Məntəqənin ən təhlükəli vəziyyətlə ilə üz-üzə qala biləcəyi anlardan biri də, “Məleykə Petrol”un yerləşdiyi ərazinin üst hissəsindən, yüksək gərginlikli elektrik xəttinin keçməsidir

Bu günədək Tovuz rayonunun çoxsaylı problemlərindən az-çox bəhs etmişik. Yəni, rayonun ayrı-ayrı sahələrində baş alıb gedən sosial problemlərin varlığını hər an ictimailəşdirməyə çalışmışıq ki, daha çox sadə vətəndaşlarımızın yaşayış tərzi qaydaya düşsün, problemləri həllini tapsın. Amma, rayonun

Qovlar qəsəbəsində, bir qədər də dəqiq desək “Vağzal” küçəsində fəaliyyət göstərən “Məleykə Petrol” yanacaqdoldurma məntəqəsinin insan həyatı üçün təhlükə törətməsindən heç cür xəbərdar deyildik. Çünki, yanacaqdoldurma məntəqəsinin təhlükəli fəaliyyəti ilə bağlı, redaksiyamıza zəng edən Səməndər Məmmədov adlı qəsəbə sakini narahatçılığını bildirir ki, “belə bir məntəqənin fəaliyyəti qanunsuz fəaliyyətdir. Çünki, yanacaqdoldurma məntəqəsi mərkəzi yoldan təqribən 15-20 metr aralı məsafədə yerləşməli olduğu halda, “Məleykə Petrol” mərkəzi yolun düz 3-5 metrliyindədir. Bundan əlavə, yanacaqdoldurma məntəqəsinin sağ və sol hissələrində ona bitişik mağazalar var ki, həmin mağazalarda da tərkibi yanmaya həssas olan materiallar, o cümlədən rastvaritel, kislota və.s satılır. Bundan əlavə, məntəqəyə bitişik maşın təmiri ilə məşğul olan sex fəaliyyət göstərir ki, həmin sexdə də “Karbit”lə işləyən elektrik qaynağı ilə gündəlik müxtəlif işlər görülür.

Məntəqənin ən təhlükəli vəziyyətlə ilə üz-üzə qala biləcəyi məqamlardan biri də, “Məleykə Petrol”un yerləşdiyi ərazinin üst hissəsindən və məntəqəyə çox yaxın məsafədən yüksək gərginlikli elektrik xəttinin keçməsidir. Digər tərəfən, əgər yanacaqdoldurma məntəqəsinin qarşısında iki nəqliyyat vasitəsi toqquşarsa, o halda bənzəri olmayan hadisə də baş verə bilər. Çünki yuxarıda qeyd etdiyimiz kimi, məntəqənin mərkəzi yoldan 3-5 metr aralı məsafədə yerləşməsidir.

Belə bir ünvanın fəaliyyəti haqda redaksiyamıza zəng edən Səməndər Məmmədov onu da bildirir ki, həmin məntəqəyə yanacaq 40 tonluq maşında ayrı-ayrı neftbazalardan daşınır. Təəssüf doğuran hal odur ki, həmin yanacaq qəsəbədə fəaliyyət göstərən, amma aidiyyəti qurumlardan fəaliyyət göstərməsi üçün lisenziyası olmayan yanacaqdoldurma məntəqələrinə verilir. Məlumatı verən şəxs onu da bildirir ki, qəsəbənin “Vağzal” küçəsində fəaliyyət göstərən “Məleykə Petrol” la bərabər, İbrahimhacılı kəndində fəaliyyət göstərən məntəqənin də lisenziyası yoxdur. Hələ bunlar qalsın bir yana, həmin məntəqələrdə kassa aparatının olmaması da, artıq həmin məntəqələrin hansı qaydada fəaliyyət göstərməsini sübut etməyə tam əsaslar verir.



İnanırıq ki, fəaliyyəti qanunun tələblərinə lazımınca cavab verməyən, vergidən yayınan, hər an təhlükə ilə üz-üzə qala biləcək belə bir məntəqələrin fəaliyyəti ilə bağlı, aidiyyəti qurumlar mütləq müəyyən araşdırmalar aparacaqlar. O zaman hər kəs, o cümlədən Qovlar qəsəbə sakini Səməndər Məmmədov da biləcək ki, qanunlarımızın qüdrəti istənilən problemlərimizin həllinə imkanlar açır.

Problemlərin varlığını diqqətdə saxlayacağıq.

Mətləb

gundemxeber.az