Bir məqama da diqqət yetirmək lazımdır ki, ünvanladığımız suala onun verdiyi cavablar və verdiyi cavablara da tərəfimizdən irad bildirilməsi, Məharət həkimi bir az da hövsələdən çıxartdı və növbəti dəfə o, bizi başqa bir vəzifə sahibi ilə də hədələdi
“Gündəm Xəbər” qəzetinin 23-29 oktyabr 2015-ci il tarixli sayında, Gəncə şəhəri B.Sərdarov küçəsi ev-41 ünvanında yaşayan Rüstəmova Rəhilə Əmrah qızının, redaksiyamıza ünvanladığı şikayət ərizəsi əsasında “Məharət həkimin məharətliyi, Azad Quliyevin isə təklifi” başlıqlı tənqidi açıqlama ilə çıxış etmişdik. Açıqlamada əsas bir məqama toxunmuşduq ki, Rəhilə Rüstəmovanın qızı Əhmədova Şəlalə Rasim qızı ailə münaqişəsi zəmnində ağır yanıq xəsarətləri aldığından o, 05 sentyabr 2015-ci il tarixdə təcili tibbi yardımla Gəncə şəhəri 3 saylı Şəhər Mərkəzi Xəstaxanasına yerləşdirilir. Xəstəxanada xəstəyə ilk tibbi yardım göstərən Məharət həkim olsa da, o, çox keçmir ki, sonrakı günlərdə əməlli-başlıca “məharətliyini” də nümayiş etdirir. Belə ki, ilk gündən ağır yanıq xəsarətləri alan, maddi durumları olduqca acınacaqlı olan bir ailəyə rəhm etməyən həkim, təqribən beş gün xəstəxanada müalicə olunan Şəlalə Əhmədovaya çox keçmir ki, heç bir diqqət göstərmir. Buna səbəb, Məharət həkimin xəstənin anasından müalicə haqqı olaraq 500 manat rüşvət tələb etməsi və imkansızlıq ucbatından istənilən rüşvəti düzəldib ona verə bilməmələri olur.
Elə ki, Rəhilə Rüstəmova qızı Şəlalə Əhmədovanın vəziyyətinin günü-gündən ağırlaşdığını görür, o, son anda qızını xəstəxanadan çıxartmağa da məcbur olur. Çünki, Məharət həkimə 500 manat rüşvəti verə bilmədiyi üçün Rəhilə xanım düşünür ki, dövlət səhiyyə müəssisəsində çalışmasına məhəl qoymayan, imkansız ailənin maddi durumunu nəzərə almayan, and içdiyi “Hippokrat andı” naxələflik edən Məharət həkimdən nə desən gözləmək olar.
Ümumi şəkildə götürdükdə yaşanan olayın olduqca problemli bir məsələ olduğunu, səhiyyə ocaqlarında Məharət həkim kimi həkimlərin günahı ucbatından neçə-neçə xəstələrin hansı məşəqqətlərə düçar olduğunu da unutmaq olmaz. Belə bir səbəblər üzündən də, bir redaksiya olaraq Səhiyyə Nazirliyinin, Gəncə şəhər İcra Hakimiyyəti Aparatının, Gəncə şəhər Səhiyyə İdarəsi rəsmlərinin, eyni zamanda Gəncə şəhər 3 saylı Şəhər Mərkəzi Xəstəxanası rəhbərliyinin də, yaşanan problemin varlığına münasibət bildirmələri üçün, qeyd olunan qurum rəhbərlərinin ünvanına məktubla müraciət etməyə məcbur olduq.



Onu da qeyd edək ki, Səhiyyə Nazirliyinə ünvanladığımız məktuba 19 noyabr 2015-ci il tarixdə, nazirliyin Tibbi Yardımın Təşkili Şöbəsinin müdiri G.Poladovun imzası ilə verilmiş 02/19-9605 nömrəli cavab məktubunda yazılır ki, “vətəndaş Rəhilə Rüstəmova ilə bağlı Azərbaycan Respublikası Səhiyyə Nazirliyinə daxil olmuş məktubunuzda, sadalanan olaylarla əlaqədar tədbir görülməsi üçün, məktubunuz Gəncə şəhər Səhiyyə Şöbəsinə göndərilib”. Əlbəttə, verilən cavab məktubuna diqqət yetirdikdə onu da müəyyən etmək olur ki, nazirliyin rəsmisi problemin varlığına diqqətlə yanaşır və problemin mahiyyətinin araşdırılmasında maraqlı da görünür.
Diqqəti cəlb edən hal odur ki, bir neçə gün bundan öncə problemin əmələ gəlməsində birbaşa günahkar olan, imkansız bir ailədən aparacağı müalicənin müqabilində 500 manat rüşvət tələb edən Məharət həkimin, ünvanladığımız suala verdiyi cavab, hələ də bizi şokdan ayırmayıb. Çünki istəyimiz o idi ki, qarşı tərəf olaraq onun da mövqeyini dəqiqləşdirə bilək. Yəni, işıq üzü görən növbəti açıqlamamızda, problemlərin varlığı ictimaiyyətin diqqətinə bitərəfli qaydada çatdırılmasın. Bu zaman onun “siz kimsiniz ki, məndən nə də soruşasınız? Darıxmayın, sizinlə ölkə rəhbəri məşğul olar, onda yığşırılarsınız” deməsi, bizi olduqca təəccübləndirdi. Çünki, ölkəmizin aparıcı səhiyyə ocaqlarından birində çalışan Məharət həkim, ilk öncə tutduğu əmələ peşman olmaq, xəcalət çəkmək əvəzinə, “sizinlə ölkə rəhbəri məşğul olar, onda yığşırılarsınız” deməsi, bir daha bizi düşünməyə sövq etdi. Təəssüf doğuran hal odur ki, ən azından beş il ali təhsil ocağında təhsil alan, xeyli müddət isə səhiyyə sahəsində çalışan Məharət həkim, hələ də anlamır ki, ölkə rəhbəri xırda problemli məsələlərlə məşğul olan vəzifə sahibi deyil. Düzdür, qəbul olunmuş Konstitusiyamızda ölkə rəhbərinin hüquq və vəzifələri, eyni zamanda onun hər bir vətəndaşın hüquq və azadlığının qorunmasında təminatçı şəxs olduğu da bildirilir. Amma, bir həqiqəti Məharət həkim başa düşməlidir ki, hal-hazırda ölkəmizin saysız-hesabsız taleyüklü problemləri var ki, bu gün ölkə rəhbəri həmin problemlərin həlli ilə məşğuldur.
Bir məqama da diqqət yetirmək lazımdır ki, ünvanladığımız suala onun verdiyi cavablar və verdiyi cavablara da tərəfimizdən irad bildirilməsi, Məharət həkimi bir az da hövsələdən çıxartdı və növbəti dəfə o, bizi başqa bir vəzifə sahibi ilə də hədələdi. “Darıxmayın, sizinlə Əli Həsənov məşğul olar, o halda hər şeyi başa düşərsiniz” deməsi də, bizi çox götür-qoy etməyə vadar etdi. Amma, biz bir məqamı da başa düşə bilmədik ki, Məharət həkim bizi Prezidentin köməkçisi Əli Həsənovla, yoxsa Qaçqınların və Məcburi Köçkünlərin İşləri üzrə Dövlət Komitəsinin sədri Əli Həsənovla hədələyir. Hərhalda o, bizi vəzifə sahibi olan şəxsin adı ilə hədələdi.
Bütün bunlardan sonra, biz belə bir düşüncəyə də bulunduq ki, bu cür danışıqları danışan Məharət həkimin, bəlkə müalicəyə ehtiyacı var. Baxmayaraq ki, o, həkimlik fəaliyyəti ilə məşğul olur. Amma, nə demək olar? Bir az da gözləyək, bir az da fikirləşək, bəlkə zaman keçdikcə Məharət həkimlə bağlı bəzi həqiqətlər bizə də bəlli olacaq.
Araşdırmalarımız davam edəcək.

Ş.Cəfəri

gundemxeber.az