İcra başçısından deputat Adil Əliyevə şikayət edildi

gundemxeber.az Təxminən, bir ay öncə Nərimanov rayonunda yaşayan bir qrup vətəndaşdan daxil olan şikayəti yayımlamışdıq. Bildirmişdik ki, qışın gəlməsinə rəğmən hələ də yaşadıqları binaların istilik sistemləri aktivləşdirilməyən sakinlər bununla bağlı rayonun icra başçısı Abdin Fərzəliyevə müraciət ediblər. Lakin problem həll edilməyib. Bundan sonra sakinlər problemləri ilə bağlı ölkə başçısı İlham Əliyevə məktub ünvanlamış, ondan kömək istəmişdilər.
Ancaq bu gün redaksiyamıza daxil olan yeni məlumatdan belə anlaşılır ki, həmin sakinlərin istilik problemləri hələ də həll edilməmiş olaraq qalır. Belə ki, rayonun Aşıq Alı küçəsi, bina 7/19 sakinləri redaksiyamıza yazdıqları şikayətdə soyuqdan donmaq üzrə olduqlarını bildirirlər. Sakinlərin yazdığına görə, rayonun icra başçısı A.Fərzəliyev dövlət başçısı İlham Əliyevə şikayət məktubu yazdıqları üçün onlara hətta ultimatum göndərib və bildirib ki, bu hərəkətlərinin cəzasını çəkəcəklər. Məktubda qeyd edilir ki, qar yağmasına, şaxta düşməsinə baxmayaraq, hələ də yaşadıqları binanın istilik sisteminin qoşulmamasına səbəb icra başçısının onlara qarşı qəzəblidir. A.Fərzəliyev ondan prezidentə şikayət edilməsini həzm edə bilmir və sakinləri soyuqla cəzalandırır.
Biz də redaksiyamıza şikayət daxil olandan sonra bu problemi öz qaynaqlarımızla araşdırmağa başladıq. Məlum oldu ki, Nərimanov rayonun 115 saylı MİS-in müdiri Teymur Mahmudov qeyd olunan binanın zirzəmisinə dolan suyu qurutmadığı üçün binanın istilik sistemi bərpa edilmir. Sakinlər isə bildirir ki. Binalarının zirzəməsindəki su qurudulmasa da, MİS müdiri bunun pulunu ilin əvvəlində onlardan yığıb. İddia olunur ki, rəis hətta binanın istilik sisteminin pullarını da əvvəlcədən alıb. Hətta borularda problemlər olduğu üçün sakinlərin bəzilərindən 100 AZN pul yığıb. Bununla belə, qışın bu sərt dövründə də binalarına istilik verilmir.
Əldə etdiyimiz məlumata görə, adı çəkilən MİS müdiri bütün bu işləri Nərimanov rayonu Mənzil İstismar İdarəsinin rəisi Qoşqar Məmmədova güvənərək həyata keçirir. Sakinlərdən öyrəndiyimizə görə, Q.Məmmədov adı Mİİ müdiri olsa da, rayonda oliqarx kimi yaşayır. Əslən Ordubadın Tivi kəndindən olan bu şəxsin Bakıda bir neçə villasının, xeyli sayda obyektlərinin olduğu iddia edilir.
Onun hətta Novxanıda Bakı Gömrük İdarəsinin rəisi Vüsal Novruzovla qonşuluqda böyük villasının olduğu bildirilir. Sıradan bir Mənzil İstismar İdarəsi rəisinin bu qədər sərvəti necə əldə etdiyi isə maraqlıdır. Onu da qeyd edək ki, Q.Məmmədov Nərimanovdan əvvəl, Xətai və Abşeron rayonlarında da Mənzil İstismar İdarəsinin rəisi vəzifəsində işləyib. Bir sözlə, onun bu sahədə xeyli təcrübəsi var. Xatırladaq ki, Q.Məmmədov rayonun icra başçısı A.Fərzəliyevlə çox yaxın münasibətlərə sahibdir. Bəlli ki, o, rayonda gördüyü işlərdə də icra başçısına güvənir.
Onu da bildirək ki, redaksiyamıza müraciət edən sakinlərin sözlərinə görə, onlar yaxın günlərdə Prezident Administrasiyasının qarşısında aksiya keçirəcək, problemlərinin həllini tələb edəcəklər. Sakinlərin şikayət məktubunda başqa bir maraqlı məqam da var ki, o da Ekologiya və Təbii Sərvətlər naziri Hüseynqulu Bağırovun onlarla qonşu olmasıdır. Sakinlər bizim vasitəsilə nazirə müraciət edərək bildirir ki, o, həmin binanı bəyənib yaşamasa da, qonşularının bu problemini həll etməkdə onlara yardımçı olsun. Sakinlər deyir ki, nazirin evinin olduğu blok bu il başdan aşağı təmir olunub əla vəziyyətə gətirilsə də, binanın divarları soyuqdan buz bağlayıb. Oradakı sakinlər isə donmaq üzrədirlər. Sakinlər ümid edir ki, nazir H.Bağırov öz qonşularının soyuqdan donmasına göz yummayacaq və rayonun icra başçısına problemin həlli ilə bağlı göstəriş verilməsinə nail olacaq.
Sakinlər həmçinin, bizim vasitəmizlə Nərimanov rayonundan deputat seçilən Adil Əliyevə də müraciət ediblər. Onlar bildirir ki, 2010-cu il parlament seçkilərində yaşadıqları binanın bütün sakinləri Adil Əliyevə səs verib. İndi də ondan adi bir problemlərinin həll edilməsini umurlar. Onlar deyir ki, belə getsə, A.Əliyevin 2015-ci ildə onlardan səs istəməyə heç bir haqqı olmayacaq. Çünki bu gedişlə, o binadan nəinki 2015-ci ilə, heç gələn qışa da sağ adam çıxmayacaq. Soyuqdan donacaqlar.

Rasim Əliyev