Çoxsaylı qanunsuzluğa söykənən addımların atılması bir daha onu söyləməyə əsas verir ki, Gədəbəy rayon İcra Hakimiyyətinin başçısı bəzi sahibkarların, o cümlədən Oqtay Qaraoğlunun problemini həll etmək əvəzinə, onu “şantaj” etməkdən belə çəkinmir Son günlər Gədəbəyli sahibkarlarla bağlı yaşananlar, yenə də mətbuatın gündəmini zəbt etməkdədir. Buna səbəb, rayona rəhbərlik edən Ramiz Yediyarovun həyata keçirdiyi idarəçilik və yerli sakibkarlara qarşı bəslədiyi ögey münasibətin varlığıdır. Düzdür, ötən illər ərzində yaşanan problemlərlə əlaqədar, yəni bir neçə sahibkara məxsus obyektlərin heç bir məhkəmə qərarı olmadan darmadağın edilməsi və onlara verilməli olan kompensasiyanın ödənilməsi ilə bağlı vədlər verilsə də, təəssüflər olsun ki, problemlər bu günədək də həllini tapmayıb. Nəticə o olub ki, sahibkarların ayrı-ayrı banklara olan borcları fantastik həddə çatıb, dolanışıq vəziyyətləri minimuma enib, tərəflər arasında inamsızlıq hissi əmələ gəlib və digər problemlər də baş qaldırıb. Gədəbəyli sahibkarlardan olan Oqtay Qara oğlu da, üzü-üzə qaldığı problemlə bağlı bir daha “Gündəm Xəbər”ə bildirir ki, “mən bu gün nə edəcəyimi bilmirəm. Çünki, rayon rəhbərliyi 12 fevral 2015-ci il tarixdə qanuni sənəd-sübutla mülkiyyətimdə olan 38.5kvm-lik obyektimi, heç bir məhkəmə qərarı olmadan dağıtdırıb. Obyektimi yerlə-yeksan edərkən, adicə mənə məlumat belə verməyiblər. Əgər vaxtında məlumat versəydilər, o halda mağazamın içərisində olan avadanlıqlarımı, ayrı-ayrı firmalardan nisyə aldığım mallarımı götürərdim. Belə bir səbəblər üzündəndir ki, həmin vaxt firmalardan götürdüyüm malların pulunu vaxtında qaytara bilmədim və bu gün də sıxıntılar içərisindəyəm”. Gədəbəydə sahibkarların müraciətləri qulaqardına vurulur Bir məqamı da qeyd edək ki, Oqtay Qaraoğlu üzləşdiyi probleminin həlli ilə bağlı, hələ on ay bundan əvvəl icra hakimiyyəti aparatına yazılı müraciətini ünvanlasa da, onun müraciətinə bir kimsə cavab vermir. Yəni, açıq-aydın şəkildə onun müraciəti qulaqardına vurulur. Hələ bu azmış kimi, müxtəlif dövlət qurumlarının rəhbərlərinə, o cümlədən ölkə rəhbəri cənab İlham Əliyevə, Baş Prokurorluğa, Milli Məclisə, Dövlət Təhlükəsizlik İdarəsinin rəhbərliyinə və digər qurumlara ünvanladığı məktublar da, tədbir görülməsi üçün Gədəbəy rayon İcra Hakimiyyəti Aparatına göndərilsə də, daşdan səs çıxır, amma göndərilmiş məktublardan heç bir cavab çıxmır. Buna səbəb deyəsən o olur ki, aidiyyəti qurumlardan tədbir görülməsi üçün göndərilmiş məktublar, icra hakimiyyəti aparatında hüquq şöbəsinə rəhbərlik edən Zülfüqar İsgəndərovun iş otağında ya itbata salınır, ya da ki, toz-torpaqla elə örtülür ki, görünməz olurlar. Bu da onu söyləməyə əsas verir ki, icra hakimiyyəti strukturunda vətəndaşların qəbulu, ünvanlanan şikayətlərə baxılması, problemlərinin həlli qaydası belə bir formada həyata keçirilir. Sözsüz ki, “balıq başdan iylənər” deyiblər. Yəni, Ramiz Yediyarovun tətbiq etdiyi idarəçilik, Zülfüqar İsgəndərov və digər vəzifə sahibləri tərəfindən belə bir formada həyata keçirilir. Məqsəd nədir ki, sahibkara “qara yaxılır?” Bundan əlavə, rayon rəhbərliyi Oqtay Qaraoğluna qara yaxmaqdan da ehtiyat etmir. Məsələn, o, “Gündəm Xəbər”in əməkdaşına bildirib ki, “mən problemimin həlli bağlı yuxarı instansiyalara müraciət edirəm, yuxarı instansiyalar da tədbir görülməsi üçün müraciətlərimi Gədəbəy rayon İcra Hakimiyyətinə göndərirlər. Bu zaman hansı tədbir görüldü deyə, verilən cavab məktubunda yazırlar ki, “Oqtay Qaraoğlu müxalifətçidir və özü də xəstədir”. Çox maraqlı və gülüncdoğuran cavab olur ki, bunun da heç bir hüquqi əsası yoxdur. Çünki, əldə etdiyimiz məlumata görə o, heç bir siyasi qurumun üzvü deyil və sağlamlıq durumunda da ciddi problemi yoxdur. Belə bir addımın atılması bir daha onu söyləməyə əsas verir ki, Gədəbəy rayon İcra Hakimiyyətinin başçısı çoxsaylı sahibkarların, o cümlədən Oqtay Qaraoğlunun problemini həll etmək əvəzinə, onu “şantaj” etməkdən belə çəkinmir. Ölkə rəhbərinin sahibkarlarla bağlı tapşırığı necə yerinə yetirilir? Diqqəti o hal da cəlb edir ki, ölkə rəhbəri cənab İlham Əliyev bir neçə gün bundan əvvəl də, keçirdiyi müşavirədə bir daha büdcə vəsaitlərinin israf edilməsinin qarşısının alınması, maliyyə və iqtisadi sahədə şəffaflığın tam təmin edilməsi, sahibkarlığın inkişafına mane olan inhisarçılıq, sahibkarlıq fəaliyyəti subyektlərinin dövlət qurumları tərəfindən qanunsuz yoxlanılması və çoxsaylı əsassız lisenziyaların verilməsi, sahibkarlar qarşısında qanunazidd tələblərin irəli sürülməsi və.s kimi neqativ halların aradan qaldırılması istiqamətində, mübarizə tədbirlərinin gücləndirilməsi üçün lazımi tapşırıqlarını da verdi. Hətta, o, sahibkarların üz-üzə qaldıqları problemlərin həllində, onlara yaradılan süni maneələrin aradan qaldırılması üçün, yerli vəzifə sahiblərinə müvafiq addımlar atmalarını da tapşırdı. Amma verilmiş tapşırıqlara baxmayaraq, Gədəbəy rayon İcra Hakimiyyətinin başçısı Ramiz Yediyarov heç nəyə məhəl qoymur, necə deyərlər, verilmiş tapşırıqları bu gün də qulaqardına vurmaqla məşğul olur. Belə bir səbəblər üzündəndir ki, təkcə sahibkarlarla bağlı deyil, sıravi sakinlərlə də bağlı problemlərin həddi-hüdudu yoxdur. Yəni, rayonun mərkəzi ərazilərində, ucqar kəndlərində sosial problemlər tüğyan edir, vətəndaş narazılığı günü-gündən artmağa başlayır. Büdcədən müxtəlif məqsədlər üçün vəsaitlər ayrılır, amma təyinatı üzrə istifadə olunmur. Belə bir halların yaşanması da, Gədəbəydə hökm sürən sosial ədalətsizlik mühitinin varlığını göstərir. PA-sı səlahiyyətlisinin vədi, problemin həllinə kömək etmədi Adicə bir məqama da toxunaq ki, bir neçə gün bundan əvvəl Oqtay Qaraoğlu və digər sahibkarlar üzləşdikləri problemlərinin həlli naminə təkrar Prezident Administrasiyasının qəbul şöbəsində də olurlar. Şöbənin əməkdaşı şikayətçi sahibkarlara bildirir ki, “rayon rəhbərliyinə tapşırıq verilib, o, sizi qəbul edəcək və üzləşdiyiniz problem həllini də tapacaq”. Neçə illərdir ki, Gədəbəylə Prezident Administrasiyası arasında qalan sahibkarlar, bu dəfə də verilən məsləhətə qulaq asıb Gədəbəyə getməli olurlar. Bu zaman nələr baş verir, nələr dəyişir? Əslinə baxsan heçnə!? Yalnız dəyişən o olur ki, əgər əvvəllər şikayətçi sahibkarlar icra hakimiyyətində müavin səviyyəsində qəbul olunurdularsa, bu dəfə onları Ramiz Yediyarovun özü qəbul edir. Düzdür, ümumi görüş baş tutur, amma sahibkarların problemlərinin həlli istiqamətində ümidverici addımlar atılmır. Bu da onu söyləməyə əsas verir ki, verilən vəd, heç də əvvəlki vədlərdən fərqlənməyəcək. Namiq Məmmədovun qüdrəti, yaxud da təsir gücünün imkanları Gədəbəyin əsas fiqurlarından biri hesab olunan və bu gün rayonun maliyyə idarəsinə rəhbərlik edən Namiq Məmmədov olduqca qüdrətli, təsir gücü isə yetərli olan vəzifə sahibidir. Əslinə baxsan bu cür yanaşmamızı ortaya qoymaqla, biz heç də yanılmırıq. Çünki, “Gündəm Xəbər”in ötən saylarında silsilə açıqlamaları geniş ictimaiyyətin diqqətinə də çatdırmışdıq ki,bu şəxs Gədəbəydə əsas söz sahibidir. Yəni, kimin hansı vəzifəni daşıması, kimin daşıdığı vəzifəsinə “əlvida vəzifə” deməsində, onun rolu olduqca təsirli olur. Namiq Məmmədovun belə bir təsir gücünə malik olmasının kökündə, həm uzun müddətdən bəri maliyyə idarəsinə rəhbərlik etməsi, kifayət qədər var-dövlətə sahib olması, həm də tabe olduğu nazirlikdə söz sahibi olan şəxslərlə sıx bağlılığının da olmasıdır. “Maliyyənin şefi” qohum-əqrəbasını hansı yollarla imkanlı edir? Məsələn, adicə bir məqama toxunaq ki, rayonun Saratovka kəndinə aid bir çox problemlərin həlli naminə büdcədən ayrılan vəsaitlər, ötən ilin noyabr ayında elə mənimsənilib ki, nə izi, nə də ki, tozu qalıb. Bundan əlavə, həmin kənddə uşaq bağçası olduğu halda, yeni bir uşaq bağçasının tikintisinə də qərar verilir. Tikintisi davam etdirilən uşaq bağçasının ərazisi başqa bir şəxsə məxsus olduğu halda, həmin ərazi qeyri-qanuni yolla zəbt edilir və tikinti işlərini aparmaq Namiq Məmmədovun yaxın qohumu Məmmədov Qoşqar Oqtay oğluna həvalə olunur. Hələ bu azmış kimi, rayonun Samanlıq, Qoşabulaq kənd orta məktəblərinin, MRX-na aid tikinti işlərinin aparılması də, Qoşqar Məmmədova tapşırılır. Baxmayaraq ki, aparılacaq tikinti işləri ilə bağlı tender keçirilir və tenderdə başqa bir şəxs qalib gəlsə də, son anda tikinti işlərini aparmaq Namiq Məmmədovun qohumuna nəsib olur. Bu haqda “Gündəm Xəbər”ə məlumatı çatdıran mənbə bildirir ki, tikinti işlərinin Qoşqar Məmmədova verilməsinin də, bir çox özəl səbəbləri var. Yəni, Namiq Məmmədovun maliyyə nazirliyinin əsas fiqurlarından biri olan Azər Bayramovla qurduğu işbirliyi, bir çox məsələlərin həllində olduğu kimi, belə bir məsələlərdə də əsas rol oynayır. Araşdırmamız davam edəcək. Bizi izləyin.

gundemxeber.az