Əli Nəbiyev: “Mən bu Vətən üçün 4 il dalbadal döyüşmüşəm, bu torpaq uğrunda qohum-əqrəbamı itirmişəm. Əsirlikdə olarkən ağzımın içindən atıblar, dişlərimi kəlbətinlə çəkiblər, qollarımı da sınıq-salxaq ediblər”

Bir neçə gün bundan əvvəl, əslən Xocalıdan olan 2-ci qrup Qarabağ müharibəsi əlili, ehtiyatda olan zabit, əlli gündən çox erməni əsrliyində qalan və əsrlikdən güc-bəla ilə xilas olmuş 75 yaşlı “Xocalı” kiçik müəssisəsinin təsisçisi, Nəbiyev Əli İbad oğlu redaksiyamızın qonağı oldu. Ömrünün ahıl çağlarını yaşayan ağsaqqalın bu gün üzləşdiyi bir problem var ki, o da vaxtilə inşa etdirdiyi binanın Nərimanov rayon İcra Hakimiyyətinin başçısı Abdin Fərzəliyevin tapşırığı əsasında sökülməsi və söküntü işlərindən sonra onlara verilməli olan kirayə pulunu verməməsidir. Elə bu səbəbdən də o, müxtəlif ünvanlara üz tutur, bəzi KİV üzləşdiyi problemlərin varlığı ilə bağlı açıqlamalar da çıxışlar edir.

Bir neçə gün bundan əvvəl, Əli Nəbiyevin üzləşdiyi problemlərlə bağlı “Azadlıq” və “Gündəm Xəbər” qəzetlərində açıqlamaları da işıq üzü görmüşdü. O, bu gün də üzləşdiyi problemlərdən bəhs edir və redaksiyamıza növbəti müraciətini ünvanlayaraq yazır ki, “23 oktyabrda Ağa Nemətulla küçəsində yerləşən “Xocalı” kiçik müəssisənin qarşısına, Abdin Fərzəliyevin tapşırığı ilə Naxçıvan MR-nın Şərur rayonundan 200 nəfərə qədər adam toplaşmışdı. Onlar işığımı, suyumu kəsməklə bərabər, məni də təhqir etməkdən belə çəkinmədilər.

Mən bu Vətən üçün 4 il dalbadal döyüşmüşəm, bu torpaq uğrunda qohum-əqrəbamı itirmişəm. Əsirlikdə olarkən ağzımın içindən atıblar, dişlərimi kəlbətinlə çəkiblər, qollarımı sınıq-salxaq ediblər”. O, eyni zamanda ölkə rəhbəri İlham Əliyev cənablarına ünvanladığı müraciətini də belə bildirir ki, “əgər xalqımızın ulu öndəri mərhum prezidentimiz Heydər Əliyev bilsəydi ki, vaxtilə onun tapşırığı əsasında mənə verilimiş torpaq sahəsində tikdirdiyim bina, sonradan başıma bəla olacaq, o halda yəqin ki, o, torpaq sahəsinin mənə verilməsi ilə bağlı müvafiq tapşırığını verməzdi. Mən bu günədək üzləşdiyim problemlə bağlı Sizə on ərizə, hörmətli Mehriban xanıma isə, beş ərizə ünvanlamışam. Bir ərizə də, qızınız Leyla xanıma yazmışam.

Prezident Administrasiyasının rəhbəri cənab Ramiz Mehdiyevə beş, Sizin köməkçiniz Əli Əsədova isə on ərizə ünvanlanmışam, beş dəfə də üzləşdiyim problemin həlli ilə bağlı onun qəbulunda olmuşam. Baş Nazirin müavini, Qaçqinlarin və Məcburi Köçkünlərin İşləri üzrə Dövlət Komitəsinin sədri Əli Həsənova beş, MM-in deputatı Əli Hüseynova da beş ərizə ünvanlasam da, üç dəfə qəbulunda olsam da, bu günədək heç bir nəticə yoxdur ki, yoxdur”.

Hörmətli oxucular! “Gündəm Xəbər” qəzeti bir mətbu orqan olaraq, daha çox sadə vətəndaşların yanında olduğu üçün, bu gün də belə bir mövqeyini qoruyub saxlamaqdadır. Çünki həmişə çalışmışıq ki, ictimai həyatımızda baş verən sosial-

iqtisadi problemləri qabardaq, daha çox hüquqları pozulmuş hər bir sakinin problemlərinin ictimailəşməsinə də nail ola bilək. Əli Nəbiyev də, çoxsaylı oxucularımızdan biri olduğu üçün, bu gün onun müraciəti əsasında belə bir açıqlama ilə çıxış etməyə məcburuq. Yəni, açıqlamada söylənən fikirlərin hər biri, Əli Nəbiyevə məxsus açıqlamalardır.

Açıqlamada adları çəkilən hər bir şəxsin mövqeyini dinləməyə hazırıq.

“GündəmXəbər”