Zaqatala rayonunda iki tanışın arasında yaranan mübahisə cinayətlə nəticələndi

Zaqatala rayonunun Dağlı kəndində yaşayan 1980-ci il təvəllüdlü Möhübbət Əliyevin cinayət işi üzrə məhkəmə prosesi başa çatıb. İttihama görə, Möhübbət Əliyev 12 aprel 2015-ci il tarixdə, saat 19 radələrində sərxoş vəziyyətdə Zaqatala şəhəri, Çingiz Atalov küçəsində yerləşən kafedə olarkən sonradan oraya gələn Samir Xəlilovdan ona pivə almasını tələb edib.

Samir Xəlilov Möhübbətə pulunun olmadığını bildirib. Bu zaman Möhübbət ona pivə almamasını bəhanə gətirərək heç bir əsaslı səbəb olmadan Samir ilə mübahisə etməyə başlayıb. Kafenin sahibi onların hər ikisini çölə çıxardıb.

Möhübbət Əliyev həmin küçədəki “Soliton” mağazasının yaxınlığında qanuna zidd hərəkətlərini davam etdirib və Samir Xəlilovun ünvanına uca səslə nalayiq söyüşlər söyüb. O, həmçinin səs küy salmaqla ictimai asayişi pozub. Möhübbət Əliyev həmin yerdə 30 dəqiqə ərzində dava edib. Dava zamanı o, Samir Xəlilovu döyərək xəsarət yetirib.

Istintaq orqanı Möhübbət Əliyevi Cinayət Məcəlləsinin 221.3-cü (xuliqanlıq) maddəsi ilə ittiham edib və cinayət işi baxılması üçün Zaqatala rayon Məhkəməsinə göndərib.

Məhkəmədə işə baxan hakim Möhübbət Əliyevin ittiham olunduğu maddəni dəyişib. Hökmə əsasən, Möhübbət Əliyev Cinayət Məcəlləsinin 221.1-ci maddəsi ilə təqsirli bilinib və 1 il müddətinə azadlıqdan məhrum edilib.

Hökmdən narazı qalan Baş Prokurorluq apelyasiya protesti verib. Prokurorluq Möhübbət Əliyevin Cinayət Məcəlləsinin 221.3-cü maddəsi ilə cəzalandırılmasını istəyib.

Prokurorluğun protesti baxılması üçün Şəki Apelyasiya Məhkəməsinə göndərilib. Şikayət hakim İmanverdi Şükürovun sədrlik etdiyi kollegiyada araşdırılıb.

“Başqa masada oturmasını xahiş etdim”

Məhkəmədə ifadə verən Möhübbət Əliyev özünü qismən təqsirli bilərək göstərdi ki, Zaqatala rayonunun Dağlı kəndində ailəsi ilə birlikdə yaşayır: “Himayəmdə 3 az yaşlı uşağım var. Aprelin 12-də, saat 18 radələrində Zaqatala şəhəri Avtovağzal ərazisində yerləşən Qurban adlı şəxsin kafesinə gəldim. Kafeyə daxil olaraq oradakı masaların birində əyləşərək pivə içməyə başladım. Kafeyə daxil olanda başqa yerdə spirtli içki qəbul etdiyim üçün sərxoş olmuşdum. Təxminən 10 dəqiqədən sonra əvvəllər tanıdığım Zaqatala şəhər sakini Sadiq adlı şəxs kafeyə daxil oldu və mənimlə görüşərək oturduğum masada əyləşdi. Birlikdə söhbət etməyə başladıq”.

Təqsirləndirilən şəxsin sözlərinə görə, təxminən 5-10 dəqiqədən sonra Sadiqin qardaşı Samir içkili vəziyyətdə gələrək kafeyə daxil olub: “Samir bizimlə görüşərək söhbət etməyə başladı. Samirdən sərxoş olduğu üçün başqa masada oturmasını xahiş etdim. Həmin vaxt Samir duraraq başqa masada oturdu. O, pivə içərək mənə qarşı kobud sözlər işlətməyə başladı. Sonra Sadiq qardaşı Samirin sərxoş olmasını hiss edərək onun kafedən çölə çıxmasını xahiş etdi. Samir çölə çıxmayaraq mənimlə mübahisə etməyə başladı”.

“Lezva ilə qollarımı kəsmişəm”

Möhübbət Əliyevin sözlərinə görə, həmin vaxt Samirlə birlikdə kafedən çölə çıxıblar: “Hər ikimiz kafenin qarşısına çıxdıqda bir birimiz ilə tutaşmağa başladıq. Samirin qardaşı Sadiq gələrək bizi ayırdı. Sonra hər ikimiz kafedə pivə içməyə başladıq. Pivə içdikdən sonra kafedən çıxdım. Yaşadığım evə getmək istəyərkən kafenin qarşısında Samir arxadan sifət nahiyəmə yumruqla vurdu. Bu səbəbdən yumruqla Samirin üz nahiyəsinə, kəllə ilə qaş nahiyəsinə vurdum. Zərbənin təsirindən Samir yerə yıxıldı. Həmin vaxt polis əməkdaşları gələrək hər ikimizi polis şöbəsinə apardılar. Mübahisə və dava vaxtı boş pivə bakalı ilə Samirin sifət nahiyəsinə vurmamışam. Mübahisələrimiz kafenin içərisində baş versə də, davamız Zaqatala şəhəri Ç.Atalov küçəsindəki “Soliton” mağazasının qarşısında baş verib. Dava vaxtı hadisə yerinə Samirin qardaşı Sadiq və çoxlu sayda tanımadığım vətəndaşlar yığışıb. Lezva ilə qollarımı kəsərkən özümə qəsd etmək fikrim olmayıb. Əsəbiləşiyim üçün lezva ilə qollarımı kəsmişəm”.

“Məndən pivə almağımı tələb etdi”

Zərərçəkmiş Samir Xəlilovun sözlərinə görə, Zaqatala şəhəri, A.Qardaşov küçəsi ev 11 mənzil 9-da ailəsi ilə birlikdə yaşayır: “Möhübbət Əliyevi tanıyıram. Aramızda heç bir qohumluq münasibətləri və ədavətimiz yoxdur. Aprelin 12-də, saat 18 radələrində Qurban adlı şəxsin kafesinə İsmayıl adlı tanışım ilə gəldim. Birlikdə pivə içmək istəyərkən həmin kafedə olan Möhübbət adlı şəxs məndən pivə almağımı tələb etdi. Möhübbətə nəyə görə pivə almalıyam sözünü dedim. Möhübbət isə mənə qarşı söyüşlər söydü. Həmin vaxt aramızda mübahisə başladı. Kafedə

işləyən Məhəbbət və Qurban bizi kafedən çölə çıxartdılar. Möhübbət çöldə, yəni “Soliton” mağazasının qarşısında ünvanıma nalayiq söyüşlər söydü və mənimlə tutaşmaq istədi. Bu zaman Qurban və qardaşım Sadiq bizi ayırdılar. Təxminən 10 metr piyada gedərək “Ocaq” marketdən siqaret aldım. Marketdən çıxarkən Möhübbət ünvanıma yenə söyüşlər söydü. Mən Qurbanın işlədiyi kafenin giriş qapısının yanına gəldim. Biz yenidən dalaşmağa başladıq”.

“Gah bakalla, gah da daşla vurduğu barədə ifadə vermişəm”

Zərərçəkmiş qeyd edib ki, daha sonra Möhübbət yaxınlıqda olan mağazaya girib: “Möhübbət mağazadan lezva alaraq çölə çıxdı və lezva ilə qollarını kəsərək öz özünə xəsarət yetirdi. Həmin vaxt polis əməkdaşları hər ikimizi polis şöbəsinə apardılar. Orada qaş nahiyəmdən qan axdığını gördüm. Sərxoş olduğumdan Möhübbətin məni nə ilə vurduğunu görməmişəm. Buna görə də istintaq zamanı Möhübbətin məni gah bakalla, gah da daşla vurduğu barədə ifadə vermişəm”.

Prokuror: “Məhkəmə düzgün nəticəyə gəlməyib”

Dövlət ittihamçısı Vidadi Cabbarov bildirib ki, ibtidai istintaq zamanı Möhübbət Əliyev Cinayət Məcəlləsinin 221.3-cü maddəsi ilə təqsirləndirilən şəxs qismində cəlb edilib: “Buna səbəb Möhübbət Əliyev ictimai qaydanı kobud surətdə pozub, cəmiyyətə açıqca hörmətsizlik ifadə edib, silah qismində istifadə etdiyi əşyanı tətbiq etməklə vətəndaş üzərində zor tətbiq olunması ilə müşayiət olunan qərəzli hərəkətlər göstərib. Məhkəmənin hökmündən görünür ki, hökmün təsviri-əsaslandırıcı hissəsində Möhübbət

Əliyevin törətdiyi qərəzli xuliqanlıq cinayətinin törədilməsi yeri, vaxtı, üsulu, təqsirin xarakteri, törədilmə motivləri və nəticələri barədə məhkəmə tərəfindən sübuta yetirilib. Hökmün təsviri hissəsində təqsirləndirilən şəxsə ibtidai istintaq zamanı Cinayət Məcəlləsinin 221.3-cü maddəsi ilə təqsirləndirilən şəxs qismində cəlb edilərkən elan olunmuş ittihamla məzmununa görə tamamilə eynidir. Hökmdən göründüyü kimi məhkəmə Möhübbət Əliyevin ictimai qaydanı kobud surətdə pozmaqla 12 aprel 2015-ci il tarixdə saat 19 radələrində sərxoş vəziyyətdə Zaqatala şəhərindəki Çingiz Atalov küçəsində yerləşən kafedə və sonra həmin küçədəki “Soliton” mağazasının yaxınlığında Samir Xəlilovla dalaşaraq 30 dəqiqə ərzində cəmiyyətə açıqca hörmətsizlik ifadə etməklə, kafedən götürdüyü boş pivə bakalını silah qismində tətbiq edib, Samir Xəlilovun sifətinə qəsdən zərbə vurub. Bu səbəbdən ona sağlamlığın qısa müddətə pozulmasına səbəb olan, sağlamlığına yüngül zərər vurmaya aid xəsarət yetirib. Məhkəmə onun vətəndaş üzərində zor tətbiq olunması ilə müşayiət olunan qərəzli hərəkətlərlə xuliqanlıq etməsini hökmdə müəyyən edilmiş hal kimi sübuta yetirsə də, Möhübbət Əliyevə qarşı irəli sürülmüş ittihama hüquqi qiymət verərkən düzgün nəticəyə gəlməyib, Möhübbət Əliyevə Cinayət Məcəlləsinin 221.3-cü maddəsi ilə elan edilmiş ittihamla razılaşmayıb. Məhkəmə onun əməlini qanunsuz və əsassız olaraq Cinayət Məcəlləsinin 221.3-cü maddəsindən həmin Məcəllənin 221.1-ci maddəsinə tövsif edib”.

Apelyasiya şikayətinin dəlillərini araşdıran hakim heyəti sonda qərar elan edib. Qərara görə, prokurorluğun protesti təmin edilib və Zaqatala rayon Məhkəməsinin hökmü ləğv edilib.

Yeni hökmə əsasən, Möhübbət Əliyev Cinayət Məcəlləsinin 221.3-cü maddəsi ilə ittiham edilib və onun barəsində 3 il müddətinə azadlıqdan məhrum etmə cəzası təyin edilib.

gundemxeber.az