Terrorda ittiham olunanların vəkilləri hakimləri “topa tutdu”

Qəsdən adam öldürmə, terrorçuluq, oğurluq və digər ağır cinayətlərdə ittiham olunan Qusar rayon sakinləri Radif Ağamuradov, Cavid Məhərrəmov, Murad İsayev, Elxan İsrafilov, Elman Musayev, Bağır Azayev, Şamil Manafov, Tərlan Salmanov, Osman Mustafayevun apelyasiya şikayəti üzrə məhkəmə prosesi başa çatıb.

İttihama görə, Radif Ağamuradov Qusar şəhərində islam dininin “əhli sünnə və əl-cəmaə” adlandırılan vəhhabilik təriqətinə aid dini baxışları ilə əlaqədar yaxın münasibətdə olduğu “Ömər” ləqəbli Faiq Şahmuradov, “Abu Hənifə” ləqəbli Ramiz Rəhimxanov, “Seyfullah” ləqəbli Edik Rüstəmov, Cavad Məhərov, Şamil Manafov, Tərlan Salmanov, Şamil Qadaşov, Osman Mustafayev və qeyriləri ilə birləşdiyi mütəşəkkil dəstədə islam dininin bəzi müddəalarını qəsdən yanlış ifadə verərək valyuta-dəyişmə və digər biznes sahələrində əldə edilən gəlirlərin guya haram olduğunu iddia etməklə, belə fəaliyyətlə məşğul olan ayrı-ayrı şəxslərə basqın edib, külli miqdarda əmlakı ələ keçirmək qərarına gəliblər.

Bu məqsədlə 2013-cü ilin yanvar-fevral aylarında Rusiya Federasiyasının Dağıstan respublikasında istintaqa məlum olmayan mənbədən, qanunsuz silah-sursat əldə edib və Yalama gömrük sərhədindən qatarla gizli keçirərək Qusar şəhərinə gətiriblər. Dəstə üzvləri oktyabrın 19-dək Radif Ağamuradovun və Faiq Şahmuradovun yaşadığı evlərdə “AKSU” tipli avtomatı, “Makarov” və “Naqan” markalı tapançaları, 3 ədəd “Vzor” markalı tapançaları, 162 ədəd müxtəlif çaplı patronları, “F-1” və “RQD-5” tipli 3 ədəd əl qumbaraları və 2 ədəd soyuq silahı saxlayıblar.

Faiq Şahmuradovun tərtib etdiyi plana əsasən Edik Rüstəmov oktyabrın 16-ı səhər saat 7 radələrində Məlikov küçəsi, 69 saylı evin yaxınlığında, valyuta-dəyişmə məntəqəsində işləyən Sadir Mustafayevə hücum edib və

dəmir parçası ilə baş nahiyəsinə zərbələr vuraraq, üzərində olan 6000 manat məbləğində pulu ələ keçirərək Faiq Şahmuradova verib.

Həmin gün Edik Rüstəmov Qusar Rayon Polis Şöbəsinin əməkdaşları tərəfindən müəyyən edilərək, saxlanılıb. Araşdırma aparılarkən Edik Rüstəmov qarət edilmiş pulları meşədə gizlətdiyini bildirib və polis əməkdaşlarını aldadıb. Oimkan taparaq Faiq Şahmuradovla mobil telefon vasitəsi ilə əlaqə saxlayaraq, polis işçilərinə silahlı basqın edilib, onların öldürülməsini razılaşdırıb.

Rayonun Həzrə və Aşağı Ləyər kəndləri arasındakı meşə massivində əvvəlcədən düzəltdikləri mağara tipli sığınacaqdan Faiq Şahmuradov, Radif Ağamuradov, Cavid Məhərov və Ramiz Rəhimxanov tapançalardan çoxsaylı atəşlər açmaqla polis əməkdaşı Qalib Quliyevi qətlə yetiriblər, digər üç polis əməkdaşını yaralayıblar. Atışma zamanı polis əməkdaşı Ceyhun Osmanovun öz xidməti silahından açdığı cavab atəşləri nəticəsində Edik Rüstəmov xəsarət alıb.

19-23 sentyabr tarixində Daxili İşlər Nazirliyi və Daxili Qoşunların xüsusi təyinatlı qüvvələrinə Faiq Şahmuradov və Ramiz Rəhimxanov meşə massivində silahlı müqavimət göstərərkən hər ikisi zərərsizləşdirilib, Edik Rüstəmov Qusar şəhəri, K.Kərimov küçəsinəki 21 saylı sahibsiz evin həyətində təslim olmaq tələbinə tabe olmayaraq, polislərə qumbara atıb, müqavimət göstərərkən öldürülüb, Cavad Məhərrəmov isə tutulub.

İstintaqın gedişatında məlum olub ki, Cavad Məhərov, Şamil Manafov, Şamil Qadaşov və qeyriləri Faiq Şahmuradovun göstərişi ilə 2013-cü il avqustun 13-də maskalardan istifadə etməklə Qabil Həbibovun yaşadığı Qusar şəhəri, Q.Əliyev küçəsi, 43 saylı evin həyətinə qanunsuz daxil olmaqla axtarış aparıblar, “Hyundai” markalı avtomobilin salonundan 720 manat pul oğurlayıblar.

Dəstə üzvlərinə 103 il cəza

Bundan başqa, Faiq Şahmuradovun göstərişləri əsasında “Qayıbulaq” istirahət mərkəzinin direktoru Şövkət Abdurahmanovu onların dini təriqətinə mənsub şəxslərin baxışlarını bölüşmədiyinə görə cəzalandırmaq məqsədi ilə Cavid Məhərrəmov və Şamil adaşovla birlikdə sentyabrın 4-də, saat 21 radələrində zərərçəkənin yaşadığı N.Həbibov küçəsindəki 26 saylı evi qarət ediblər, ümumilikdə 6100 manat məbləğində qızıl-zinət əşyalarını talayaraq, onları ayın 8-də Dağıstanın Dərbənd şəhərində satıb, əldə edilən pulları bandanın üzvləri arasında bölüşdürüblər.

Murad İsayev bandanın üzvü Elxan İsrafilov və yetkinlik yaşına çatmayan, “Xəttab” dini ləqəbli 1998-ci il təvəllüdlü Bağır Azayevlə birlikdə dekabrın 26-da, gecə saat 2 radələrində Qusar şəhərinin N.Şərifov, 21 ünvanda yerləşən “Avtohissələr” mağazasının qapısını sındıraraq, içəri daxil olublar və piştaxtanın saxlanc yerindən Təsvir Camalova məxsus 3000 manat pulu oğurlayıblar.

Qeyd edək ki, Murad İsayev dekabrın 31-də tutularkən onun yaşadığı evdə 48 qram çəkidə marixuana aşkar edilib. İstintaq vaxtı azyaşlı Bağır Azayevin dini vəzifələrin yerinə yetirilməsi ilə əlaqədar öldükdə, cənnətə gedəcəyi vədi ilə aldadıb mütəşəkkil dəstədə cinayətkar fəaliyyətə cəlb edilməsi məlum olub.

Bu il mayın 18-də Bakı Ağır Cinayətlər Məhkəməsinin hökmü ilə Radif Ağamuradov və daha beş nəfər 14, bir nəfər 13, bir nəfər 12, bir nəfər isə 9 il müddətinə azadlıqdan məhrum olunublar. Hökmdən narazı qalan təqsirləndirilən şəxslər apelyasiya şikayəti verərək işlərinə yenidən baxılmasını istəyiblər. Onların şikayəti araşdırılması üçün Sumqayıt Apelyasiya Məhkəməsinə göndərilib. Dəstə üzvlərinin şikayəti hakim Mübariz Zeynalovun sədrlik etdiyi kollegiyada araşdırılıb.

“Polisi öldürmək üçün bomba hazırlanmasından xəbəri olmayıb”

Proses keçirilən zaman dəstənin üzvləri – Şamil Manafov, Tərlan Salmanov, Osman Mustafayev və Radif Ağamuradov apelyasiya

şikayətlərinə baxılmasından imtina ediblər. Buna görə də onların barəsində olan hökm üzrə verilən apelyasiya şikayətinə baxılmayıb. Digər təqsirləndirilən şəxsləribn apelyasiya şikayəti üzrə araşdırma aparılıb.

Elmar Musayev elan olunmuş ittihamda özünü təqsirli bilməyib. O, bildirib ki, 2013-cü ildə Azərbaycan Dövlət Tibb Universitetini bitirib, islam dininin “əhli sünnə və əl cəmaə” adlanan təriqətinə etiqad edir, namaz qılaraq oruc tutub: “Faiq Şahmuradov, Ramiz Rəhimxanov və Edik Rüstəmovu tanımıram, onların nə işlə məşqul olduqlarını bilməmişəm. Həmçinin mənimlə birlikdə təqsirləndirilən şəxs qismində cəlb edilmiş şəxsləri də tanımamışam, Faiq, Ramiz və Edikin polis əməkdaşlarına qarşı silahlı basqın etdiklərindən xəbərim olmayıb. 17 oktyabr 2013-cü il tarixdə Rusiyaya getmişəm və oktyabrın 26-da Qusara qayıtmışam. Yaşadığım mənzildən aşkar edilən 1 ədəd F-1 tipli əl qumbarası və alışdırıcı mənə aid deyil. Polis əməkdaşı Firudin Kərimovu tanımıram və onu öldürmək üçün bomba hazırlanmasından xəbəri olmayıb. Heç bir cinayətin törədilməsində iştirak etməmişəm”.

“Faiq Şahmuradovun qrupunun üzvü olmamışam”

Digər təqsirləndirilən Cavad Məhərrəmov elan olunmuş ittihamda özünü qismən təqsirli bilib. O, bildirib ki, Radif Ağamuradovu uşaq vaxtlarından tanıyıb, Edik Rüstəmov, Faiq Şahmuradov və Ramiz Rəhimxanovun barəsində eşitməyib, onları qiyabi tanıyıb: “Digər təqsirləndirilən şəxsləri isə tutulduqdan sonra tanımışam. Özümü ölüm və quldurluq cinayətlərində təqsirli bilmirəm. Bir dəfə Radiflə çayxanaya gedərkən orada Faiq Şahmuradov və Ramiz Rəhimxanovu görmüşəm. Onlar Edik Rüstəmov barəsində danışıb və Sadiri soyduğunu deyiblər. Faiqgilin Radifə pul verməsini görməmişəm, onlarla dini söhbətlər etməmişəm və Suriyaya gedəcəklərini, həmçinin cinayət törədəcəklərini bilməmişəm. Qabil Həbibovun avtomobilindən oğurluq etməmişəm. Bu barədə yalnız istintaq zamanı bilmişəm. Fərrux Sərdarov Dağıstan Respublikasından çantanın içərisində gətirdiyi avtomat, tapança və iki ədəd qumbaranı saxlamaq üçün

mənə verib. Qorxduğum üçün həmin içərisində silah olan çantanı Radif Ağamuradova vermişəm və Fərrux Sərdarovun götürəcəyini demişəm. Fərrux Sərdarov Qusar rayonunda yaşadığım vaxtlarda mənimlə qəsəbə sakini kimi münasibəti olub”.

Təqsirləndirilən şəxsin sözlərinə görə, 2013-cü ildən Dağıstanda bir neçə dəfə olsa da, oradan silah gətirməyib: “Dağıstana getməkdə məqsədim orada atamın birinci arvadından olan qardaşım ilə görüşmək və apardığım malları satmaq olub. Dağıstana maşınla, qatarla, bəzən isə piyada getmişəm. Faiq Şahmuradovun qrup yaratdığını bilməmişəm və həmin qrupun üzvü olmamışam”.

“Cavid Məhərrəmov mütəşəkkil dəstənin üzvü olmayıb”

Prosesdə çıxış edən dövlət ittihamçısı Teymur Əsədov təqsirləndirilən şəxslərin apelyasiya şikayətlərinin əsassız olduğunu bildirib. O, apelyasiya şikayətlərinin təmin edilməməsini və Bakı Ağır Cinayətlər Məhkəməsinin hökmünün qüvvədə saxlanılmasını istəyib.

Daha sonra Cavid Məhərrəmovun vəkili Bilal Bağırov bildirib ki, hüquqlarını müdafiə etdiyi Cavid Məhərrəmovun əməli Cinayət Məcəlləsinin 228.3 və 228.4-cü maddələrdən 228.1-ci maddəyə tövsif olunmalı, məhkum olunduğu digər maddələr ilə isə barəsində bəraət hökmü çıxarılmalıdır: “Cavid Məhərrəmov mütəşəkkil dəstənin üzvü olmayıb, ona həmin cinayətkar dəstənin fəaliyyətində hansı vəzifənin tapşırılması sübut olunmayıb. Cavad Məhərovun özgəsinin əmlakını ələ keçirmək üçün kimlərəsə hücüm etməyib, hədə qorxu gəlməyib”.

Elmar Musayevin vəkili Radiq Əhmədov qeyd edib ki, müdafiə etdiyi şəxsin təqsiri sübuta yetirilməyib. Onun sözlərinə görə, Elmar Musayevin törədilən əməllərə heç bir aidiyyatı olmayıb: “Bakı Ağır Cinayətlər Məhkəməsi Elmar Musayevin təqsirliliyini və təqsirsizliyini müəyyən edən sübutlara düzgün, obyektiv yanaşmayıb. Belə ki, məhkəmədə ifadələrə alınmış təqsirləndirilən şəxslərin hər biri Elmar Musayevi tanımadıqlarını,

ya da ancaq rayon sakini kimi tanıdıqlarını, onun heç bir cinayətdə iştirak etmədiyini göstəriblər. Təqsirləndirilən şəxs Elxan İsrafilov isə istintaq zamanı Elmar Musayevin polis əməkdaşının qətlə yetirilməsi barədə cinayətə hazırlıq hərəkətlərində iştirakına dair verdiyi ifadələri təkzib edib və həmin ifadələri təzyiq altında verdiyini göstərib. Elmar Musayevin evində əl qumbarası olmayıb, tərtib olunmuş saxta protokol əsasında qumbaranın ona məxsus olduğu qənaəti yaradılaraq, onun cinayət hadisəsi ilə bağlılığı sübuta yetirilmək istənib. Birinci instansiya məhkəməsi Elmar Musayevə qarşı irəli sürülmüş ittihamları heç bir araşdırma aparmadan təsdiq edib. Hökmdən Cinayət Məcəlləsinin 28.214.2.1, 28.214.2.3 və 217.2-ci maddələrin xaric edilməsi, Cinayət Məcəlləsinin 228.3-cü maddəsi ilə bəraət hökmü çıxarılması xahiş edirəm”.

Tərəfləri dinləyən hakim heyəti sonda qərar elan edib. Qərara görə, təqsirləndirilən şəxslərin apelyasiya şikayətləri təmin edilməyib və Bakı Ağır Cinayətlər Məhkəməsinin hökmü qüvvədə saxlanılıb.

**

Ali Məhkəmə rüşvətxor hakimə rədd cavabı verdi

Həsən Əliyevin kasasiya şikayəti təmin edilmədi

Ali Məhkəmədə Dələduzluq və rüşvətxorluqda təqsirləndirilən keçmiş hakim Həsən Əliyevin kasasiya şikayətinə baxılıb. Hakim Əli Seyfəliyevin sədrliyi ilə keçirilən prosesdə Həsən Əliyevin Bakı Apelyasiya Məhkəməsinin qərarından verdiyi kasasiya şikayəti təmin edilməyib.

Qeyd edək ki, Gəncə Ağır Cinayətlər Məhkəməsinin hökmü ilə Elman Məmmədov 8 il, Taleh Süleymanov 7 il müddətinə azadlıqdan məhrum edilib. Məhkəmə azadlıqda olan Həsən Əliyevin barəsində isə 7 il müddətinə azadlıqdan məhrumetmə cəzası təyin edib. O, məhkəmə zalında həbsə alınıb.

Həmçinin Ramazan Səlimovun Həsən Əliyevə qarşı qaldırdığı mülki iddia təmin edilib və Həsən Əliyev iş üzrə mülki cavabdeh kimi tanınıb. Hökmdən narazı qalan təqsirləndirilən şəxslər apelyasiya şikayəti verərək barələrində bəraət hökmünün çıxarılmasını istəyiblər. Həmçinin zərərçəkmiş Ramazan Səlimovun müdafiəçisi Iradə Cavadova da apelyasiya şikayəti verib. O, dəymiş ziyana görə təqsirləndirilən şəxslərdən əlavə maddi təzminat istəyib.

Bakı Apelyasiya Məhkəməsində, hakim Rizvan Səfərovun sədrliyi ilə keçirilən prosesdə Həsən Əliyev və digər şəxslər Elman Məmmədov, Taleh Süleymanovun apelyasiya şikayətinə Gəncə Apelyasiya Məhkəməsində baxılması barədə qərardad qəbul edilib.

İyunun 16-da Gəncə Apelyasiya Məhkəməsində, hakim Elçin Xasməmmədovun sədrliyi ilə keçirilən prosesdə Həsən Əliyevin vəkillərinin kasasiya şikayəti verdikləri məlum olub. Həsən Əliyevin müdafiəçiləri apelyasiya şikayətlərinə Bakı Apelyasiya Məhkəməsində baxılmasını istəyir.

İttiham aktına görə, Rusiyadan gələn iş adamı Ramazan Səlimov Azərbaycanda işə düzəlmək üçün 2011-ci ildən tanışı Elman Məmmədova müraciət edib. Elman Məmmədov isə onu Bakı Ağır Cinayətlər Məhkəməsinin hakimi Həsən Əliyevlə tanış edib. Həsən Əliyev Ramazan Səlimovdan işə düzəltmək adı ilə 600 min manat pul alıb. Lakin sonradan nə iş düzəlib, nə də pul geri qaytarılıb.

Bundan sonra Ramazan Səlimov polisə şikayət edib. Sikayət əsasında cinayət işi başlanıb və Elman Məmmədov həbs olunub.

gundemxeber.az