"28 May" metrostansiyasındakı yeraltı ticarət mərkəzində icarə əsasında mağaza işlədən Xaliq Nurullayev sahibkarlıq fəaliyyətinə maneçilik törədilməsi və təzyiqlərə məruz qaldığı barədə bizimyol.info-a müraciət edib.

O bildirir ki, şəriki Nəsimi Quliyevlə birlikdə 2009-cu ildə - ticarət mərkəzi açılandan orada 34 kvadrat metrlik 52 nömrəli mağazanı icarəyə götürüb. "Ticarət mərkəzi "Röyal MMC"yə aiddir. Bizim icarəyə götürdüyümüz mağazanın sahibi isə Fərhad Hüseynov adlı şəxsdir. O, mağazanı "Röyal MMC"-dən alaraq, bizə icarəyə verib. Əvvəlcə icarə haqqı aşağı olsa da, sonradan yavaş-yavaş qaldırdılar. Biz də aybaay icarə pulunu verirdik". Şikayətçinin sözlərinə görə, 2014-cü ilin oktyabr ayınadək problemsiz işləyiblər. "Həmin vaxt artıq icarə haqqı 4600 manat idi. Bizə gəlib bildirdilər ki, bu yerdə qalmaq üçün 20 min manat əlavə pul verməliyik, aylıq icarə isə 6000 manata qalxır. Əks halda mağazanı boşaltmaq lazımdır. Biz razılaşmasaq da, təzyiqlər oldu və 2015-ci ilin avqust ayında mağazanın 17 kvadrat metrini boşaltmağa məcbur olduq. 14 kvadrat üçün isə 2300 manat icarə haqqı ödəyirdik" - deyən X.Nurullayev bildirir ki, sonradan onları tamamilə mağazadan çıxarmaq istəyirlər.

"Fərhad Hüseynovla "Röyal" MMC-nin direktor müavini olan Anar adlı şəxs bu məsələdə maraqlıdırlar. Çünki bizim yerimizə başqa icarədar gətirmək üçün əlavə "şapka" alıblar. Ona görə də deyirlər ki, guya "Röyal" MMC ilə Fərhad Hüseynov arasında bağlanmış müqavilə yanvar ayında ləğv edilib və biz təcili mağazanı boşaltmalıyıq. Yanvar ayında icarə haqlarının baha olması və qanunsuz tələblərlə bağlı bir çox mağaza sahibi bazar rəhbərliyinə şikayətə getmişdik. Öndə gedənlərdən biri də mən olmuşam. Mən onların qanunsuz tələbləri ilə bağlı aidiyyatı orqanlara da məlumat vermişəm. Bundan sonra isə işlədiyim 52 saylı mağazaya 5 fevral 2016-cı il tarixdən elektrik verilişini dayandırıblar. Fəaliyyətimizi dayandırmaq üçün bunu qəsdən etdilər və istədiklərinə nail oldular. Yəni biz faktiki fəaliyyətimizi dayandırmaq məcburiyyətində qaldıq", - deyə X.Nurullayev bildirir.

Məsələ ilə bağlı Fərhad Hüseynovla da əlaqə saxladıq. O bildirir ki, həqiqətən də, 2009-cu ildə "Röyal" MMC-dən mağaza alaraq icarəyə verib. "İl yarım bundan əvvəl onlara dedim ki, mağazanı özüm işlətmək istəyirəm. Ancaq mağazanı boşaltmadılar, mənə böyük problemlər yaratdılar. Bu problemlərə görə də şirkət mağazanı mənim əlimdən alıb. Artıq mən o mağazanın mülkiyyətçisi deyiləm. Onlara görə mən də ziyan çəkmişəm" - deyə F.Hüseynov bildirdi.

Məsələ ilə bağlı "Röyal" MMC-nin mövqeyini öyrənməyə çalışsaq da, cəhdlərimiz alınmadı.