Müdafiə Naziri Elçibəy hakimiyyətinin uğurlarını başqa ada bağlayır
Heydər Əliyevin 90 illik yubileyi ilə əlaqədar Silahlı Qüvvələrin Təlim və Tədris Mərkəzində keçirilən tədbirdə çıxış edən müdafiə naziri Səfər Əbiyev deyib: “Heydər Əliyevin apardığı düşünülmüş, uzaqgörən siyasət nəticəsində əvvəllər Sovet Ittifaqına məxsus bütün silah-sursat, hərbi texnika, təsərrüfat əmlakı və texniki qurğular Azərbaycanın sərəncamına keçmiş, ölkəmizin digər bölgəsindən fərqli olaraq Naxçıvanda heç bir dağıntı və talanlara yol verilməmişdir.Heydər Əliyevin Türkiyə Respublikası və Iran Islam Respublikası ilə apardığı danışıqlar nəticəsində bölgənin enerci resurslarına olan ehtiyacı çətinliklə də olsa, qismən təmin edildi. Naxçıvan ilə Türkiyə Respublikası arasında Ümid körpüsü tikilib istifadəyə verildi. O zamankı rəhbərlik tərəfindən Azərbaycanda yaradılan daxili xaosun Naxçıvana yayılmasının qarşısı Heydər Əliyevin iradəsi ilə alındı" (“Trend”).
Müdafiə nazirinin sadaladığı faktlara nəzər salanda məlum olur ki, istər rus ordusunun ölkədən çıxarılması, istərsə də Ümid körpüsünün tikintisi Əbülfəz Elçibəyin hakimiyyəti illərinə təsadüf edib. Elə keçmiş müdafiə naziri Rəhim Qazıyev də deyir ki, Heydər Əliyevə aidiyyəti olmayan işləri onun adına yazmaq heç bir çərçivəyə sığmır: “Heydər Əliyevin nədə xidmətləri olubsa, ondan danışmaq olar. Ancaq ona aidiyyəti olmayan işləri onun adına yazmaq adamda ikrah hissi yaradır”. Rəhim Qazıyev yada salır ki, Azərbaycandan rus ordusunun çıxarılması 15 may 1992-ci ildə təsdiqlənib: “Rus ordusunun çıxarılması ilə bağlı protokolu Daşkənddə mən və Qraçov imzalamışıq. 1992-ci il avqustun 25-də rus ordusu silah-sursatını qoyub, Azərbaycandan gedib. Yeganə Gəncədə 4-cü diviziya qalmışdı ki, onlar da mən istefa verəndən 4 ay sonra ölkədən çıxdılar. Heydər Əliyev hakimiyyətə gələndə Azərbaycanda bir nəfər də rus ordusu qalmamışdı”.
Həmin dövrdə dövlət katibi olmuş Pənah Hüseyn də diqqətə çatdırır ki, Ümid körpüsünün tikintisi zamanı Heydər Əliyev Naxçıvanda Ali Sovetin sədri idi: “O vaxt körpünün açılışına Isa Qəmbər də getmişdi. Həmin dövrdə Azərbaycan dövlətinin imkanı yox idi ki, belə bir körpü tiksin. Bu körpünün tikintisi Türkiyə ilə bağlıdır və bütün maliyyə vəsaitini də Türkiyə dövləti ödəyib”.
Zaur