Füzuli rayon şefi və təhsil şöbəsi keçmiş müdirinin vəzifəyə gətirilməsində Meliorasiya və Su Təsərrüfatı ASC rəhbərinin rolu olub; Almaz Haşımova və Alı Alıyev haqda müdhiş iddialar var

Füzuli Rayon Təhsil Şöbəsinin keçmiş müdiri Almaz Haşımova ilə bağlı araşdırma davam edir. Bu barədə “Gündəm-xəbər”ə mötəbər mənbədən məlumat verilib. Məlumatda Almaz Haşımovanın ləğv edilən MTN-nin Binəqədi rayon şöbəsində çalışan oğlunun da işdən çıxarıldığı bildirilir.

Almaz Haşımova rayonun təhsil şöbəsinə rəhbər Alı Aliyev Füzulinin icra başçısı təyin ediləndən sonra gətirilib. Alı Alıyevin və Almaz Haşımovanın Füzulidə yüksək vəzifəyə gətirilməsində Meliorasiya və Su Təsərrüfatı ASC-nin rəhbəri Əhməd Əhmədzadənin xüsusi rolu olduğu iddia edilir.

Çünki bir vaxtlar Əhməd Əhmədzadə Füzuli rayonunda 1-ci katib vəzifəsində işləyərkən Alı Alıyevlə Almaz Haşımova ona ən yaxın adamlar sayılıblar. Əhmədzadə yenidən Alı Alıyevi və Almaz Haşımovanın Füzulinin icra başçısı və təhsil şöbəsinin müdiri vəzifəsinə gətirməklə, rayonu öz kurasiyasında saxlaya bilib.

Buna görə də Əhməd Əhmədzadə Alı Alıyevlə Almaz Haşımovanı hər zaman qoruyub. Qaynağımız qeyd edir ki, “MTN işi” böyük məsələ olduğu üçün Əhmədzadə Almaz Haşımovanı qoruya bilməyib. Almaz Haşımovanı “MTN işi”ə görə “vursalar” da mənimsəmə ittihamları ilə cəzalandırmaq istəyiblər.

Məlumatlarda o da bildirilir ki, Almaz Haşımova Alı Alıyevlə Əhməd Əhmədzadəyə açıq şəkildə deyib ki, bu işdə onu müdafiə etməsələr, qorumasalar mənimsənilən vəsaitləri tək deyil, Alı Alıyev və Əhməd Əhmədzadə ilə birlikdə mənimsədiyini deyəcək.

Bundan əlavə Almaz Haşımova qohumu, MTN-in Transmilli Mütəşəkkil Cinayətkarlığa Qarşı Mübarizə Baş İdarəsinin keçmiş rəisi Sübahir Qurbanovun sayəsində rayonda sahibkarların, vəsifəli və imkanlı şəxslərin telefon danışıqlarını dinləyə biliblər.

Füzuli rayonunda da təhsilin keyfiyyətindən söhbət belə gedə bilməz. Belə ki, Füzuli Rayon Təhsil Şöbəsinin (RTŞ) müdiri Almaz Həşimovanın yol verdiyi nöqsanlar rayon camaatının təhsilə olan marağını heçə endirib.

Çünki RTŞ müdiri fəaliyyətində ciddi nöqsanlara yol verib. Almaz Həşimova icra başçısının badından istifadə edərək rayonda at oynadıb. Rayonun icra başçısının himayəsinə söykənərək işlərini yoluna qoyub.

Vəzifədə olduğu müddətdə xeyli sayda özbaşına işə imza atan şöbə müdiri külli miqdarda büdcə vəsaitini təyinatı üzrə xərcləməyib. Şöbə rəhbərinin bu günə qədərki fəaliyyəti yoxlansa, onun xoşagəlməz işlərə imza atması üzə çıxacaq. Belə olan halda isə bu şəxsin məsuliyyətə cəlb olunması qaçılmaz olacaq.

Mənbə qeyd edir ki, Almaz Həşimova Füzuli Rayon Təhsil Şöbəsinə işçi götürərkən müvafiq qanunları yaddan çıxarır. Təhsil sistemindən başı çıxmayan adamları işlə təmin edir. Öz yaxın adamlarına təhsil şöbəsində iş verir. Savadlı kadrlar isə işsiz qalır.

Ona görə rayon təhsilinin keyfiyyətindən narazı olanların sayı durmadan artır. Bundan başqa rayon məktəblərində çalışan müəllimlərin çoxu da ali təhsili olmayanlardır. Hansısa kursu bitirmiş şəxslər müəllim adıyla orta məktəblərdə çalışırlar. Qeyd edək ki, Almaz Haşımova MTN olaylarına görə işdən çıxarılması barədə iddialara münasibət bildirmişdi.

Sabiq müdir öz ərizəsi ilə işdən çıxdığını bildirib: “Özüm ərizə yazaraq işdən ayrılmışam. Bunun MTN məsələsi ilə heç bir əlaqəsi yoxdur. Təhsil şöbələri regional quruma çevirildiyi üçün bu şərtlərlə işləmək istəməmişəm.

Sübahir Qurbanov da mənim qudam deyil. Sadəcə qohumluq əlaqəmiz var. Daha dəqiq desəm, mənim bacım onun qohumlarının biri ilə ailə həyatı qurub. Bu da uzun illər əvvəl olub – yəni indi bacımın 67 yaşı var.

Məni Sübahir Qurbanovun qudası kimi təqdim edirlər. Amma 3 oğlumun həyat yoldaşlarının heç biri onun uzaq qohumu belə deyil”. Yazı ilə bağlı adları çəkilən şəxslərin mövqeyini öyrənməyə hazırıq.

gundemxeber.az