“İranlı Mühacirlər Cəmiyyəti” İctimai Birliyinin orqanı olan “Mühacir” qəzeti 19 ildən sonra fəaliyyətini bərpa edib.

Yarandığı ilk dövrdə 94 sayı çap olunan qəzet sentyabrın 3-də-Azərbaycan Demokrat Firqəsinin yarandığı gündə nəşrini bərpa edib.

19 ildən sonra çap olunan ilk sayda “İranlı Mühacirlər Cəmiyyəti”nin Azərbaycan Respublikasının Prezidenti, Azərbaycan Milli Olimpiya Komitəsinin Prezidenti Cənab İlham Əliyevə Rio-de Janeyroda Olimpiadada qazanılan uğurlara görə müraciət olunub. Ümidvarlıq bildirilib ki, bu qələbə gələn il Bakıda keçiriləcək IV İslam Həmrəylik Oyunlarında qazanılacaq uğurların təməlidir.

Qeyd edək ki, “Mühacirlər” qəzetinin baş redaktoru Rəhim Hüseynzadədir. Qəzetin ikinci səhifəsində baş redaktorun “47 il əvvəlin xatirəsi, yaxud yerin yiyəsi gəlməsəydi...” adlı yazısı bir növ 1946-cı ildən bəri Azərbaycana pənah gətirən iranlı mühacirlərin Azərbaycan Respublikasında necə doğmalıqla əhatə olunduqlarını rəmzi surətdə özündə əks etdirən publisistik yazıdır və orada xüsusilə, Heydər Əliyevin mühacirlərə doğma münasibət göstərməsi konkret faktlarla şərhini tapıb.

Qəzetdə həmçinin Seyid Cəfər Pişəvəri haqqında onun bacısının, silahdaşlarının xatirələrinin təqdimatına başlanılıb.

Dünya Azərbaycanlılarının IV Qurultayında təltif olunanlar arasında Danimarkadakı “Vətən” Cəmiyyətinin sədri, Azərbaycan Milli hökumətinin fədai başçılarından biri mayor Məmi Sadiqin oğlu Səfər Sadiqi də var.

“Danimarkaya ünvanlanan təbriklər” sərlövhəli yazıda onun “Tərəqqi” medalı ilə təltif olunduğu anlar və atasının fədai başçısı görkəmində fotoşəkilləri dərc olunub.

İlk sayda həmçinin son 71 ildən söhbət açan sənədli fotoşəkillər də yayımlanıb.

“Xoş gördük, “Mühacir”!” sərlövhəli yazıda isə 25 ildən sonra fəaliyyətini bərpa etmiş Cəmiyyətin ədəbi birliyinin sədri Tariyel Ümidin ədəbi-bədii proseslərə işıq salan cəhətlər barədə fikirləri təqdim olunub.

Qəzetin ilk sayında xalq şairləri Əli Tudə, Söhrab Tahir, görkəmli fədai, alim Əsəd Rza Yəqubinin kiçik bədii əsərlərinə yer verilib.

Qəzetin baş redaktoru Rəhim Hüseynzadə bildirdi ki, məqsədimiz heç də Azərbaycanda 70 ildə məskunlaşan mühacirlərin və onların ailə üzvlərinin keçdiyi yola, uğurlara nəzər salmaq deyil: “Biz dünyanı ağuşuna alan mühacirət probleminin reallıqlarını Azərbaycan mühacirəti konteksində oxuculara çatdırmağı özümüzə başlıca vəzifə kimi qəbul etmişik. Bu konteksdə isə digər ölkələrin görüb-götürə biləcəyi müsbət nümunələr kifayətdir”.