Hakimlər cinayəti törədən şəxsi bağışlamadı və ona 14 il cəza verildi

Bakı Apelyasiya Məhkəməsində həyat yoldaşını öldürməyə cəhddə ittiham olunan Məhəmməd Əliyevin apelyasiya şikayəti üzrə məhkəmə prosesi başa çatıb.

İttihama görə, Məhəmməd Əliyev 16 aprel, 2015-ci ildə qeyri-rəsmi həyat yoldaşı Ayşən Gülüşova ilə barışmaq üçün baldızının yaşadığı Suraxanı rayonu, Hövsan qəsəbəsi, Tağıyev küçəsindəki mənzilinə gedib.

Ər-arvad arasında yaranan münaqişə qansız ötüşməyib. A.Gülüşova onunla barışmayacağını bildirdikdə Məhəmməd bıçağa əl atıb. O, cibindən çıxardığı bıçaqla hamilə arvadının baş-boyun nahiyəsinə ardıcıl zərbələr endirib.

Hadisə Ayşən Gülüşovanın 8 yaşlı bacısı oğlunun gözləri önündə baş verib. Vurduğu zərbələrin təsirindən arvadının öldüyünü zənn edən Məhəmməd Əliyev daha sonra əlindəki bıçaqla özünə xəsarət yetirib. Səs-küyə gələn qonşular hər iki yaralını 3 saylı şəhər klinik xəstəxanasına çatdırıblar. Həkimlərin səyi nəticəsində Ayşən Gülüşovanın həyatını xilas etmək mümkün olub.

Məhəmməd Əliyev Cinayət Məcəlləsinin 29,120.2.4-cü (xüsusi amansızlıqla və ya ümümi təhlükəli üsulla adam öldürməyə cəhd) və 29,120.2.8-ci (təqsirkar şəxs üçün aşkar surətdə hamilə vəziyyətində olan qadını öldürməyə cəhd) maddələri ilə ittiham edilib.

Bakı Ağır Cinayətlər Məhkəməsinin hökmü ilə Məhəmməd Əliyev 14 il müddətinə azadlıqdan məhrum edilib. Hökmdən narazı qalan Məhəmməd Əliyev apelyasiya şikayəti verərək, cəzasının yüngülləşdirilməsini istəyib.

Məhəmməd Əliyevin şikayəti araşdırılması üçün Bakı Apelyasiya Məhkəməsinə göndərilib. Apelyasiya şikayəti hakim Mirzəli Abbasovun sədrlik etdiyi kollegiyada araşdırılıb.

əqsirləndirilən şəxs qismində dindirilən Məhəmməd Əliyev ona elan olunmuş ittihamla özünü qismən təqsirli bilib. O, ifadəsində Ayşəni öldürmək niyyətində olmadığını göstərib: “Ayşənlə küsülü idik. Evdən küsüb getmişdi, bacısının evində qalırdı. Barışmaq istəyirdim. Həmin gün də baldızımgilin evinə məhz bu məqsədlə gəlmişdim. Onu qorxutmaq istəmişəm, öldürmək yox.”

Zərərçəkmiş şəxs qismində dindirilən Ayşən Gülüşova həyat yoldaşından şikayətçi olmadığını deyib: “2014-cü ilin oktyabr ayında toyumuz olub, rəsmi nikahımız yoxdur. Üç ay olardı ki, ayrılmışdıq. Məhəmməd arabir gəlir, barışmaq istədiyini deyirdi, mən razı olmurdum. Çünki işləmirdi, qısqanc idi, mənə göz verib işıq vermirdi. Hadisə baş verən gün bacımın oğlu da yanımda idi. Məhəmməd yenə barışmaq üçün gəlmişdi. Ona “çıx get burdan, onsuz da barışmayacağam” dedim. Bu vaxt cibindən bıçaq çıxartdı, üzümə, boynuma bıçaq atdı. Qanı görüb özünü itirdi. Məhəmmədin məni öldürmək niyyəti olmayıb, qorxutmaq istəyib”.

Ayşən Gülüşova istintaqa verdiyi ifadəsində Məhəmmədin onu öldürmək istədiyini, başını kəsməsinə imkan vermədiyini, özünü ölülüyə vurduğuna görə sonuncunun onu ölmüş bilib uzaqlaşdığını göstərib: “Həmin vaxt həyəcanlı olmuşam, Məhəmmədə qarşı qəzəbli və əsəbi idim. Ona görə elə ifadə vermişəm. O, mənim övladımın atasıdır. İstintaqa verdiyim ifadəni təsdiq etmirəm”.

Apelyasiya şikayətini araşdıran hakim heyəti sonda qərar elan edib. Qərara görə, Məhəmməd Əliyevin cəzasının yüngülləşdirilməsi ilə bağlı apelyasiya şikayəti təmin edilməyib.

gundemxeber.az