7 il cəza alan Rza Qasımov daha yüngül cəzanın verilməsi istəyini hakimlər nəzərə almadı

Ağır yol-nəqliyyat hadisəsi törətməkdə təqsirli bilinən Goranboy rayon sakini, 1950-ci il təvəllüdlü Rza Qasımovun cinayət işi üzrə məhkəmə prosesi başa çatıb.

İttihama görə, Rza Qasımov 24 yanvar 2015-ci il tarixdə saat 21 radələrində yol hərəkəti qaydasını pozub. O, içkili vəziyyədə özünə məxsus “Mercedes Benz-230” markalı avtomobili idarə edib.

Rza Qasımov Samux-Gəncə avtomobil yolu ilə Gəncə şəhəri istiqamətində hərəkətdə olarkən, həmin yolun Samux rayonu Qarayeri qəsəbəsindən keçən 1-ci kilometrliyində yolun kənarı ilə gedən piyada Bayram Qasımovu vurub. Piyada aldığı xəsarətdən hadisə yerində ölüb.

Ağır qəzanı törədən Rza Qasımov daha sonra hadisə yerindən qaçıb. Rza Qasımov hüquq-müafizə orqanları əməkdaşları tərəfindən keçirilən əməliyyat zamanı həbs olunub.

Rza Qasımov Cinayət Məcəlləsinin 263-1.3 (yol hərəkəti qaydalarını sərxoş vəziyyətdə pozma, ehtiyatsızlıqdan iki və ya daha artıq şəxsin ölümünə səbəb olduqda) və 264-cü (yol nəqliyyat hadisəsi yerindən qaçma) maddələri ilə ittiham edilib.

Gəncə Ağır Cinayətlər Məhkəməsinin hökmü ilə Rza Qasımov 7 il müddətinə azadlıqdan məhrum edilib. Hökmdən narazı qalan Rza Qasımov apelyasiya şikayəti verib. O, Cinayət

Məcəlləsinin 264-cü maddəsi ilə verilmiş ittiham üzrə bəraət verilməsini, Cinayət Məcəlləsinin 263-1.3-cü maddəsi ilə təqsirli bilinib və barəsində Cinayət Məcəlləsinin 62-ci maddəsi tətbiq edilməklə həmin maddənin sanksiyası daxilində müəyyən edilmiş cəzadan daha yüngül 2 il nəqliyyat vasitələrini idarə etmə hüququndan məhrum edilməklə 2 il müddətinə azadlıqdan məhrum etmə cəzasının təyin edilməsini xahiş edib.

Onun şikayəti araşdırılması üçün Gəncə Apelyasiya məhkəməsinə göndərilib. Apelyasiya şikayəti hakim Fikrət Əliyevin sədrlik etdiyi kollegiyada araşdırılıb.

Rza Qasımov bildirib ki, Samux rayon Polis şöbəsinin istintaq bölməsi tərəfindən 1-ci qrup gözdən əlil, ağır formalı şəkər xəstəliyindən əziyyət çəkməsi nəzərə alınmayıb: “65 yaşımda Cinayət Məcəlləsinin 263-1.3 və 264-cü maddələri ilə təqsirli bilinmişəm və barəmdə toplanmış cinayət işi tamamlanaraq ittiham aktı ilə birlikdə məhkəməyə verilib. Ondan ötrü ki, 24 yanvar 2015-ci il tarixdə qonaq olduğum Samux rayon Alabaşlı kəndində yaşayan bacım oğlu Faiq Quliyevin evindən saat 21.00 radələrində çıxıb və özümə məxsus olan “Mercedes-Benz” markalı avtomobillə Samux-Gəncə avtomobil yolu ilə Gəncə şəhəri istiqamətində hərəkətdə olmuşam. Samux rayonunun Qarayeri qəsəbəsinin çıxacağında yerləşən yanacaq doldurma məntəqəsinin təxminən 150-200 mert keçdikdən sonra taqqıltı səsi eşitmişəm. Nəticədə avtomobilimin alın şüşəsinin sağ tərəfi çatlayıb və nə baş verməsini görməmişəm, nə də hiss etməmişəm. Buna görə də avtomaşınla hərəkətimi davam etdirərək təxminən bir kilometr

hərəkət etdim. Sonra şəkərim qalxdığından idarəetməni itirərək avtomobili yolun qırağındakı ağacların arasına sürdüm və orada şumluğa düşdüm”.

Təqsirləndirilən şəxsin sözlərinə görə, şəkəri qalxdığından hərəkət edə bilməyib və maşında hərəkətsiz olub: “Sonra tanımadığım avtomobil sürücüsü yolun kənarında maşınını saxlayıb və mənəyaxınlaşaraq nə baş verdiyini soruşdu. Ona şəkərim qalxdığını dedim və məni evimə aparmağı ondan xahiş etdim. O da avtomaşınını idarə edərək məni evimə apardı. Evə çatdıqdan təxminən yarım saat sonra Samux rayon polis şöbəsinin işçiləri evimə gəldilər və həmin qəzanı törətdiyimi bildirdilər”.

Rza Qasımov bildirib ki, hadisə nəticəsində də yolun kənarı ilə hərəkət edən Bayram Qasımovu avtomobillə vurmuşam: “Törətdiyim cinayət hadisəsi nəticəsində Bayram Qasımov hadisə yerində ölüb. Məhkəmə təqsirləndirildiyim həmin cinayət işinə baxıb və mənə həddindən artıq ağır cəza təyin edib. Cəza həddindən artıq ağır olmaqla ədalətə və qanuna tamamilə ziddir. Qanuna ziddir ona görə ki, məhkəmə istintaq orqanının mənə verdiyi Cinayət Məcəlləsinin 264-cü maddəsi ilə olan ittiham üzrə təqsiri olmadığı barədə bəraət verməli olduğu halda, həmin maddə ilə bəraət verməyib. Eləcə də Cinayət Məcəlləsinin 263-1.3-cü maddəsi ilə cəza təyin edərək, 1-ci qrup gözdən əlil olmağımı, ağır formada şəkər-diabet xəstəsi olmadığımı, yaşının 60-dan yuxarı olduğunu, cinayətini səmimi etiraf etməyimi, zərərçəkmiş şəxsin hüquqi varisinin şikayətçi olmadığını nəzərə almayıb. Bunların nəzərə alınaraq hökmün ləğv edilməsini xahiş edirəm”.

Rza Qasımov qeyd edib ki, cinayət hadisəsini qismən etiraf etsə də, özünü Cinayət Məcəlləsinin 264-cü maddəsi ilə təqsirli bilmir: “Həmin ittihamı tamamilə qəbul etmirəm. Hadisəni törədərkən həmin anda mərhum Bayram Qasımovu yolun kənarında görməmişəm. Çünki həmin vaxt hava qaranlıq olub və maşınla onu vurduğumu görməmişəm. Görsəydim mütləq ona yardım edərdim. Yalnız Samux rayon polis şöbəsinin əməkdaşları evimə gələrək hadisə törətdiyimi bildirdikdən sonra bilmişəm ki, avtonəqliyyat hadisəsi törətmişəm, nəticədə də Bayram Qasımov hadisə yerində ölüb”.

Rza Qasımov bildirib ki, Konstitusiyaya və digər qanunvericilik aktlarının tələbinə əsasən hümanist addımlar atmaq təkcə prezidentə aid deyil: “Eləcə də ölkə rəhbərinin vəzifəyə təyin etdiyi hakimlərə məxsusdur. Məhkəmənin hökmü çıxarılarkən maddi və prossesual hüquq normalarının pozuntusuna da yol verilib”.

Apelyasiya şikayətinin dəlillərini araşdıran hakim heyəti sonda qərar elan edib. Qərara görə, Rza Qasımovun apelyasiya şikayəti təmin edilməyib.

gundemxeber.az