Bərdəli sahibkar nəyi tələb edir? Əksər vəzifə sahiblərinin daşıdıqları vəzifələrindən ikiəlli yapışmalarına, çox zaman isə, sadə insanların başına minbir oyun açmalarına dəfələrlə rast gəlmişik. Bu sırada vaxtilə prezidentin köməkçisi vəzifəsini daşımış Tariyel Ağayevin də adı, zaman-zaman belə qalmaqallı hadisələrdə hallanan şəxslərdən biri olub. Bir neçə gün bundan öncə Fikrət Cəbrayıl adlı şəxs redaksiyamıza təşrif buyuraraq bildirdi ki, “vaxtilə Tariyel Ağayev daşıdığı vəzifəsindən sui-istifadə etməklə, Bərdədə təqribən 1500 mağazanı mərkəzi bazara yaxın ərazilərdən, daha dəqiq desəm “Koroğlu”, “Nizami” və “Bakı” küçələrindən təmizlədi. O, həmin vaxt polisin və ağır texnikanın gücündən istifadə etməklə, qeyd olunan sayda mağazaları darmadağın etdirdi. Taryel Ağayev atdığı belə bir addımı ilə, həmin vaxtdan bu günə kimi təqribən 7500 nəfər sahibkarı işsiz qoydu və bir kimsənin də kompensasiyasını ödəmədi. Orta hesabla götürsək ki, hər mağazada 5 nəfər işçi çalışıb ailəsinin dolanışığını təmin edirdisə, onun atdığı addım nəticəsində, ən azından 45-50 min insan çörək üzünə möhtac qaldı. Sual oluna bilər ki, Tariyel müəllimi nə vadar etdi ki, təqribən 1500 mağazanı darmadağın etdirdi. O da hər kəsə bəllidir ki, mişar daşı ilə tikilən tikili, qanunvericiliyə görə məhkəmə qərarı olmadan sökülə bilməz. Amma, Taryel müəllim qanunun belə bir tələbinə məhəl qoymadı və biz sahibkarların dolanışığını kəsdirdi. Hələ bunlar azmış kimi, o, kənd sakinlərinə məxsus torpaqları da zor gücünə ələ keçirərək özü üçün bazar tikdirib. Tariyel müəllim daim mənə söz verir ki, “sən mətbuatda belə bir məsələləri işıqlandırma, mən sənin mağazanı tikdirib verəcəyəm” deyir. Amma, onun vədi hələ ki, vəd olaraq qalır. Məni bu gün də düşündürən odur ki, görəsən Tariyel Ağayev hal-hazırda sözünün üstündə dururmu? Yoxsa onun vədi, “dəvənin quyruğu yerə dəyəndə, yaxud da qum göyərəndə” məsələsinə oxşayır”. Fikrət Cəbrayıl onu da vurğulayır ki, “mən ömrümün ahıl çağlarına çatmışam. Bu günə kimi o da mənə məlum deyil ki, dünyanın hansısa ölkəsində president köməkçisi vəzifəsini daşımış şəxs, heç bir məhkəmə qərarı olmadan mişar daşı ilə tikilmiş tiklini darmadağın etdirsin və 45-50 min insanı da çörək üzünə möhtac qoysun. Əgər belə bir prezident köməkçisi vəzifəsini daşımış şəxs tanıyırsınızsa, yaxud da belə bir dövlət haqda məlumatınız varsa, o halda məni də məlumatlandırın” deyir.

“Gündəm Xəbər”