Qardaşı başçıdan şikayətçidir, Hafiz Hacıyev çox şey bildiyini amma hələ susduğunu deyir

Son vaxtlar haqqında ən çox mənfi yüklü xəbərlər yayılan məmurlardan biri İmişli Rayon İcra Hakimiyyətinin (RİH) başçısı Vilyam Hacıyevdir. V.Hacıyevin qanunsuz hərəkətlərindən bəhs edən informasiyalar sırasında onun hətta qardaşına da kələk gəldiyindən söz açılıb.
Ötən həftə yayılan məlumatlarda deyilirdi ki, Vilyam Hacıyev hazırda İqtisadi İnkişaf Nazirliyinin Gəncə Regional Mərkəzində işləyən kiçik qardaşı Eldar Hacıyevə kəf gələrək ona xeyli pul “atıb”. Belə ki, V.Hacıyev Göygöl RİH başçısı işlədiyi dövrdə “Kapitalbank”ın Göygöl rayon filialının müdiri olan qardaşı Eldar Hacıyevə öz vəsaiti hesabına abadlıq işi gördürüb, amma bu günədək pulunu verməyib.
Bu barədə E.Hacıyevin özü məlumat vermişdi: “Qardaşım Vilyam Hacıyev 2004-2006-cı illərdə Göygöl Rayon İcra Hakimiyyətinin başçısı vəzifəsində çalışıb. O, rayona gəldiyi ilk dövrlərdə abadlıq işlərinə başlamışdı. O zaman mən ”Kapitalbank"ın Göygöl rayon filialının müdiri idim. Vilyam Hacıyev rayonda bir sıra işlər görmək üçün müvafiq göstərişlər verirdi. Məni də yanına çağırıb dedi ki, rayonun mərkəzi parkında və stadionda təmir, tikinti və abadlıq işləri aparım. Dedi ki, pul tap, xərclədiyin vəsait rayona ayrılacaq puldan geri ödənəcək. Mən də qardaş kimi ona dəstək olmaq üçün təklifi qəbul elədim və hər iki ərazidə abadlıq, təmir işləri apardım. Bu iş təxminən 32 min manata başa gəldi. Vilyam da bildirdi ki, hazırda pulum yoxdur, prezident rayonun sosial-iqtisadi vəziyyətinin yaxşılaşdırılması, infrastrukturun yenilənməsi və abadlaşdırma ilə bağlı pul ayıranda sənin vəsaitini qaytaracağam. Düzü, mənim o qədər pulum yox idi. Sadəcə olaraq, qardaşımın sözünü yerə salmamaq üçün borc götürüb həmin işləri həyata keçirdim. Ancaq sonradan borc sahibinə pulu qaytara bilmədim. Məcbur qalaraq “Kapitalbank”dan kredit götürdüm. Ancaq qardaşım Vilyam Hacıyev pulumu qaytarmadı. Bu günə qədər həmin krediti ödəyə bilmirəm". V.Hacıyevin İmişlidə buna bənzər kələyi dostu, məşhur futbolçu Maşallah Əhmədova gəldiyi barədə bu yaxınlarda faktlar ortaya çıxdı.
Qeyd edək ki, Vilyam Hacıyev prezidentliyə keçmiş namizəd Hafiz Hacıyevin yaxın qohumudur. V.Hacıyev barədə yayılan məlumatlara H.Hacıyevin münasibətini öyrənmək üçün onunla əlaqə saxladıq. 4-5 il öncə V.Hacıyevin fəaliyyəti barədə mediada çıxışlar etdiyini xatırladan Hafiz Hacıyev artıq hər hansı fikir bildirmək istəmədiyini dedi: “Mətbuat İmişli Rayon İcra Hakimiyyətinin başçısı Vilyam Hacıyevin mənim əmim oğlu olduğunu yazır. Ancaq bəyan edirəm ki, Vilyam Hacıyev mənim əmim oğlu deyil. O, mənim atamın əmisi nəvəsidir. Vilyam Hacıyevlə heç bir əlaqəm, münasibətim yoxdur. Mən, ümumiyyətlə, istəmirəm ki, Vilyam Hacıyev məsələsinə təzədən qayıdam. Vilyam Hacıyev və onun fəaliyyəti barədə mən bir neçə il öncə mövqeyimi bir sıra mətbuat orqanlarına, o cümlədən ”Yeni Müsavat"a demişdim. Zaman göstərdi ki, mənim tək onun haqqında deyil, digər icra başçıları barədə vaxtilə söylədiklərim əsassız deyildi. Mən bu adam haqda çox şeyləri bilirəm. İndi onların hamısını desəm, məncə, seçki öncəsi başqa cür qarşılanar. Mən cənab prezidentin harınlamış icra başçıları barədə 12 fevralda ortaya qoyduğu mövqeyi dəstəkləyirəm. Prezidentin həmin mövqeyi ortaya qoymasından sevinirəm ki, mənim bir neçə il öncə dediklərim gəlib öz təsdiqini tapır. Mənim fikirlərimi qərəzli adlandıranlar indi özləri görür ki, hansı proseslər gedir".

Rasim