Məhkəmə borc pul davasına görə həbs olunan gənci azadlığa buraxdı

Xuliqanlıqda təqsirli bilinən Yevlax rayon sakini, 1992-ci il təvəllüdlü İlqar Haqverdiyevin cinayət işi üzrə məhkəmə prosesi başa çatıb. İttihama görə, İlqar Haqverdiyev əvvəllər Cinayət Məcəlləsinin 330.1 (rəisin hərbi xidmət üzrə öz vəzifəsini yerinə yetirməsi ilə əlaqədar onun sağlamlığına yüngül zərər vurma və ya onu döymə), 331.2 (hərbi xidmət üzrə vəzifələrin yerinə yetirilməsi zamanı və ya belə vəzifələrin yerinə yetirilməsi ilə əlaqədar rəisin öz tabeliyində olan şəxsi, habelə tabelikdə olan şəxsin öz rəisini təhqir etmə), 332.2.1 (tabelik münasibətlərində olmayan hərbi qulluqçular arasında təkrar qarşılıqlı münasibətlərin nizamnamə qaydalarını pozma), 332.2.2-ci (tabelik münasibətlərində olmayan hərbi qulluqçular arasında iki və ya daha çox şəxs barəsində qarşılıqlı münasibətlərin nizamnamə qaydalarını pozma) maddələri ilə ittiham edilib.

Hərbi Hissədə cinayət törətdiyi üçün İlqar Haqverdiyev 2011-ci ildə Bakı Hərbi Məhkəməsində mühakimə olunub. O, məhkəmənin 27 oktyabr 2011-ci il tarixli hökmü ilə 1 il müddətinə azadlıqdan məhrum edilib.

1 il həbsxana həyatı yaşayan İlqar Haqverdiyev azadlığa çıxıb və yaşadığı Yevlax şəhərinə qayıdıb. O, Yevlax şəhərində yaşadığı iki il ərzində cinayət törətməyib. Amma sonradan həmyerlisi ilə mübahisəsi cinayətlə nəticələnib.

İlqar Haqverdiyev 10 iyul 2014-cü ildə, saat 00.05 radələrində Yevlax şəhərində yerləşən 3 saylı orta məktəbin qarşısında heç bir əsaslı səbəb olmadan Rüfət Əhmədov ilə mübahisə edib, O, Rüfət Əhmədovu nalayiq sözlərlə təhqir edib.

Bu zaman həmyerlilər arasında əlbəyaxa dava olub. Dava zamanı İlqar Haqverdiyev Rüfət Əhmədovu döyüb və üstündə gəzdirdiyi bıçaqla onun boyun nahiyəsindən vurub. Rüfət Əhmədova xəstəxanada tibbi yardım göstərilib. İlqar Haqverdiyev isə polis əməkdaşları tərəfindən həbs edilib.

İlqar Haqverdiyevə Cinayət Məcəlləsinin 221.3-cü (xuliqanlıq) maddəsi ilə ittiham verilib. Yevlax rayon Məhkəməsinin hökmü ilə İlqar Haqverdiyev 5 il müddətinə azadlıqdan məhrum edilib.

Hökmdən narazı qalan İlqar Haqverdiyev apelyasiya şikayəti verib. O, cəzasının yüngülləşdirilməsini xahiş edib. Şəki Apelyasiya Məhkəməsinin Cinayət kollegiyasının 21 yanvar 2015-ci il tarixli qərarına əsasən, İlqar Haqverdiyevin apelyasiya şikayəti təmin edilib. Onun cəzası 3 il 6 aya endirilib.

Prokurorluğun kasasiya protestinə əsasən İlqar Haqverdiyevin işinə Ali Məhkəmədə baxılıb. Ali Məhkəmənin 19 yanvar 2016-cı il tarixli qərarı ilə Şəki Apelyasiya Məhkəməsinin qərarı ləğv edilib və işin yenidən apelyasiya instansiyasında araşdırılması barədə qərar qəbul edilib. Bu dəfə apelyasiya şikayəti hakim Vidadi Qasımovun sədrlik etdiyi kollegiyada araşdırılıb.

Məhkəmədə ifadə verən İlqar Haqverdiyev ona elan olunmuş ittihamda özünü təqsirli bilib. O, bildirib ki, Rüfət Əhmədov ilə qonşudur, aralarında heç bir ədavət və düşmənçilik yoxdur: “Bir neçə il Yevlax şəhər bazarında dükanda kişi paltarı satmaqla məşğul olmuşam. Bir müddət əvvəl isə mağazanı bağlaıb və hal-hazırda heç bir yerdə işləmirəm”.

Təqsirləndirilən şəxsin sözlərinə görə, 2014-cü ilin aprel ayında Rüfət hərbi xidmətini başa vurub və evə gələndən sonra özünə əyin-baş almaq üçün dükana onun yanına gəlib: “Rüfət özü üçün 20 manat dəyərində cins şalvar götürdü. Pulun 5 manatını verdi, qalan 15 manatını isə hissə-hissə ödəyəcəyinə söz verdi. Dükanım bağlansa da, Rüfət şalvarı alandan sonra pulun qalan hissəsini verməyib”.

İlqar Haqverdiyev qeyd edib ki, bu səbəbdən iyulun 9-da Rüfətlə mübahisə edib: “Həmin gün saat 15 radələrində Rüfətə zəng vurdum və pulu istədim. Bunun üçün onunla görüşmək istədiyimi bildirdim. Rüfət isə axşam evdə olacağını dedi. Həmin gün saat 23.50 radələrində Rüfətlə Yevlax şəhər 3

saylı orta məktəbinin yanında görüşdük. Söhbət edə-edə küçə ilə gedərkən Rüfətdən pulumu istədim. Rüfət pulunun olmadığını dedi və 15 manatı verəcəyinə söz verdi. Saat 00.05 radələrində ayrılan vaxt Rüfətdən pulu verəcəyi dəqiq vaxtı soruşdum. Rüfət bildirdi ki, mənə vaxt qoyma. Bu zaman Rüfəti kənara çəkdim və yaxasından tutaraq yerə yıxdım. Bu vaxt biz ikimizdə yerə yıxıldıq. Yerdə onunla dartışdım. Bizi kənardan görən Bəhruz və adını bilmədiyim bir nəfər qaçaraq gəldilər. Onlar bizi aralaşdırdılar”.

Təqsirləndirilən şəxs bildirib ki, aralaşandan sonra Rüfətin pulu verməməsinə əsəbi olub: “Bu səbəbdən cibimdən bıçağı çıxardaraq Rüfətin boyun nahiyəsindən vurdum. Hazırda etdiyim cinayət əməlindən peşmanam”.

İlqar Haqverdiyev birinci instansiya məhkəməsinin hökmünün ləğv edilməsini, əməlinə düzgün olaraq hüquqi tövsif verilməsini istəyib. O, qeyd edib ki, əməli Cinayət Məcəlləsinin 62-ci maddəsinə uyğun qiymət verilməlidir: “Törətdiyim cinayəti səmimi etiraf etmişəm, zərər çəkmiş şəxslə barışmışam. Buna baxmayaraq, birinci instansiya məhkəməsi mənə yüngül cəza verməyib. Bundan başqa, əməlimdə Cinayət Məcəlləsənin 221.3-cü maddəsində nəzərdə tutulmuş cinayətin tərkibi yoxdur. Yetirdiyim xəsarətin dərəcəsi yüngül olduğuna görə, əməlim ən pis halda Cinayət Məcəlləsinin 128-ci maddəsi ilə tövsif edilməli idi”.

Dövlət ittihamçısı Vidadi Cabbarov apelyasiya şikayətinin təmin edilməməsini istəyib. Sonda hakimlər apelyasiya şikayəti üzrə qərar elan edib. Qərara görə, İlqar Haqverdiyevin əməli Cinayət Məcəlləsinin 128-ci maddəsinə tövsüf edilib və ona 9 ay müddətinə azadlıqdan məhrum etmə cəzası təyin edilib. Ona təyin edilmiş cəza həbsdə saxlanma müddəti ilə hesablanaraq məhkəmə zalından azadlığa buraxılıb.

gundemxeber.az