“Azadlıq” qəzeti Bakının Qaradağ rayonunda yerləşən, “Binə bazarı” kimi tanınan ticarət mərkəzinin sahibkarlarına müraciət edib. İyulun 26-da yayılan müraciətdə deyilir ki, “Azadlıq” ticarət mərkəzinin rəhbəri Kəbirə Məmmədovanın iddiası əsasında 32 min manat cərimələnib: “Məhkəmə çəkişməsinə səbəb qəzetin 2012-ci ildə, “Avroviziya” ərəfəsi “Binə”də hüququ pozulan sahibkarların problemlərini işıqlandırması olub. Həmin vaxt sahibkarlar qəzetimizə müraciət edərək musiqi yarışmasına görə “Binə” rəhbərliyinin onlardan qanunsuz pul yığdığını, buna əməl etməyənlərin isə təzyiqlərə məruz qaldığını bildirmişdi. “Azadlıq” haqqı pozulan vətəndaşların problemlərini işıqlandırmağı özünə borc bilmişdi. Təəssüf ki, ticarət mərkəzinin rəhbəri məqalədə qeyd olunan problemi həll etmək əvəzinə qəzeti məhkəməyə verərək 32 min manat cərimələtdi.

Ali Məhkəmənin 32 min manatlıq cərimə ilə bağlı yekun qərarı yaxın vaxtlarda “Azadlıq” qəzetinin hesabına növbəti həbsin qoyulacağını göstərir. Bu isə onsuz da ağır cərimələrdən və davamlı təzyiqlərdən əziyyət çəkən, ciddi maliyyə problemləri olan qəzetin çökdürülməsinə bərabərdir.

“Binə” sahibkarlarının bir neçəsi qəzetimizlə əlaqə saxlayaraq cərimənin ödənməsi üçün “Azadlıq”a bacardıqları qədər dəstək olacaqlarını bildiriblər. Qəzetimizin probleminə olan bu həssaslığı nəzərə alaraq “Binə”dəki bütün sahibkarlara müraciət edirik. Bu çətin günlərdə “Azadlıq”a dəstək olmaq istəyən, 32 min manatlıq cəriməni ödəmək üçün öz yardımını əsirgəməyən hər bir sahibkara öncədən minnətdarlıq edirik. “Azadlıq” qəzetinin ikinci səhifəsində gündəlik olaraq qəzetimizin bank hesabı dərc olunur. O hesaba köçürəcəyiniz kiçik məbləğ belə “Azadlıq”ın cəriməni ödəyə bilməsi, vətəndaşlarının, eləcə də “Binə”dəki sahibkarların pozulan hüquqlarını bundan sonra da işıqlandıra bilməsi üçün böyük töhfə olacaq. Gəlin, birlikdə azad sözün carçısını boğulmağa qoymayaq, onun var olub haqqı pozulanın yanında olmasına bacardığımız qədər dəstək olaq!”