Sarıqaya sakinləri problemin həlli üçün başqa yol görmür

Qəzetimizin ötən saylarında Sumqayıt şəhəri Sarıqaya massivində məskunlaşan məcburi köçkünlərin işıq sayğacları ilə bağlı üzləşdikləri problemdən bəhs etmişdik. Bugunlərdə məlum məsələ ilə bağlı redaksiyamızı bilgiləndirən mənbə, köçkün düşərgəsində vəziyyətin getdikcə mürəkkəbləşdiyini bildirib. Mənbənin sözlərinə görə, buna səbəb əlaqədar qurumların köçkün düşərcəsini sayğaclaşdırmaqda qərarlı olmasıdır: “Məskunlaşdıqları ərazidə qazın mövcud olmadığını əsas gətirən məcburi köçkünlər iddia edir ki, indiki məqamda onların mənzilinə işıq sayğaclarının qoyulması faktiki olaraq yüzlərlə ailəni acığa və səfalətə məhkum etmək deməkdir. Çünki qaza olan tələbatın da işıq enerjisi hesabına ödəndiyi köçkün düşərgəsində bunca böyük kommunal xərci ödəmək mümkün deyil. Bu səbəbdən də məcburi köçkünlər öncə ərazinin qazlaşdırılmasını tələb edir ki, onların bu tələbi işıq işçiləri tərəfindən qəbul edilmir. İşıq idarəsinin əməkdaşları hesab edir ki, “hərənin öz işi var” və əgər sakinlər ərazinin qazlaşdırılmasını tələb edirsə, o zaman bu tələbi əlaqədar qurumlar qarşısında qaldırmalıdır”.

“İşıq idarəsi pula sahiblənir, problemə yox”

Mənbənin bildirdiyinə görə, bugünə qədər məcburi köçkünlərin məskunlaşdığı düşərgədə işıqla bağlı çoxsaylı problemlər yaşansa da, işıq idarəsi məlum problemlərin həllinə yardım göstərməyib. Nəticədə, məcburi köçkünlər bu problemləri öz imkanları və vəsaitləri hesabına həll etməli olublar: “bu vaxta qədər məcburi köçkün düşərgəsində işıqla əlaqədar xeyli problemlər yaşansa da, işıq işçiləri vətəndaşların müraciətini cavabsız qoyur, problemlərin həllinə yardım etmirdi. Bu səbəbdən də yalnız sıradan çıxan kabellərin deyil, çürüyən, aşmaq təhlükəsi olan işıq dirəklərinin də möhkəmləndirilməsi işi məcburi köçkünlər tərəfindən həyata keçirilidi. Lakin indi öz varlığını köçkün düşərgəsinə qoymaq istədiyi sayğaclarla yada salan işıq idarəsi qaçqınlardan işıq pulu yığmaq üçün dəridən-qabıqdan çıxır, bunun üçün bütün vasitələri sınaqdan çıxartmağa çalışır. Başqa sözlə desək, işıq idarəsi məcburi köçkünlərin probleminə deyil, yalnız puluna sahiblənməyə çalışır. Belə ögey münasibət isə məcburi köçşkünlər tərəfindən haqlı etirazla qarşılanır”.

Kim kimə borcludur – idarə köçkünlərə, yoxsa köçkünlər idarəyə?

Bilgili qaynağın sözlərinə görə, əslində bəzi məcburi köçkünlər hesab edir ki, onlar işıq idarəsinə deyil, işıq idarəsi onlara vəsait ödəməlidir. Buna səbəb işıq enerjisinin kəskin surətdə artıb-azalması və çox tez-tez kəsilib-verilməsi nəticəsində çoxlu sayda məişət cihazının sıradan çıxmasıdır: “İşıq idarəsinin əməkdaşları məcburi köçkün düşərgəsinin işıq enerjisi ilə fasiləsiz olaraq təmin edilməsinə diqqət yetirmir, əksinə düşərgəyə enerji verilişini əsaslı-əsassız kəsir və beləliklə də onların rahatlığımnı əllərindən alırlar. Habelə, işıqların tez-tez yanıb-sönməsi, enerjinin gün ərzində bir neçə dəfə kəskin şəkildə artması və azalması mənzillərdəki məişət cihazlarını da sürətlə sıradan çıxardır. Bu gün məcburi köçkün düşərgəsində elə bir mənzil yoxdur ki, orada enerjinin qeyri-stabilliyi səbəbilə sıradan çıxmış ən azı bir məişət cihazı olmasın. Bu baxımdan məcburi köçkünlər hesab edir ki, söhbət puldan gedirsə, onlar işıq idarəsinə deyil, işıq idarəsi onlara borcludur. Məcburi köçkünlər hesab edir ki, əgər bunca müddət ərzində işıq enerjisinin artıb-azalması nəticəsində sıradan çıxan televizorların, soyuducuların və s. pulu hesablansa, işıq idarəsi köçkünlərə ciddi miqdarda kompensasiya ödəmək məcburiyyəti qarşısında qalacaq”.

Son çarə - prezident

Mənbənin sözlərinə görə, hazırda mövcud durumla əlaqədar olaraq məcburi köçkünlər ölkə başçısına müraciət etmək niyyətindədir. Onların fikrincə, bu gün Azərbaycanda elə bir problem yoxdur ki, ölkə başçısı bu problemə müdaxilə etmədən həll edilmiş olsun: “Bu gün Azərbaycanda məmur özbaşınalığı, məhkəmə ədalətsizliyi, polis haqsızlığı və s. ilə üzləşən vətəndaşlar nicat yolunu yalnız ölkə başçısında axtarır ki, bu da ölkədəki ümumi ab-hava ilə əlaqədardır. Hər bir Azərbaycan vətəndaşı yaxşı bilir ki, hansısa problemin həll edilməsi üçün ölkə başçısının özünün bilavasitə həmin problemə müdaxilə etməsi zəruridir. Məhz bu baxımdan məcburi köçkünlər də işıq sayğaclarının qoyulmasının qarşısını almaq üçün ölkə başçısına müraciət etmək niyyətindədir. Məcburi köçkünlər ümid edir ki, bəlkə ölkə prezidentinin qayğısı sayəsində öz problemlərinin həllinə nail ola bildilər”.
Məlumatylı qaynağın bildirdiyinə görə, prezidentdən öncə məcburi köçkünlər Qaçqınların və Məcburi Köçkünlərin İşləri üzrə Dövlət Komitəsinə də müraciət edəcək ki, bu da sırf formal xarakter daşıyacaq: “Məcburi köçkünlər hesab edirik ki, Qaçqınların və Məcburi Köçkünlərin İşləri üzrə Dövlət Komitəsi məlum problemi həll etmək iqtidarında deyil. Lakin bununla belə əlaqədar qurumların əlinə əsas verməmək üçün öncə sözügedən dövlət komitəsinə müraciət edərək problemi onların diqqətinə çatdıracaqlar. Yalnız bundan sonra prezidentə müraciət ünvanlanacaq ki, bu müraciətin nə ilə sonuclanacağını, hansı nəticə verəcəyini zaman göstərəcəkdir”.

İlqar Rəsulov