bəsləmirlər. Səbəb kimi isə rayon rəhbərliyinin başının özünə qarışmasını göstərirlər.
Rayonun mərkəzindən Ağdaş kəndinə uzanan yola gəldikdə isə vəziyyət daha dəhşətlidir. Çünki rayonda əhalinin sayına görə və strateji əhəmiyyətinə görə, ən mühüm və iri kəndlərindən biri olan Bəcrəvana doğru uzanan yol illərdən bəri təmirini gözləyir. Halbuki bu kəndlərin birləşdiyi nöqtələrdə bir zamanlar böyük su anbarının inşa edilməsi nəzərdə tutulurdu. Eyni zamanda, Bəcrəvanda Azərbaycanda və İranda məşhur olan pir var. “Pir Həsən” adlanan inam ocağına isə hər il minlərlə insan axın edir.
Təbii ki, elektrikin verilməsində də sıxıntılar yaşayan Cəlilabad kəndləri bu problemlərinin həlli üçün dəfələrlə müvafiq qurumlara müraciət etsə də, hələlik heç bir nəticə əldə etməyib. Cənub bölgəsinə verilən elektrik enerjisinin paylaşdırılması funksiyasını həyata keçirən yarımstansiyanın bu rayonda yerləşməsinə baxmayaraq, Cəlilabadda vaxtaşırı işıqların kəsilməsi adi hala çevrilib.
Rayon əhli deyir ki, SSRİ dağıldıqdan sonra bu cür vəziyyətlərə adət etsələr də, son dövrlər artıq dözə bilmirlər. Onlar deyirlər ki, işıqsız qaldıqlarında əsəbləri korlanır və şikayətlərinə də baxmamaları lap hövsələdən çıxmalarına səbəb olur.

15 min manatlıq direktor

Rayonda təhsilin səviyyəsi də çox aşağıdır. Başqa rayonlarda olduğu kimi, repetitor yanına gedərək təhsil almağa çalışan uşaqların illik davamiyyəti də bərbad haldadır. Hərçənd Cəlilabadın Təhsil Şöbəsi hər yerdə «böyük uğurlar»dan bəhs edir. Lakin bircə dəfə rayonda olub, kənd məktəblərini gəzmək kifayətdir ki, durumun nə yerdə olduğunu asanlıqla görmək mümkün olsun.
Cəlilabadda da orta məktəblərdə tabaşirdən tutmuş, fond puluna qədər şagirdlərdən tələb olunur. Jurnal satışı, müəllimlərin əmək haqqlarından tutulmalar isə öz yerində. Hətta vaxtaşırı hansısa konsert və ya tədbirlər üçün müəllimlərdən zorla alınan vəsaitləri isə sadalamağa dəyməz. Hamısının da tapşırığı birbaşa rayon Təhsil Şöbəsindən gəlir.
Cəlilabadda isə orta məktəb direktoru olmaq elə də çətin məsələ sayılmır. Rayonda dolaşan söz-söhbətlərə görə, direktor olmaq üçün 15 min manat lazımdır.

Hər şey ələ keçirilir

Cəlilabadda yaşanan ən əsas problemlərdən biri də ticarət obyektləri ilə bağlıdır. Vəziyyət belədir ki, rayonun icra başçısı Əziz Əzizov ayrı-ayrı iş adamlarına məxsus olan ticarət obyektlərini “özəlləşdirmək”lə məşğuldur.
Belə ki, icra başçısının rayonda iri ticarət və iaşə obyektlərini öz əlinə keçirdiyi bildirilir. Sakinlərin dediyinə görə, Əzizovun yaxın adamları iş adamlarından əvvəlcə icra başçısının adından müəyyən məbləğdə rüşvət istəyirlər. Əgər bu məbləğ icraya çatdırılarsa, həmin iş adamı rahat öz biznesi ilə məşğul ola bilər. Əks halda obyekt ya bağlanacaq, ya da sahibkarın əlindən alınacaq.
Bəzi hallarda sahibkarın iştirakı ilə məcburi şəkildə obyekt satışa çıxarılır və başçının öz adamları tərəfindən maya dəyərindən aşağı qiymətə alınır. Bu obyektlərdən bir neçəsi barədə məlumat verən rayon sakini deyir ki, Cəlilabadın mərkəzində yerləşən “Tut bağı” restoranı və çörək sexi bu yolla icra başçısının adamlarının əlinə keçib.
Hazırda rayonda “İran Bazarı” adıyla tanınan bazar uğrunda da çəkişmələrin getdiyi bildirilir. Bazarın yaxın günlərdə tam icra başçısının yaxın qohumlarının əlinə keçəcəyi istisna edilmir.
Mənbə onu da bildirir ki, Əziz Əzizovun yaxın adamları çox vaxt isə heç bir təklif etmədən istənilən obyekti sahibkardan alaraq öz mülkiyyətinə çevirirlər. Onun sözlərinə görə Cəlilabadda yerləşən ən böyük ticarət obyektləri bu gün icra başçısı və onun yaxın ətrafına məxsusdur. Onlar bildirilir ki, şikayət etmək istəyən şəxslərə müxtəlif yollarla təzyiqlər edilir.

Komitə sədrinin adamları “at oynadır”

Qeyd edək ki, hər bir rayonun hakimiyyət tərəfindən təyin olunmuş kuratoru var. Məsələn, Quba hadisələrindən sonra açıq şəkildə bəlli oldu ki, bu rayonun kuratoru nəqliyyat naziri Ziya Məmmədovdur. Cəlilabadda isə həmin funksiyanı Əmlak Komitəsinin sədri Kərəm Həsənov icra edir. Əslən, bu rayondan olan Həsənovdan əvvəl isə sabiq iqtisadi inkişaf naziri, hazırda həbsdə olan Fərhad Əliyev kuratorluq missiyasını həyata keçirirdi.
Ancaq Kərəm Həsənov Fərhad Əliyevdən fərqli olaraq, rayonda gözə kül üfürmək üçün olsa da iş görmür. Bu azmış kimi, onun qohumları da özbaşınalıqla məşğuldurlar. Kərəm Həsənovun qardaşı Malik Həsənovun rayonun deputatı olması isə qohum-əqrəbanın əl-qolunu bir qədər də açıb.
Rayonda olduğumuz müddətdə maraqlı bir hadisəyə də şahidlik etdik. Bakı-Astara trasının 40 km-ə yaxın hissəsi Cəlilabadın ərazisindən keçir. Ancaq bu yolun cəmi bir və ya iki kilometri rayon mərkəzinin içindən keçir ki, oranı da Heydər Əliyev prospekti ediblər. “İran Bazarı” deyilən ticarət məkanının giriş hissəsini əhatə edən yolun həmin girişi hər gün sürücülərə cəhənnəmi yaşadır. İri tıxacların yaranması, maşınların hərəkətsizliyi, yolun kənarına bir neçə sıra avtomobillərin yığılması nəticədə hərəkəti keçilməz edir.

Vüsal Hüseynli