Jurnalist Aqil Xəlil 28 min avronu nəyə xərcləyəcəyini açıqladı
Jurnalist Aqil Xəlil Avropa Məhkəməsində onun işi üzrə qəbul etdiyi qərarı şərh edib. Jurnalist sosial şəbəkədəki statusunda öncə bu məsələdə onu dəstəklətənlərə təşəkkür edib: “Hər zaman yanımda olan xanımıma, ta ilk gündən əziyyətimi çəkən vəkillərim Rəşid Hacılıya, Elçin Sadıqova və ümumilikdə Media Insistutunda çalışan hər kəsə, azad mediada çalışanlara və dəstək olanlara təşəkkürümü bildirirəm. Onlar işi bu yerə gətirdilər və mənim kimi öz həyatlarını riskə atdılar”.

A.Xəlil yazıb ki, sona qədər mübarizəsini aparıb və bundan sonra da aparacaq. Mühacir jurnalistin yazdığna görə, haqlarını pozan, həyatını alt-üst edən bu siyasi rejimi bağışlamayacaq: “Buna əmin ola bilərsiniz. Milyonlar ödəsələr belə, mənim o vaxtlar nələr çəkdiyimi bu pullarla “yuya” bilməzlər! Bunu yalnız açı çəkənlər bilər”.

Jurnalist Avropa Məhkəməsinin çıxardığı qərarla Azərbaycan hökumətinin ona ödəməli olduğu 28 min avro məbləğində cəriməni nəyə xərcləyəcəyinə də toxunub: “Pulun məlum olan hissəsini vəkillərə, qalan əsas hissəsinin bir qismini Azərbaycanda azad jurnalistikaya, xüsusilə “Azadlıq” qəzetinə, bir hissəsini həbsdə olan həmkarlarıma, xüsusilə Xədicə İsmayıl, Seymur Həzi və digərlərinin səhhəti və qida ləvazimatlarına olan ehtiyaca, eləcə də siyasi duqtaqlara, başqa Leyla və Arif Yunus, Tofiq Yaqublu, Rəşadət Axundov ailəsinə və digərlərinə, qalan hissəsini isə vaxtilə mənə və həyyatını riskə atan jurnalistlərə hərtərəfli dəstək olan, mərkəzi ofisi Parisdə yerləşən Sərhədsiz Reportyorlar Təşkilatına ayırmağa qərar aldım”.

Musavat.com xatırladır ki, Avropa Məhkəməsi jurnalist Aqil Xəlilin işi üzrə qərar qəbul edib. Qərara əsasən Azərbaycan hökuməti jurnalistə 28 min avro təzminat ödəməlidir.
Azərbaycan hökuməti Aqil Xəlilə qarşı bütün hüquq pozuntularını etiraf edib, bunlarla bağlı araşdırma aparacağını və 28 min manat kompensasiya ödəniləcəyini vəd eləyib.

Qeyd edək ki, Azərbaycan hökuməti proses vaxtı Aqil Xəlilin işi ilə bağlı məhkəmənin 15 sualını cavablandırıb.

Hökuməti tənqid edən yazıları ilə tanınan Aqil Xəlil 2008-ci ilin fevralında Bakıdakı Zeytun bağlarında ağacların kəsilməsini lentə alarkənMilli Təhlükəsizlik Nazirliyinin yüksək rütbəli işçiləri tərəfindən hücuma məruz qalıb.

Nəticədə jurnalist döyülüb, üz, əl, sinə, baş nahiyəsindən xəsarətlər alıb və barmağı sındırılıb.

Bundan başqa, jurnalist dəfələrlə hədələnib və ölkədən çıxmasına qanunsuz əngəllər yaradılıb.

Aqil Xəlilin hüquqlarını Media Hüququ İnstitutunun vəkilləri Rəşid Hacılı və Elçin Sadıqov müdafiə edirlər. Vəkillərin AİHM-ə şikayətlərində qeyd olunur ki, ölkə məhkəmələri jurnalistin şikayətləri üzrə qərarlar verərkən onun Avropa Konvensiyasında təsbit olunmuş yaşamaq, işgəncələrin qadağan olunması, azadlıq və toxunulmazlıq, ədalətli məhkəmə araşdırması, şəxsi həyata hörmət , ifadə azadlığı, səmərəli hüquqi müdafiə vasitələri vəhərəkət etmək azadlığı hüquqlarını pozublar.

“Azadlıq” qəzetinin keçmiş əməkdaşı Aqil Xəlil hazırda Fransada mühacirətdə yaşayır.

Sevinc TELMANQIZI