Təəssüf hissi doğuran hal odur ki, icra hakimiyyəti rəsmləri problemin əmələ gəlməsinə səbəb olan şəxsi tənbeh etmək, yaxud da müvafiq addımlar atmaq əvəzinə, redaksiyamıza başaldadıcı cavab məktubu ünvanlamağı üstün tuturlar

“Gündəm Xəbər”in ötən saylarının birində, Göygölün Hacıməlik kəndində yaşanan olaylardan bəhs etmişdik. Yazıb bildirmişdik ki, həmin kənddə Polad adlı şəxsə məxsus olduğu bildirilən kafenin fəaliyyət göstərməsi, əslində yaşanan faciələrimizdən biridir. Çünki, Hacıməlik kənd sakinlərindən bəziləri redaksiyamıza zəng vuraraq bildiriblər ki, “bu kafe bizim üzqaralığımızdır. Hər gün axşam saatlarında, təqribən saat 21-dən sonra kafedə elə bir vurhavur başlayır ki, gəl görəsən. Yəni, həmin kafedə yaş həddindən asılı olmayaraq ora gələn, yaxud da gətirilən qadınlar cinsi istismara məruz qalırlar. Buna səbəb, kafeyə sahiblik edən şəxs tərəfindən, kafenin arxa hissəsindəki otaqlarda yaradılmış şəraitin varlığıdır” deyirlər.

Kənd sakinləri onu da vurğulayırlar ki, “həmin kafe milli-mənəvi əxlaqımızın tapdaqlar altına atıldığı, adət-ənənələrimizin unudulduğu, minbir xəstəliyin tüğyan etdiyi, yaş həddindən asılı olmayaraq ora gələn, yaxud da gətirilən qadınların cinsi istismara məruz qaldıqları bir ünvandır. Biz sadə kənd sakinləriyik, istəməzdik ki, bizim kənddəki fafe belə bir yöndə fəaliyyət göstərsin. Çünki, oğul böyüdürük, qız tərbiyyə edirik. İstənilən halda həmin kafenin kafe kimi deyil, əxlaqsızlıq ünvanı olaraq fəaliyyət göstərməsi, övladlarımızın tərbiyyəsinə dolayı yolla olsa da, pis təsir edir”.

Bəli, bütün bunlar sadə kənd sakinlərinin redaksiyamıza bildirdikləri iradlar, kafenin fəaliyyətinin dayandırılmasına köməklik göstərilməsi üçün etdikləri çağrışlar idi. Biz isə, bir redaksiya olaraq qəzetimizin ötən saylarında problemlərin varlığını aradan qaldırmaq üçün, aidiyyəti qurumlara, o cümlədən Göygöl rayon İcra Hakimiyyəti Aparatına da məktub ünvanlamışdıq. Təəssüf hissi doğuran hal odur ki, icra hakimiyyəti rəsmləri problemin əmələ gəlməsinə səbəb olan şəxsi tənbeh etmək, lazımi tədbirlər görmək əvəzinə, redaksiyamıza başaldadıcı cavab məktubu ünvanlamağa qərar verirlər. Yəni, Göygöl rayon İcra Hakimiyyəti başçısının birinci müavini vəzifəsini daşıyan T.H.Əliyevin imzaladığı cavab məktubunda bildirilir ki, “həmin yeməkxanaya aidiyyəti şəxslərin iştirakı ilə 14.09.2015-ci il tarixdə saat 13:45-də baxış keçirildi və qəzetdə qeyd olunan faktlar öz təsdiqini tapmadı”. Çox maraqlı və təəssüf doğuran cavab deyilmi? O, halda sual oluna bilər ki, axı həmin kafenin fəaliyyəti, yaşanan problemlərin varlığı axşam saat 21 radələrindən sonra başladığı halda, səbəb nə olub ki, qeyd olunan ünvana gündüz saatlarında baxış keçirilib? Deməli,.....

Diqqəti bir məqama da yönəltmək istəyirik ki, hələ ölkə rəhbərinin 06 fevral 2009-cu il tarixli 133 saylı sərəncamı ilə, “İnsan Alverinə Qarşı Mübarizə üzrə Milli Fəaliyyət Planı” (2009-2013-cü illər) ilə əlaqədar Prezident Administrasiyasına, aparılan mübarizənin nəticəsi ilə bağlı geniş hesabat təqdim olunmuşdur. Və 2014-2018-ci illəri əhatə edən, yəni qadınların cinsi istismarı və cinsi istismarına şəraitin yaradılmasının qarşısının alınması istiqamətində, yeni “Milli Fəaliyyət Planı” da imzalanmışdır. Qəbul olunmuş “Milli Fəaliyyət Planı”nda insan alverinin səbəbləri, ona şəraitin yaradılması, hallarının müəyyən edilməsi və aradan qaldırılması, insan alveri qurbanlarının hüquqlarının bərpası və sosial reablitasiyasının həyata keçirilməsi nəzərdə tutulur. Bütün bunlar qəbul olunmuş sənəddə öz əksini tapsa da, nədənsə Polad adlı şəxsə məxsus olduğu bildirilən kafedə və yerli hüquq-mühafizə orqanı əməkdaşlarının, digər vəzifə sahiblərinin əməllərində, irəli sürülən tələblərə əməl olunmadığı açıq-aydın görünür. Bu belə olduğu halda səbəb nədir ki, ortada müvafiq sərəncam və qəbul olunmuş prinsiplər olsa da, Polad adlı şəxs nə sərəncamı sayır, nə də ki, prinsipləri qəbul edir. Axı, hər kəs qanuna, onun aliliyinə hörmət etməli, necə deyərlər şərəfli vətəndaş borcunu yerinə yetirməlidir. Görəsən sahiblik etdiyi kafedə qadınların cinsi istismarına şərait yaratmaqla, vergidən yayınmaqla, gigiyenik qaydalara əməl etməməklə, işçilərlə əmək müqaviləsi bağlamamaqla, daha çox isə milli-mənəvi əxlaqımızı tapdaq altına atmaqla, Polad adlı şəxsin yerinə yetirdiyi “şərəfli vətəndaş” borcu budurmu? Bax, bu haqda düşünmək, belə bir olaylar haqda götür-qoy etmək lazımdır ki, onun qol qoyduğu əməllərdən xəbər tutmaq mümkün olsun.

Növbəti açıqlamamızda, Polad adlı şəxsin başqa-başqa əməllərindən, hansı ki, bu günədək ictimaiyyətə bəlli olmayan qaranlıq məqamlarından bəhs etməyə çalışacağıq

Araşdırmamız davam edir, bizi izləməyi unutmayın.

Mirzə

gundemxeber.az