Bu gün “çekistlərlə” bağlı mətbuatda gedən yazılar və eyni zamanda həmin yazılarda oxuculara təqdim olunan məlumatların filtirasiyaya məruz qalması içtimayyət tərəfindən bir mənalı şəkildə qəbul olunmur. Əksər yazıların “qətl, adam oğurluğu və ya işgəncə, hədə-qorxu, şantajla vəzifəli şəxslərin, iş adamlarının pulunu, əmlakını alıb, bəzilərini müflis edib, hətta intihara məcbur buraxma” kimi manşetə layiq başlıqları olmasına baxmayaraq, yazıların əksəriyyətinin məzmununda oxucu demək olar ciddi bir məlumata təsadüf etmir. Belə bir nəticə çıxartmaq olar ki, “mətbuat” oxucuya əslində heç bir məlumat vermədən, sabiq “çekistlərin” cinayətkar obrazlarını yaratmağa çalışır, şuurlara onların nə qədər qəddar olmalarını həkk etməyə cəhd göstərir. İş burasındadır ki, həqiqətəndə bu cinayətlər baş verib və bu neqativ hallar barəsində bu gün, deyil, heç dünən də deyil, hələ 2012-2013-cü illərdə dəfələrlə vurğulanıb, mətbuatda dərc olunub. Maraqlısı budur ki, bu gün ciddi detallar göstərilməməklə 21 “çekist” həbs olunur, hər kəs onların dəhşətli cinayətlərdə əllərinin olmasını mətbuatdan bilir, lakin onların törətdikləri cinayyətlərin mahiyətinə, incəliklərinə dair heç kimin zərrə qədər olsun belə məlumatı yoxdur. Əgər bir neçə mahiyətinə görə ciddi olmayan ittihamları nəzərə almasaq. San ki, o cinayətlər içtimailəşdirilir ki, içtimayyət həbs olunanlardan qırağa, bu gündə kənarda rahat oturub mahmudovların, çovdarovların iplərini əllərində saxlayanları tanımasın, onlara nifrət bəsləməsin. Xatırlayırsınızsa tarix təkrarlanır. Bir vaxtlar Hacı Məmmədovun törətdiyi cinayətlərin uzun müddət məsul şəxslərin diqqətindən kənarda qalmasından gileylənirdik, bir nəticə çıxarılmadı, indi də artıq 15 il nəzarətsiz qalmış yeni cinayətkar şəbəkənin mövcudluğunu nəhayət ki etiraf etdik, lakin heç bir zəmanət yoxdur ki, başqa bir şəbəkə hal hazırda iş başnda deyil və yaxudda ən pis halda bir neçə ildən sonra digər bir şəbəkənin cinayətləri üzə çıxmayacaq.
Zəmanət demişkən. Hansı zəmanətdən söhbət gedə bilər ki, bu gün ağır cinayətlərdə ittiham olunan “çekistlərin” istintaqının gedişatında məntiqsizlik özünü bürüzə verir. Artıq bir neçə aydır ki, yüksək rütbəli zabitlər, nazir müavinləri dəmir barmaqlıqlar arxasındadırlar və onların istintaqları aparılır. Bəzilərinin barəsində cinayət işləri qaldırılır, bəziləri hələ ki, nəzarət altında olmaqlarına baxmayaraq hələ bu “şərəfə” nail omayıblar, bəziləri ümumiyyətlə evlərində rahat oturublar və özlərini elə aparırlar ki, güya mahmudovlara, çovdarovlara qarşı allergiyaları olub. Bütün bunları haradasa həzm etmək olar, o səbəbdən ki, birisinin çox güman ki, “xüsusi xidmətləri” olub, digərinin kiminləsə yaxın qohumluğu var və s. Bəs ayıb olmasın soruşmaq, bu həbs olunan 21 yüksək rütbəli şəxslər (bunların arasında general, polkovnik, nazir müavini, idarə rəisi var) özlərimi şəxsən insanlara işgəncə verirdilər, hədə-qorxu gəlirdilər, şantaj edirdilər, qətlə yetirirdilər, oğurlayırdılar və yaxud ayrı ayrı obyektlərdə dinləyici qurğular yerləşdirib hədəflərini dinləyirdilər, yoxsa bütün bunlar üçün xüsusi seçilmiş aşağı rütbəli əməkdaşlar fəaliyyət göstərib ? Necə düşünürsünüz ? Bir anlıq təsəvvür edin ki, hər hansı bir təhlükəsizlik generalı və ya polkovniki özü şəxsən şəxsi avtomaşınında kimlərisə oğurlayır, qandalladığı şəxsi xidməti otağına gətirir, orada özü şəxsən ona işgəncə verir, qətlə yetirir, bundan sonra ayrı ayrı obyektlərdə dinləyici qurğular yerləşdirir, məhkəmə salonlarına gedib, hakimlərin əvəzinə qanunsuz qərarlar çıxardır, gecələr yatmayıb bəzi mətbu orqanlar üçün palaz-palaz məqalələr yazır. Hanı əlahəzrət məntiq ? Məntiqlə əgər tam obyektiv istintaq aparılıarsa, istintaqı aparılan 21 yüksək rütbəli “çekistin” hər birinin tapşırıqlarını yerinə yetirən əlavə iki əməkdaş müəyyən edilərsə, o zaman həbs olunanların sayı 21 deyil 60 (altmış) dan artıq olmalıdır. Odur ki, düzgün mülahizə yürütmək mədəniyyəti bizə hər hansı bir zəmanətdən danışmağa imkan vermir.

gundemxeber.az