«Qızıl dəvə» problemi: “MTN İŞİ” KİMLƏRİ ÇIXILMAZ DURUMA SALIB?

Zakir Tağıyev ona məxsus 7 milyonluq heykəlin tapılması üçün Baş Prokurorluqdan yardım istəyib, səfirlə bağlı araşdırmalar isə “Delta Com”a qədər uzanır
Eldar Mahmudovun və kriminal qruplaşmanın MTN-dən kənarlaşdırılmasından sonra, bir çox qaranlıq məsələlərə aydınlıq gətirilməkdədir. Artıq müəmmaya çevrilən bir sıra cinayətlərin də izi, məhz MTN generallarına aparıb çıxarır. Belə işlərdən biri də, sabiq Baş Prokuror, hal-hazırda Balkan ölkələrində səfir vəzifəsində çalışan Eldar Həsənovun Eldar Mahmudovla işbirliyi olması barədə məlumatların ortaya çıxmasıdır.
Mətbuata daxil olan ilginc məlumata görə, təqribən on il bundan əvvəl müəmmalı şəkildə yoxa çıxan, prezidentliyə keçmiş namizəd, iş adamı Zakir Tağıyevə məxsus olan və dəyəri 6 milyondan artıq olan «Qızıl dəvə»nin prokurorluq işçiləri tərəfindən Zakir Tağıyevin evindən götürürlməsindən sonra, həmin «Qızıl dəvə»nin Dubayda peyda olması, birbaşa Eldar Mahmudovla Eldar Həsənovun işbirliyi nəticəsində baş verdiyi bildirilir.
Zakir Tağıyevin qohumlarının verdiyi məlumatlara görə, Dubayda aşkarlanan və sonradan yenidən yoxa çıxan «Qızıl dəvə»nin tapılması üçün, Zakir Tağıyev yenidən Baş Prokurorluğa müraciət edir. İş adamı müraciətində «Qızıl dəvə»nin Dubaya aparlmasında və sonra Dubaydan da yoxa çıxmasında, MTN işçilərinin rolu haqqında ətraflı məlumat verib. Mənbənin bildirdiyinə görə, Zakir Tağıyevin ərizəsi Baş Prkurorluqda icraata alınıb və onun araşdırılması zamanı aparılmasını, «Qızıl dəvə»nin Akif Çovdarovdan soruşulması yəqin ki, lazım gələcək.
Mənbənin bildirdiyinə görə, «Qızıl dəvə»nin Dubaya aparılmasını və sonra da satılmasına cəhd olunmasını, birbaşa Eldar Həsənov sabiq MTN şefindən özü xahiş edib. Lakin sonradan Dubayda “Qızıl dəvə”nin satışını həyata keçirmək mümükün olmayıb. Çünki, Dubay polisi təqribən 7 milyona satılan «Qızıl dəvə»nin oğurluq olub-olmadığını yoxlaması, Eldar Həsənovu olduqca qorxudur. Bundan sonra Eldar Həsənovun Dubaydakı adamı «MTN-nin pəncərəsi»ndən istifadə edib «Qızıl dəvə»ni yenidən Bakıya qaytarır. Hal-hazırda «Qızıl dəvə»nin harada olması ilə bağlı heç bir məlumat yoxdur. Müəyyən ehtimallara görə «Qızıl dəvə» Eldar Mahmudov tərəfindən gizlədilib.
Onu da qeyd edək ki, 1995-ci ildə prezidentliyə namizəd olmuş, tanınmış iş adamı Zakir Tağıyevin evində Baş Prokurorluğun əməkdaşları axtarış aparıblar. Axtarış zamanı Tağıyevin evində olan, qiyməti milyonlarla dollar dəyərində qiymətləndirilən və qızıldan hazırlanan dəvə heykəli yoxa çıxır. Yoxa çıxmış dəvə isə, bir müddət bundan sonra Dubayda peyda olur.
Mətbuatın yaydığı məlumatlara görə araşdırmalar nəticəsində o da məlum olur ki, Zakir Tağıyev sözügedən qızıl dəvə heykəlini, hələ 90-cı illərin əvvəllərində heykəltaraş Rahib Həsənova hazırlatdırıb. Moskvada ərsəyə gətirilən heykəli qanuniləşdirmək məqsədilə, Tağıyevlə Həsənov arasında müqavilə belə bağlanılıb və daha sonra malın kimə məxsus olmasına dair sertifikat da alınır.
Əməliyyat-axtarış tərdbirləri zamanı yoxa çıxmış «Qızıl Dəvə» Dubayda satılarkən, satan şəxs «ilişir». Məlum olur ki, həmin heykəlin qiymətləndirilməsi üçün, ABŞ-dan dəvət edilmiş ekspert ona 6,8 milyon dollar qiymət qoyur. Belə bahalı malı satarkən Dubay polisinin də araşdırması, onun oğurluq olub-olmaması vacib hal sayıldığından, onların rəyi nəzərə alınır. Və o da məlum olur ki, «Qızıl Dəvə»nin həqiqi sahibi, heç də onu satan şəxslər deyil, Zakir Tağıyevdir.
Heykəl Fransada təşkil olunmuş sərgidə,Tağıyevin əmlakı olaraq nümayiş də etdirilib. Vəziyyətin qəlizləşdiyini görən satıcılar, dərhal Bakıya qayıtmalı olurlar. Daha doğrusu, canlarını qurtarıblar.
Lakin məsələ bununla da bitmir. Eldar Həsənovun adamları olan şəxslərin «Qızıl Dəvə»nin orjinalını itirmək üçün, onun «kopya»sını hazırlamağa başlayırlar. Bir il bundan əvvəl onun “kopya”sı hazırlansa da, onun kimə satıldığı isə məlum olmur.
Onu da qeyd edək ki, Dubayda heykəli satmaq istəyənlərin, birbaşa Eldar Həsənova bağlı adamlar olduğu və onların bir neçə dəfə belə «əməliyyatlar» həyata keçirdikləri də iddia olunur. O da vurğulanır ki, həmin şəxslər uzun müddətdən bəri belə bir fəaliyyətlə məşğul olublar və onları MTN «sığorta» edib. Bu isə Eldar Həsənovla Eldar Mahmudovun işbirliyi nəticəsində mümkün olub.
Başqa bir mənbədən daxil olan məlumata görə, Eldar Həsənovla Eldar Mahmudovun işbirliyi həmçinin «Delta Com» şirkətində də baş verib. Eldar Mahmudovun işdən azad olunmasından sonra, müəmmalı şəkildə yanan və Azərbaycanı internetlə təmin edən əsas «Delta Com» şirkətinin payçılarından birinin də, məhz Eldar Həsənova məxsus olduğu bildirilir.
Yazıda adı keçən şəxslərin mövqeyini də dərc etməyə hazırıq.

“Gündəm Xəbər”