“Bir çox üzdəniraq bürokratların arxasında yüksək
çinli məmurlar durur, əks təqdirdə onlar belə
arxayınlıqla istədikləri kimi davranmazdılar”

Bakı şəhər Naxçıvanski küçəsi 45-ci binanın sakinləri adından redaksiyamıza məktub göndərilib. Həmin ünvanda 25-ci mənzildə yaşayan Cəfərov Saleh Kazım oğlu üzləşdikləri qanunsuzluqlardan və məmur özbaşınalığından tazır. O bildirir ki, Nizami rayon icra hakimiyyəti işçilərinin və 26 saylı mənzil istismar sahəsinin rəisi Balayev Rasimin yarıtmaz fəaliyyətindən dəfələrlə şikayət etsək də, heç bir tədbir görülməmişdir. Şikayət məktubları yenidən baxılmaq üçün, mənzil təsərrüfatı idarəsinə göndərilmişdir ki, burada da məktublar işçilərin ironiyası ilə qarşılanmışdır: “Ərizələrdə sakinlərin imzası və ünvanları aydın şəkildə verildiyi halda işçilərdən biri -“Niyə anonim ərizə yazırsınız?”deyə soruşdu. Bu sual məni çox təəccübləndirdi və işçinin savadsızlığını bir daha sübut etdi.
İstər İcra hakimiyyətində ərizəmizə cavabdeh olan Babək Tatlıyev( Süleyman Tatlıyevin qardaşı oğlu), istərsə də mənzil istismar sahəsində rəis olan Rasim Balayev(Bakı şəhər İH-nin başçısı Hacıbala Abutalıbovun qohumu) bu vəzifəyə öz savadının, qabiliyyətinin hesabına yiyələnməyib. Deməli, nə qədər ki, vəzifədə olan qohumlarının hesabına vəzifə sahibi olanlar var, bütün problemlərimizə də belə barmaqarası baxacaqlar. Bunun harası demokratiyadır? Monarxiya, anarxiya desək daha düzgün olar.
B.Tatlıyevin və R. Balayevin özbaşınalıqlarını müxtəlif mətbuat orqanlarında ifşa etdikdən sonra, mənə qarşı təzyiqlərə başlanıldı. Evimin qarşısına mütəmadi olaraq ifrazat tökürdülər. Binanın damında olan antennam qırılaraq kənara atıldı, kabeli isə aparıb elə yerə kubikin altına qoymuşdular ki, gedib götürəndə yıxılım, yaxud da kabeli çəksəm başıma kubik düşsün. Qarabağ müharibəsi içtirakçısı kimi, aldığım travma nəticəsində sağlamlığımın yerində olmaması onlara da məlum idi. Balkonumun altını qeyri-qanuni olaraq mənzilə ehtiyacı olmayan bir nəfərə ev tikmək üçün satırlar. Bununla da hələ sovet dövründə 300 manat xərc çəkib paltar asmağa düzəltdiyim yerdən də məhrum oluram. Balkonumda yeşiyin içərisində 2 üçkiloqramlıq, bir neçə kiloqramlıq bankalarda zoğal, qarağat, əncir və s. mürəbbələr var idi ki, bir də baxıb gördüm ki, yeşiklə birgə yoxa çıxıb.
Bütün bu neqativ hadisələrdən sonra Nizami rayon 24-cü polis bölməsinə, Nizami rayon prokurorluğuna, Bakı şəhər Baş polis idarəsinə dəfələrlə yazılı ərizə ilə müraciət etmişəm. Lakin heç bir nəticə verməyib. Nizami rayon 24-cü polis bölməsində şikayət özünü doğrultmadığı üçün işə xitam verilmişdir. Həyətimizdə blokların düz qarşısında iri və hündür gövdəli qurumaq üzrə olan 4 qovaq ağacı var. Bir neçə il bundan əvvəl onlardan biri gecə yarısı küləyə dözməyib yıxıldı və sakinlərin birinin “Jiquli” markalı maşınını yarıtmaz hala saldı. Hələ yaxşı ki, bu hadisə gecə baş vermişdi, yoxsa insan tələfatı da ola bilərdi. Bir neçə dəfə bu barədə də Nizami rayon İK-nə məlumat verdik. Bir nəticəsi olmadı. Məcbur olub Şəhər Yaşıllaşdırma idarəsinin Ekspertiza şöbəsinə ərizə yazdıq. 2010-cu ildə idarənin məsul işçisi vəziyyəti yerində yoxlayaraq ağacların qurumuş hissələrinin kəsilməsi barədə yazılı rəy verdi. Rəyi Nizami rayon İcra Hakimiyyəti başçısı Tahir Budaqova təqdim edərkən, o, ərizənin icrasını İcra Hakimiyyətinin işçisi Babək Tatlıyevə tapşırdı. Ümidlərimiz isə nəticəsiz qaldı. Hətta ərazimizin deputatı ilə görüşümüz də bir nəticə vermədi.
Binamızın sakinləri çirkli əşyalarını, maşınlarını binanın qarşısında yuyaraq çirkli suları ətrafa tökürlər. Bu da xəstəlik yaradan səbəblərdəndir. Hansı ki, əvvəllər bu işlər üçün həyətimizdə xüsusi yer vardı və çirkli sular birbaşa kanalizasiyaya axıdılırdı. Lakin bu yer Nizami rayon İH və 26 saylı mənzil istismar sahəsinin rəisi tərəfindən satıldı. İcra hakimiyyətinə dəfələrlə müraciətimizə baxmayaraq həyətimizdə baş alıb gedən bu anti-sanitariyaya qarşı heç bir tədbir görülmədi. Çirkli əşyaların yuyulması üçün yer ayrılmadı. Babək Tatlıyevin sözlərinə görə tiksək də gəlib sökəcəklərmiş.
2012-ci ilin iyul ayının 16-da binamızın sakinlərinin xahişi ilə Prezident aparatına şikayətə getdim. Avqust ayının 16-a qəbula yazıldım. Prezident Aparatı Yerli Orqanlarla iş şöbəsində Tağı Zeynalın qəbulunda oldum. Tağı müəllim dəfələrlə məni başa düşmədiyini söyləyirdi. Qəribədir, 45 il dərs deyən , 30 il mühazirə oxuyan bir şəxsi Tağı Zeynal başa düşmür. 8 il Qarabağ müharibəsində kəşfiyyatçı kimi fəaliyyət göstərmişəm, döyüşərək sağlamlığımı itirmiş, 2-ci dərəcəli əlil olmuşam. İxtisasca isə tarixçiyəm. Bütün bunlardan sonra mənə bir daha məlum oldu ki, bir çox üzdəniraq bürokratların arxasında yüksək çinli məmurlar durur.Əks təqdirdə onlar belə arxayınlıqla istədikləri kimi davranmazdılar. Rüşvətxor məmurların ifşa olunması istiqamətində atılan addımlar məni qane etmir. Əgər yerlərdə rüşvətxor məmurlar iqtisadi islahatların aparılmasına imkan yaratmırsa, onda bizim heç bir planımız, proqramımız həyatda öz əksini tapmaz. Qəbul olunmuş qərarlar yerlərdə icra edilməlidir və bu qərarların düzgün icrasına əhali nəzarət etməlidir.”