İş adamının icra başçısına qarşı qaldırdığı iddia məhkəmə tərəfindən niyə təmin edilməyib?

Eldar Əzizov Sumqayıt İcra başçısı postuna gətiriləndən sonra bır çox obyektlərin vətəndaşların əlindən alınmasına, sökülməsinə səbə olmuşdu. Artıq bununla bağlı bir neçə məhkəmə iddiaları da ortaya çıxıb. Eldar Əzizov vəzifəsindən kənarlaşdırıldırılsa da, bununla bağlı məhkəmə prosesləri davam edir. Cavabdeh isə Sumqayıt İcra Hakimiyyəti göstərilir.

Sumqayıt şəhər sakini Yusif Quliyev Sumqayıt şəhər İcra Hakimiyyətinə qarşı iddia qaldıraraq, 2 sentyabr 2002-ci il tarixli, 218 nömrəli sərəncamla “Heydər Parkı” ərazisində faktiki istifadə etdiyi torpaq sahəsində kommersiya obyekti quraşdırılması məqsədilə ayrılmış 24 kvadrat metr torpaq sahəsindən istifadə etməsinə və oradakı əvvəlki iaşə obyektinin quraşdırılmasına yaradılmış maneə, məhdudiyyətlərin qadağan edilməsi barədə qərar qəbul edilməsini məhkəmədən xahiş edib. Yusif Quliyevin şikayəti Sumqayıt İnzibati-İqtisadi Məhkəməsində araşdırılıb.

Şikayətçi Yusif Quliyev qeyd edib ki, Sumqayıt şəhər İcra Hakimiyyətinin başçısının 2 sentyabr 2002-ci il tarixli, 218 nömrəli sərəncamı ilə Sumqayıt şəhəri, “Heydər parkı” ərazisində istifadə etdiyi torpaq sahəsindən kommersiya obyekti quraşdırılması məqsədi ilə 24 kvadrat metr torpaq sahəsi onun adına sənədləşdirilib. Onun sözlərinə görə, qeyd edilən torpaq sahəsinin sxemi çəkilib və yerində ölçülərək ona təhvil verilib: “Eyni zamanda Sumqayıt şəhər İcra Hakimiyyətinin Memarlıq və Şəhərsalma İdarəsi tərəfindən “Heydər Parkı” ərazisində adına sənədləşdirilmiş 24 kvadrat metr torpaq sahəsinin inşaat pasportu da hazırlanıb və 21 mart 2004-cü il tarixdə qeydiyyatdan keçirilməklə mənə təqdim edilib. Həmin torpaq sahəsində yüngül konstruksiyadan iaşə obyekti quraşdırmışam, işlətdiyim müddətdə həmin obyektdə əsaslı təmir işləri aparmışam, yüngül plastik materialdan yeni qapı və pəncərə salmışam. Bütün bu işlərə ümumilikdə 10000 manatdan artıq vəsait xərcləmişəm”.

“Obyektim məhv edildi”

Şikayətçinin bildirdiyinə görə, 2011-ci ilin iyul ayında Sumqayıt şəhər İcra Hakimiyyətinin işçiləri əraziyə gələrək “Heydər parkı” ərazisində əsaslı abadlıq və təmir işlərinin aparılacağını, ərazidə bütün iaşə obyektlərinin sökülməli olduğunu bildiriblər, ona başqa yerdən torpaq sahəsi veriləcəyini vəd ediblər: “Nəticədə istifadə etdiyim iaşə obyekti sökülüb. Park ərazisində aparılan yenidənqurma və abadlıq işləri adı altında külli miqdarda vəsait xərclədiyim yeganə gəlir mənbəyi olan obyektimk bir an içərisində məhv edildi. Lakin nə başqa torpaq sahəsi ilə təmin edildim, nə də problemim hər hansı bir şəkildə öz həllini tapmadı. Halbuki yüngül konstruksiyadan quraşdırdığı obyektim söküldüyü halda, hazırda park ərazisində üç ədəd ikimərtəbəli iaşə obyektinin əsaslı tikintisi başa çatdırılıb. Eyni zamanda, bəzi obyekt sahibləri də başqa yerdən torpaq sahəsi ilə təmin ediliblər. Dəfələrlə bununla bağlı etdiyim müraciətlərə cavabdeh ya şablon cavablar verib, yaxud da, ümumiyyətlə cavablandırmayıb. Yalnız xeyli müddətdən sonra başa düşdüm ki, icra başçısı tərəfindən aldadılmışam. Nəticədə cavabdehin qanunsuz hərəkətləri ucbatından maddi cəhətdən böyük zərərə uğramışam. Həmin obyektdən hər ay ən azı 500 manat məbləğində gəlir əldə edirdim. Obyektin sökülməsi nəticəsində əldə etdiyim gəlirdən mərhum olmuşam. Göründüyü kimi, torpaq sahəsinin istifadəmə ayrılması barədə Sumqayıt Şəhər İcra Hakimiyyətinin başçısının 2 sentyabr 2002-ci il tarixli, 218 nömrəli sərəncamı qüvvədə olduğu halda, torpaqdan istifadə etməyimə imkan verilməməsi və quraşdırdığım obyektin abadlıq adı altında sökülməsi qanunsuz olmaqla yanaşı böyük məbləğdə maddi zərərə də uğratmışam”.

“İcra başçısının ucbatından əmlakımdan məhrum olmuşam”

Yusif Quliyev həmçinin bildirib ki, bu səbəblər üzündən icra hakimiyyətinə qarşı məhkəmədə iddia qaldırmağı qərara alıb: “Çünki cavabdehə, digər müvafiq orqanlara həmin gündən hazıradək etdiyi müraciətlərə şablon cavablar verilməklə pozulmuş hüquqlarım bərpa

edilməyib. Beləliklə də, icra başçısının qanunsuz hərəkətləri ucbatından həm öz əmlakımdan, həm də torpağımdan mərhum olmuşam. İcra hakimiyyətinin istifadəmdə olan tikilini hər hansı məhkəmə qərarı olmadan sökməsi və sərəncam qüvvədə olduğu halda, torpaqdan istifadəsinə icazə verməməsi qüvvədə olan normativ hüquqi aktlara ziddir”.

“İddiaçının şikayəti əsassızdır”

Sumqayıt şəhər İcra Hakimiyyətinin nümayəndəsi bildirib ki, Sumqayıt şəhər İcra Hakimiyyəti başçısının 218 nömrəli, 2 sentyabr 2002-ci il tarixli sərəncamı ilə Quliyev Yusif Fazil oğlunun “Heydər Parkı” ərazisində faktiki istifadə etdiyi torpaq sahəsində kommersiya obyekti quraşdırılmasına icazə verilib: “Həmin sərəncamın 5-ci bəndinə əsasən yerində quraşdırılan sahədə əsaslı tikintiyə icazə verilmədiyi və baş plana uyğun olaraq, tikinti aparılması lazım olarsa, quraşdırmanın ləğv olunacağı bildirilib. 2011-ci ildə bütün respublika ərazisində aparılan yenidənqurma və abadlıq işlərinə başlanılıb. İlk növbədə şəhərin mərkəzi küçə və meydanlarında, park və xiyabanlarında əsaslı təmir və abadlıq işləri görülüb. Sumqayıt şəhərinin əsas istirahət və mədəniyyət mərkəzlərindən biri olan “Heydər parkı” ərazisində də 2011-ci ildən abadlıq və yenidənqurma işlərinə başlanılıb. Həmin ərazidə əsaslı təmir işləri hazırda da aparılmaqdadır. Bu məqsədlə əvvəllər ayrı-ayrı vətəndaşların müvəqqəti istifadəsinə verilmiş, müasir standartlara cavab verməyən obyektlər ləğv edilib və bu barədə həmin obyektlərin istifadəçilərinə məlumat verilib. Yusif Quliyev iddia ərizəsində qeyd etdiyi kimi, onun istifadəsində olmuş yüngül konstruksiyadan inşa edilmiş müvəqqəti obyekt 2011-ci ildə ləğv edilib. Həmin vaxt Yusif Quliyev tərəfindən hər hansı bir şikayət və ya tələb irəli sürülməyib. İddiaçının istifadəsində olan obyekt yüngül konstruksiyadan ibarət olmaqla müvəqqəti xarakterli olub və bu barədə Sumqayıt şəhər İcra Hakimiyyəti başçısının 218 nömrəli, 2 sentyabr 2002-ci il tarixli sərəncamında da müvafiq qeyd aparılıb. İddiaçı qeyd olunan sərəncamla onun istifadəsinə verilmiş obyektin müvəqqəti xarakterli olduğunu sərəncam verildiyi andan bilib və həmin sərəncamda göstərilən

tələbi qəbul edilib. Belə olan halda, onun hazırkı iddia tələbi ilə çıxış etməsi tamamilə əsassız və qeyri-qanunidir”.

“İddiaçı 12 il müddətində həmin obyektdən istifadə edib”

Nümayəndənin fikrincə, Torpaq Məcəlləsinin 68-ci maddəsinə əsasən torpaq sahələri üzərində hüquqlar torpaq sahələrinin sərhədlərinin yerdə müəyyən edilməsindən, onların planı və ölçüsünün tərtib edilməsindən, torpaq sahələrinin verilməsi barədə müqavilənin bağlanmasından və onun müəyyən olunmuş qaydada dövlət qeydiyyatından keçirilməsindən sonra yaranır: “Həmin Məcəllənin 67-ci maddəsinə əsasən torpaq üzərində hüquqların dövlət qeydiyyatı qanunvericilikdə nəzərdə tutulmuş qaydada daşınmaz əmlakın dövlət reyestrində aparılır. Dövlət və bələdiyyə mülkiyyətində olan torpaq sahələrinin alınması ilə yaranan hüquqların, habelə torpaq sahələri və digər daşınmaz əmlaka dair bağlanılan əqdlər nəticəsində əldə edilən hüquqların dövlət qeydiyyatına alınması məcburidir. Torpaq sahələri üzərində qeydiyyatdan keçməmiş hüquqların müdafiəsinə və toxunulmazlığına dövlət təminat vermir. Həmin Məcəllənin 66-cı maddəsini 2-ci bəndinə görə torpaq üzərində hüquqlar (müddəti on bir aydan az olan icarə və istifadə hüquqları istisna olmaqla) qanunvericiliklə müəyyən edilmiş qaydada daşınmaz əmlakın dövlət reyestrində dövlət qeydiyyatına alınır və həmin reyestrdən çıxarışla rəsmiləşdirilir. Mülki Məcəllənin 166.3-cü maddəsinə əsasən yalnız o şəxsin torpaq sahəsinə mülkiyyət hüququnun və sahiblik haqqında iddia hüququnun olduğu ehtimal edilir ki, onun sahiblik hüququ torpaq sahəsinin daşınmaz əmlakın dövlət reyestrində qeydə alınmasından irəli gəlir. Lakin torpaq sahəsinin faktik sahibi sahiblikdən özbaşına məhrumedilmə və ya sahibliyin pozulması barədə iddia verə bilər. İş materiallarından görünür ki, Yusif Quliyevin iddia etdiyi torpaq sahəsi üzərində hüquqları müəyyən edilməyib, yəni həmin torpaq sahəsinin iddiaçıya hansı hüquqla ayrılması qeyd olunmayıb. Eyni zamanda iddiaçı iddia etdiyi torpaq sahəsi üzərində hüquqlarını daşınmaz əmlakın dövlət reyestrində qeydiyyata aldırmayıb, ümumiyyətlə, hüquqlarını qeydiyyata aldırması üçün əsas olmayıb. Buna

görə də sərəncam müvəqqəti xarakterli olduğuna görə həmin sərəncamın 5-ci bəndində sahədə əsaslı tikintiyə icazə verilmədiyi göstərilib. İddiaçının guya ona maddi zərər vurulması ilə əlaqədar iddia ərizəsində göstərilənlərlə əlaqədar qeyd olunmalıdır ki, iddiaçı 12 il müddətində həmin obyektdən istifadə edib və gəlir əldə edib”.

Sumqayıt İnzibati-İqtisadi Məhkəməsində işə baxan hakim İsmayıl Quliyevin sədrliyi ilə keçirilən prosesin sonunda Yusif Quliyevin iddiası təmin edilməyib.

Yusif Quliyev qəbul edilmiş məhkəmə qətnaməsindən narazı qalaraq apelyasiya şikayəti verib. Onun şikayəti Sumqayıt Apelyasiya Məhkəməsində araşdırılıb. Hakim Nazim Nəsibovun sədrliyi ilə keçirilən prosesdə çıxış edən Yusif Quliyev Sumqayıt İnzibati-İqtisadi Məhkəməsinin qərarın ləğv olunması və iddianın təmin olunması barədə yeni qərar qəbul edilməsi məsələsini qaldırıb. O, bildirib ki, məhkəmə işin hallarına düzgün qiymət verməyib, iş üçün əhəmiyyəti olan bütün faktiki halları, o cümlədən Sumqayıt şəhər İcra Hakimiyyəti başçısının 218 nömrəli, 2 sentyabr 2002-ci il tarixli sərəncamının hələ də qüvvədə olmasını araşdırmayıb və əsassız qərar qəbul edib. Tərəfləri dinləyən hakim heyəti sonda apelyasiya şikayətinin təmin edilməməsi barədə qərar qəbul edib.

gundemxeber.az