Əlli gündən çox əsrlikdə qalan əlil, haqq-ədalət axtarışındadır

Əli Nəbiyev: “Xocalı” kiçik müəssisəsinin rəhbəri olaraq Nərimanov RİH-nə qarşı qaldırdığım iddia tələbim, 2 saylı Bakı İnzibati-İqtisad Məhkəməsinin icraatından alınmalı və 1 saylı Bakı İnzibati-İqtisad Məhkəməsinin icraatına verilməlidir

Hələ bir müddət bundan əvvəl “Xocalı” kiçik müəssisəsinin rəhbəri Əli Nəbiyev, redaksiyamıza ünvanladığı şikayət ərizəsində yazıb bildirmişdi ki, Nərimanov rayon İcra Hakimiyyətinin başçısı Abdin Fərzəliyev bir neçə il bundan əvvəl vermiş olduğu tapşırıq əsasında, vaxtilə inşa etdirdiyim binanı yerlə-yeksan etdirərək hüquqlarımı pozmuşdur. Çünki, söküntü işlərinə başlanmazdan əvvəl belə bir razılıq əldə olunmuşdu ki, dəymiş ziyana görə lazımi məbləğdə kompensasiya ödəniləcək. Təəssüflər olsun ki, bu günədək qarşı tərəf vermiş olduğu vədə əməl etmədiyindən, məcburam ki, yaşanan problemlə bağlı aidiyyəti qurumlara şikayətlərimi ünvanlayım, əksər mətbu orqanlarda problemin ictimailəşməsinə də çalışım.
Əli Nəbiyev bir neçə gün bundan əvvəl redaksiyamıza təkrar ünvanladığı şikayət ərizəsində yazıb bildirir ki, “mən “Xocalı” kiçik müəssisəsinin rəhbəri olaraq, inşa etdirdiyim binanın Nərimanov rayon İcra Hakimiyyəti başçısının vermiş olduğu tapşırıq əsasında sökülməsi, qanunla tələb olunan kompensasiyanın və dəymiş maddi ziyanın ödənilməməsi ilə bağlı, 2 saylı Bakı İnzibati-İqtisad Məhkəməsində qaldırdığım iddia tələbimə dair işə baxılması, məhkəmənin hakimi Zaur Tağıyevə həvalə edilmişdir. Təəssüflər olsun ki, qaldırdığım iddia tələbim heç bir əsas olmadan təmin edilmədi.
2 saylı Bakı İnzibati-İqtisad Məhkəməsində qaldırdığım iddia tələbimin təmin edilməməsinə səbəb o oldu ki, məhkəmənin sədri və hakimi Nərimanov RİH-nin başçısı Abdin Fərzəliyevin vermiş olduğu tapşırıqları yerinə yetirir. Bütün bunların nəticəsidir ki, inana bilmirəm ki, bundan sonra da Nərimanov RİH-nə qarşı qaldıracağım iddia tələblərimə ədalətlə baxılsın. Çünki, fakt budur ki, məhkəmə heyyəti verilmiş tapşırıqlar əsasında fəaliyyət göstərirlər. Hesab edirəm ki, atılan addımlar da “əvəzsiz” deyil. Bu da bir daha onu sübut etməyə əsas verir ki, məhkəmədə qərar çıxarılan zaman qanunlar deyil, verilmiş tapşırıqlar əsas tutulur.
Bir neçə gün bundan əvvəl də, vurulmuş maddi zərərin və digər tələblərimin ödənilməsinə dair, Nərimanov RİH-nə qarşı təkrar iddia tələbimi irəli sürsəm də, yenə iddia tələbimə dair işə baxılması, hakim Zaur Tağıyevə həvalə olunmuşdu. Sonuncu dəfə də, məhkəmə heyyəti iddia tələbimi yerinə yetirmədi. Elə bu səbəbdən də, hesab edirəm ki, “Xocalı” kiçik müəssisəsinin rəhbəri olaraq Nərimanov RİH-nə qarşı qaldırdığım iddia tələbim, 2 saylı Bakı İnzibati-İqtisad Məhkəməsinin icraatından alınmalı və 1 saylı Bakı İnzibati-İqtisad Məhkəməsinin icraatına verilməlidir.
Bu günədək baş verənləri nəzərə alaraq belə bir qənaətə də gəlmişəm ki, deyəsən Nərimanov rayon İcra Hakimiyyəti dövlətimizin içində başqa bir dövlətdir və Abdin Fərzəliyevin iradəsi, Azərbaycan Respublikasının Qanunlarından da üstündür. Buna görə də, mən mətbuat vasitəsilə istər ölkə rəhbəri cənab İlham Əliyevdən, istərsə də Ədliyyə Naziri cənab Fikrət Məmmədovdan xahiş edirəm ki, üzləşdiyim problemin həlli üçün, iddia tələbimin 1 saylı Bakı İnzibati-İqtisad Məhkəməsində baxılması üçün, mənə köməklik göstərmələrini xahiş edirəm”.
Sözsüz ki, yuxarıda qeyd olunanların hər biri əslən Xocalıdan olan 2-ci qrup Dağlıq Qarabağ müharibəsi əlili, ehtiyatda olan zabit, əlli gündən çox erməni əsirliyində qalan, əsrlikdə olarkən dişləri kəlbətinlə çəkilən, qolları sınıq-salxaq edilən, ağzının içindən güllə atılan 75 yaşlı “Xocalı” kiçik müəssisəsinin rəhbəri Əli Nəbiyevin fikirləri, redaksiyamıza ünvanladığı müraciətidir. İşıq üzü görən açıqlama ilə bağlı, adları çəkilən hər bir vəzifə sahibinin də mövqeyini dinləməyə hazırıq.

“Gündəm Xəbər”