İcra başçısı xalqın pulu ilə xalqa “kef verecək”

Sumqayıt Şəhər İcra Hakimiyyətinin (SŞİH) başçısı Eldar Əzizov qarşıdakı Novruz şənlikləri ilə bağlı iş adamlarından pul yığımına başlayıb. Bu barədə redaksiyamızı bilgili mənbə məlumatlandırıb. Mənbənin sözlərinə görə, bunun üçün hər bir iri dükan və marketdən 100 manat məbləğində pul topladan icra başçısı ictimai iaşə və digər müəssisələri də “ümumxalq işi”nə cəlb edib: “Qarşıdan gələn Novruz bayramı təmtəraqlı bayram şənlikləri ilə gündəmə gələn SŞİH-nin başçısı E.Əzizovu hərəkətə gətirib. Bayram şənliklərini öz ənənəsinə sadiq qalaraq dəbdəbəli şəkildə keçirməyi planlaşdıran icra başçısı bunun üşün gərəkli olan maddi vəsaiti yenə də şəhərdəki iş adamlarının şəxsi büdcəsi hesabına formalaşdırmaq fikrindədir. Artıq bununla bağlı icra başçısının göstərişi ilə şəhər daxilindəki bütün iri mağaza və dükanlardan, market və ictimai iaşə obyektlərindən pul yığımına start verilib. Küçə-küçə dolaşan icra yetkililəri bütün iri obyektləri ümumi yığım prosesinə cəlb etməklə Novruz şənliyinə qədər mümkün qədər çox vəsait toplamağa çalışır”.

İş adamları pul yığımından narazıdır

Mənbənin bildirdiyinə görə, E.Əzizovun Sumqayıt həyatına gətirdiyi 100 manatlıq yığım ənənəsi iş adamları tərəfindən də ciddi narazılıqla qarşılanmaqdadır. Sahibkarlar hesab edir ki, icra başçısının bütün bayramları onların vəsaiti hesabına keçirilməsi yalnız qanunların pozulması deyil, həm də ölkə başçısının aldadılması deməkdir: “İş adamları sahibkar olaraq şəhərin ümumi dirçəlişi və inkişafı naminə müəyyən vəsait ödəməyə, bu yöndə bəlli bir əmək sərf etməyə hazırdırlar. Lakin E.Əzizovun şəhərin bütün problemlərinin həllini iş adamlarına yükləməsi sahibkarları narazı salır. Bəzi iş adamları isə hesab edir ki, icra yetkililərinin hər iki gündən bir qapını kəsdirib pul istəməsi, həm dövlət qurumunu, həm də sahibkarları gözdən salır. Bu baxımdan, sahibkarların əksəriyyəti lazımi vəsaiti ildə bir dəfə toplu halında icra hakimiyyətinə verməyin daha məqbul və “abırlı” çıxış yolu olduğu qənaətindədir. Lakin icra başçısı daha fərqli dəsti-xəttə sərgiləyir ki, bu da tərəflərin heç birinə hörmət gətirmir”.

Eldar Əzizov prezidentin tortunu da sahibkar puluna bişirib

Məlumatlı mənbənin bildirdiyinə görə, icra başçısının 2011-ci ilin dekabrında prezident İlham Əliyevin anadan olmasının 51-ci ildönümü münasibəti ilə təqdim etdiyi tort da şəhər sahibkarlarının puluna hazırlanıb: “2011-ci ilin dekabr ayında E.Əzizov İ.Əliyevin 51-ci doğum günü münasibəti ilə uzunluğu 51 metr olan tort hazırlatdı ki, bu da uzun müddət ölkə gündəmində eninə-uzununa şərh edildi. Lakin o zaman çox az adam bildi ki, icra başçısı bu tort üçün gərəkli olan vəsaiti də şəhərdəki iş adamlarından toplamışdı. Bunun üçün şəhərdəki bütün iri obyektlərdən yüz manat məbləğində vəsait toplandı ki, nəticədə E.Əzizov ortaya 51 metr uzunluğunda tort qoydu. Lakin o zaman iş adamları siyasi müstəvidə təzyiqə məruz qalmamaq və icra hakimiyyəti ilə hansısa probelm yaşamamaq üçün öz etirazlarını büruzə vermədilər. Fəqət bugünlərdə yenidən Novruz bayramı bəhanəsi ilə pul yığımına start verilməsi iş adamlarının səbrini daşırtdı. Artıq şəhərdə bununla bağlı ciddi narazılıq müşahidə edilir ki, bu narazılığa təkan verən amillərdən biri pul yığımının yalnız Novruz şənlikləri ilə yekunlaşmamasıdır”.

Sahibkarlar daha nədən narahatdır?

Bilgili qaynağın sözlərinə görə, sahibkarlar ötən illərin təcrübəsini əsas götürərək hesab edir ki, E.Əzizov qarşıdakı rəsmi bayramlarla bağlı da onlara müraciət edəcək, sahibkarları “ümumxalq işinə” yardımçı olmağa, prezidentə dəstək olmağa çalışacaq: “İş adamları haqlı olaraq belə hesab edir ki, E.Əzizovun pul yığımı qarşıdakı aylarda da davam edəcək, respublika və konstitusiya bayramları, ordu günü və s. adlarla da sahibkarlardan pul yığımı kampaniyası başladılacaqdır. Bu isə yenidən sahibkarların əsəblərinin tarıma çəkilməsi, onların hüquqlarının pozulması deməkdir”.
Mənbə iş adamlarının öz etirazlarını açıq şəkildə ortaya qoymamasının səbəblərinə də aydınlıq gətirdi: “Əslində bu gün E.Əzizovun şəhər daxilində həyata keçirdiyi siyasət icra başçısına qarşı ciddi müxalifətin formalaşmasına səbəb olub. Bu gün nəinki sıradan vətəndaşlar, həmçinin xırda, orta və iri sahibkarların əksəriyyəti E.Əzizovun yürütdüyü siyasətdən narazıdır. Ancaq bununla belə Administrasiya səviyyəsində müdafiə olunan E.Əzizova qarşı gəlmək, onun tələblərini rədd etmək həmin iş adamının biznesmen kimi iflası deməkdir. Sahibkarların susqunluğunun əsas əlamətlərindən biri də məhz bununla bağlıdır. Buna görə də Novruz şənliyi ilə bağlı pul yığımı kampaniyasının da açıq etirazlarla müşahidə ediləcəyini ehtimal etmək olmaz. Fəqət bununla yanaşı, şəhərdəki sosial gərginliyin gec-tez açıq müstəviyə keçəcəyi və E.Əzizovu çətin duruma salacağı şübhəsizdir”.

İlqar Rəsulov