Redaksiyamıza Qusar rayonundan şikayət daxil olub. Şikayətçi Xocabəyzidov Şıxəli Aşur oğlu yazır ki, onun şikayəti Azərbaycan Quru Qoşunlarının Qusar rayonunda yerləşən hərbi hissəsinin sürücüsü –müddətdən artıq xidmətdə olan çavuş Rasim Əliyevdəndir: “Belə ki, bu şəxs bu ilin avqustun 23-də, saat 10:00 radələrində idarə etdiyi, hərbi hissəyə məxsus K-923-QQ dövlət nömrə nişanlı MAZ" markalı yük maşını ilə mənim idarə etdiyim və mənə məxsus olan "Mersedes-230" markalı, 27-BC-910 nömrəli avtomaşınımı arxadan vurmuş və nəticədə maşının “krelo”su zədələnmiş və “stop”u qırılmışdır. Bir sözlə, maşınıma 100 manata qədər ziyan dəymişdir. Lakin Qusar rayonunda yerləşən hərbi hissəsinin sürücüsü olan bu şəxs indiyəcən mənə dəyən zərəri ödəməyib və belə başa düşürəm ki, ödəmək fikri də yoxdur”.



Şikayətçi yazır ki, dəyən ziyan çox olmasa da, onun üçün bu məbləğ böyük əhəmiyyət kəsb edir: ”Üstəlik mənə təsir edən bu adamın günahkar ola-ola məni aldatması, telefon zənglərimə cavab verməməsi, məsələyə laqeyd olması və qətiyyən narahat olmamsıdır. Bundan başqa hadisə nəticəsində mən psixoloji sarsıntı keçirmişəm.
Hadisə zamanı mən onunla normal və mədəni surətdə danışmışmışam.
Bu hadisəsənin qısa təfsilatını danışaraq bildirim ki, qəzada mənim heç bir günahım olmayıb. Belə ki, həmin vaxt mən Bakı-Quba şossesində öz yolumla, qanunla icazə verilən sürətlə (110 km/saat) gedirdim. Yanında gizir oturan Rasim Əliyev isə yol-hərəkəti qaydalarına görə yük maşını sürücüsü kimi saatda 60-70 km sürətlə hərəkət etməli idi. Ancaq o, sağ yolla getmək əvəzinə sol yolla hərəkət edirdi, ən əsası isə mənə onu ötüb keçməyə imkan vemirdi. Mən isə vacib iş üçün Bakıya getdiyimdən tələsirdim. Mən 10 dəqiqəyəcən cürəbəcür işarələrlə - siqnalla, işıq faraları ilə ona bildirdim ki, mənə yol versin. Amma o buna heç cürə imkan vermirdi. Axırda vəziyyəti belə görüb Sitalçay körpüsünə az qalmış qərara aldım ki, özüm sağ yola keçim.Lakin bunu edərkən, o da gözlənilmədən bu yola keçdi və avtomobili ilə arxadan maşınıma çırpıldı. Qəza baş verəndən sonra o maşından düşərək məndən dönə-dönə xahiş etdi ki, polisə xəbər verməyim, bəs o dəyən ziyanı görüşüb ödəyəcək və hətta bildirdi ki, “hərbçiyəm, kişi kimi söz verirəm . Mənim yalanla aram yoxdur, narahat olma” .
Yanındakı gizir də bildirdi ki, bəs verər, Rasim də elə Xudatda qalır. Rasim dedi ki, Bakıdan hərbi hissə üçün ərzaq gətircəm, bazar və ya bazar ertəsi görüşərik, dəymiş ziyanı ödəyərəm.
Yəni o da qəbul etdi ki, günah tam onda olub. Mən də fikirləşdim ki, hadisə daha olub, bununla barışmaq lazımdı, əsas da salamatçılıqdır. Nə qarşı tərəfə, nə mənə, nə də maşınımda oturan, hadisənin şahidi olan adama heç nə olmayıb, ona görə də insaniyyət göstərərək razılaşdım, ona inandım. Lakin sonradan məlum oldu ki, o məni aldadırmış. O nəinki dediyi vaxt mənə zəng etmədi, heç mənə verdiyi möbil nömrəyə də dəfələrlə zəng etsəm də telefonu götürmədi. Hətta mən ona mesaj yazdım ki, onun xidmət etdiyi hərbi hissəyə, Müdafiə Nazirliyinə onun barəsində şikayət edəcəm, ancaq yenə də ondan heç bir reaksiya gəlmədi. Bundan sonra, onun vəd verdiyi tarixdən 1 həftə keçəndən sonra mən Qusarda həmin hərbi hissəni tapdım və ora gedib Müdafiə Nazirliyinin Quru Qoşunlarının Qusar rayonunda yerləşən hərbi hissəsinin həmin zaman növbətçisi olan İbrahimov Natiq Firudin oğlundan Rasim adlı sürücünun onlarda xidmət edib-etmədiyini soruşdum. O cavabında mənə bildirdi ki, yox, o belə adam tanımır. Amma mən elə orada divarda yazılan, Quru Qoşunların
Təhlükəzlik Xidmətinin “Qaynar Xəttinə” zəng edəndən sonra məni içəri çağırdılar və polkovnik-leytenant olan bir hərbçi dedi ki, mən nahaq yerə Qaynar Xəttə şikayət etmişəm. Dedi ki, bunu elə bizə deyərdiniz, özümüz həll edərdik. Bildirdi ki, onu da zənglə bu məsələyə görə çağırıblar. Mən isə bildirdim ki, yaşlı adamam və neçə saatdır hərbi hissənin qapısında gözləmişəm, mənə heç kimi cavab vermir. Sonradan qapıda duran növbətçi boynuna aldı ki, Rasim onların hərbi hissəsində xidmət edir. Daha sonra bir zabit də möbil nömrəmə zəng etdi və Rasimi müdafiə etdi. Sonra mənə dedilər ki, Rasimin imkanı yoxdur, gəlib 30-40 manat verər, məsələ həll olunar. Mən isə bununla razılaşmadım,çünki bu dəyən ziyanı ödəmirdi. Həmçinin belə saymamazlıq insan kimi mənə xoş deyildi”.
Şikayətçi yazır ki, bəlkə də çavuş Rasim Əliyev kimlərəsə arxayındır deyə belə haqsızlıq edir: “Ancaq mən qanunlarımıza və dövlətimizə arxalanıram. Hörmətli redaksiya! Xahiş edirəm ki, mənim şikayətimi işıqlandırasınız və mənə ziyan vuran Rasim Əliyev haqda tədbir görülməsində mənə yardımşı olasınız”.

Mirzə