Üsyandan sonra “Binə” ticarətçilərinə qarşı zülm
daha da artıb; obyekt sahibləri cana doyublar

“Binə” ticarət mərkəzinin rəhbəri Kəbirə Məmmədova sahibkarlara qan uddurur. “Binə” sahibəsi 19 yanvar üsyanından sonra da ticarətçilərə zülm edir, qanunsuz xərac yığdırır, işçiləri təhdid altında saxlayır, bir sözlə sahibkarlara divan tutur. “Binə” hadisələrindən sonra K.Məmmədovanın cəzalandırılacağı, xüsusilə 12 fevral müşavirəsindən sonra onun barəsində tədbir görüləcəyi təxmin edilirdi.
Amma gözlənilənlərin tam əksi baş verdi və K.Məmmədovanın istibdadı davam etməkdədir. Hazırda “Binə” bazarında çalışan sahibkarlar çıxılmaz vəziyyətdədir, onlardan üsyana səbəb olan 250 manat xərac toplanır, etiraz edən isə hədələnir. Baş verən olaylardan sonra “Binə”də olan gərginlik artan xətt üzrə inkişaf edir, ticarətçilər aksiyalara başlamaq istəyir və bəziləri isə yaxınlıqdakı “Karvansaray” ticarət mərkəzinə köç edirlər. Bununla belə, əksər ticarətçilər üsyandan sonra “Binə”də qalmağa üstünlük veriblər. K.Məmmədovanın inadından dönməməsi, sahibkarlardan tələb etdiyi pulu yığması gərginliyi daha da artırıb.
Ancaq redaksiyamıza gələn məlumata görə, K.Məmmədovanın taleyi ilə bağlı müəmmalı vəziyyət yaranıb. Hakimiyyətin daxilində müəyyən qruplar ona qarşı cinayət işi açılmasının, bazarın əlindən alınmasının tərəfdarıdır və bu istiqamətdə təzyiqləri artırıblar. Amma K.Məmmədovanın himayəçiləri onu qoruyaraq “Binə”də rəhbər postunda qalmasında maraqlıdırlar. Buna görə də iki qruplaşma arasında “Binə” uğrunda savaş gedir. Yaxınlıqda yenicə fəaliyyətə başlayan “Karvansaray” yarmarkası da bu rəqabətin tərkib hissəsidir və məqsəd “Binə” bazarını çökdürməkdir. Elə söhbətləşdiyimiz bəzi ticarətçilər də təsdiqləyirlər ki, 19 yanvar üsyanından sonra bir qrup sahibkar “Karvansaray”a köçüb.
Onlara təklif olunan şərtlər və yarmarkanın ticarətçini 3 aylıq yer haqqından azad etməsi sahibkarları razı salıb. Bu yarmarka sahibi K.Məmmədovanı diz çökdürmək, oradakı alverçiləri də bura cəlb etmək üçün bütün səylərini gücləndirib. Ticarətçilər deyirlər ki, K.Məmmədova tədricən zəiflədiləcək və nüfuzdan salınacaq. İndisə K.Məmmədova “Binə”də “at oynadır”, istədiyi tələbi yeridir və sahibkarlara zülm verir. Sahibkarlar müəyyən müddət səbr etməyi və proseslərin hara kimi cərəyan edəcəyini gözləyirlər.
Hazırda “Karvansaray”ın elit univermaq cərgəsində çalışan ticarətçilərin 90 faizi “Binə”dən gələnlərdir. Sahibkarlar məlum olaylardan sonra “Binə”də işləməyin mümkünsüzlüyünü dərk edib bura axışıblar. “Karvansaray”da 300-ə yaxın obyekt artıq icarəyə götürülüb. Qiymətlərin burada daha ucuz olması da müştərilərin diqqətini çəkib.
Ancaq “Binə”də qalanlar qorxurlar ki, “Karvansaray”a köçsələr, birdən müflis olarlar, müştərilərini itirərlər. Ona görə də hələlik qəti qərar verə bilmirlər. Sahibkarlar fikirləşirlər ki, qarşıdan yaz-yay ayları gəlir və “Karvansaray”da icarə haqqı ödəmədən işləyib böhrandan çıxmaq olar.
“Binə”də ticarətçilərdən üsyana səbəb olan xəracların yığılması isə paralel olaraq davam etməkdədir. Artıq mağazalardan tələb olunan yer haqları 250 manatdan yığılır. Ticarətçilər məcburiyyət qarşısında deyilən haqları verməli olublar. Bu xəracların yığıldığını təsdiqləyən satıcılardan bir qrupu bizimlə söhbətdə söylədilər ki, K.Məmmədova sahibkarlara qan uddurur. Onların sözlərinə görə, bazarın sahibi 19 yanvar mitinqindən sonra acığa düşərək qəsdən həmin pulları yığdırır.
Satıcı Vahid deyir ki, K.Məmmədovaya hamı nifrət edir: “Bu adam bizim iş yoldaşlarımızın həbsinə, onlarla ailənin çörəksiz qalmasına səbəb oldu. Camaat aksiya keçirib haqqını istədi. Hökumət isə xalqı onun ayağına verdi. Bizim tələblərimizi yerinə yetirmək əvəzinə Kəbirəyə dayaq oldular. İndi istədiyini edir. Bu adamın məqsədi soyğunçuluqdur, bizə zülm etməkdir, haram yeməkdir”.
Digər ticarətçi Nadir isə bildirdi ki, K.Məmmədova etdiklərinin bir gün cavabını alacaq: “Bu haqsızlığı Allah götürməz. Kəbirə Məmmədova özünü ağa sayır. Amma unutmasın ki, çoxlarını axırını görmüşük. Onun əlindən işləyə bilmirik. Qazandığımız onun cibinə gedir. Biz bilirik ki, burda tək Kəbirə yemir. Milyonlar var və çox iri məmurların maraqları toqquşur. Ancaq heç olmasa milləti də yola versinlər”.
Onu da deyək ki, “Binə”yə giriş pullu oldu. Əvvəlcə bu taktikadan “Sədərək”də istifadə edildi. İşə yaradığını görüb analoji addımı Kəbirə Məmmədova da atdı. Nəqliyyat Nazirliyinin balansında olan maşınlardan başqa bütün maşınların bazara girməsi 50 qəpikdir. Gün ərzində “Binə”yə yüzlərlə maşın girir. Bu da onu göstərir ki, Ziya Məmmədovun burada öz payı var və onun maşınlarına “yaşıl işıq” yandırılır. Əksər dükan sahiblərinin maşını var. Bundan başqa, nə qədər alıcı şəxsi maşını ilə bazara təşrif buyurur. Orta hesabla bazara gündə 10 mindən çox maşın gəlirsə, bunu hesabalayanda fantastic rəqəm ortaya çıxır. Bu qədər pulun hara getdiyi isə bilinmir. “Binə”də sahibkarların narazılığı varsa deməli növbəti üsyan da istisna deyil. Problem həll olunmursa o yenidən bir gün alovlanıb püskürəcək.

Aslan