Yanan bina işində təqsirləndirilən şəxsin vəkilindən sərt ittiham

Binəqədi rayonunda 16 mərtəbəli binada baş vermiş dəhşətli yanğınla bağlı həbs olunmuş “Qlobal Stone” MMC-nin baş direktoru Uğur Bəşirov, “Global Construction” MMC-nin təsisçisi və idarə heyətinin sədri Miryusif Mahmudov və digər şəxslərin cinayət işi üzrə məhkəmə prosesi davam edib. Cinayət işi Bakı Ağır Cinayətlər Məhkəməsində araşdırılır.

Hakim Əfqan Hacıyevin sədrlik etdiyi prosesdə cinayət işinin 13-cü cildindı olan sənədlər elan edilib. Həmin cilddə olan şahidlərin ifadəsi yer alınıb. Şahid Tural Məmmədovun istintaqa verdiyi ifadəsi elan edilib. O istintaqa ifadə versə də, məhkəmədə ifadə verməyib. O ifadəsində qeyd edib ki, Azadlıq prospektində binaların üzlənməsinə nəzarət üzrə sahə rəisi olub. Şahid qeyd edib ki, binada görülən işlərlə bağlı Fövqəladə Hallar Nazirliyinin müvafiq idarəsinin işçiləri yoxlama aparıb.

Cinayət işinin 14-cü cildində olan Binəqədi İcra Hakimiyyətinin rəhbərliyinin baş prokurorun 1-ci müavini Rüstəm Usubova ünvanladığı məktub elan edilib. Məktubda qeyd olunub ki, icra hakimiyyətinin 1-ci müavini Qüdrət Seyfullayev sərəncama çıxarılıb. Daha sonra məktubda müxtəlif illərdə icra hakimiyyətinin müavinlərinin işə götürülməsi və çıxarılması haqqında məlumat verilib.

Təqsirləndirilən Qəzənfər Novruzovun vəkili Nüşabə Ağayeva bildirib ki, prokurorun məktubun ikinci bəndini elan etməsi barədə israr etməsi məqsədyönümlü xarakter daşıyır: “Məqsəd isə Qəzənfər Novruzovun vəzifə səlahiyyətlərindən sui istifadə etməsi barədə ittihamı sübut etməkdən ibarətdir”.

Miryusif Mahmudovun vəkili Ilhamə Həsənova bildirib ki, şirkətdən işlərin təhvil-təslimini Qüdrət Seyfullayevlə aparılıb: “Qüdrət Seyfullayev hər bir işin qaydasında olduğunu deyib. Amma bununla bağlı onun barəsində tədbir görülməyib”.

Daha sonra FHN-nin Baş Prokurorluğa ünvanladığı məktub açıqlanıb. Bildirilib ki, “Qlobal Stone” MMC və “Global Construction” MMC-nin Hökməli qəsəbəsində politüranların istehsalat sexinə baxış keçirilib. Baxış zamanı materiallar yanan məhsullar qrupuna aid olduğu müəyyən olunub.

Binəqədi İcra başçısı Xaləddin İsgəndərovun baş nazirin müavini Abid Şərofova göndərdiyi məktub elan edilib. Sənədlərin tədqiqi mərhələsində yanğınən baş verdiyi rayonun icra hakimiyyətininin rəhbər şəxslərin vəzifələri, onların tutduqları psota uyğun olaraq səlahiyyətləri elan olunub. Yanğına görə həbs edilən şəxslərdən olan Binəqədi rayon icra başçısının müavini olmuş Qəzənfər Novruzovun səlahiyyətləri elan olunarkən onun vəkili etiraz edib.

Vəkil qeyd edib ki, əgər yanğın baş verən binada aparılan işlərə, görülən işlərin keyfiyyətinə və təhvil-təslimində Qəzənfər Novruzov təqsirli bilindiyi qədər icra başçısı Xaləddin İsgəndərov da təqsirli bilinməlidir.

Vəkil bunu onunla izah edib ki, hüquqlarını müdafiə etdiyi Q.Novruzovdan əvvəl səlahiyyətli şəxslər icra başçısı və digər vəzifəli məmurlardır. Bu səbəbdən də günahkar şəxs kimi Q.Novruzovun göstərilməsi doğru deyil.

Məhkəmədə sənədlərin tədqiqi zamanı vəkillər FHN-nin binada aparılan təmir işləri ilə bağlı verdiyi rəyləri, binaların üzlənməsində istifadə olunan poliuretan məhsulların yanan material olmaması və daha sonra qismən yanan material olması ilə bağlı verilən rəyləri imzalayan şəxslərin məhkəməyə gətirilməsi və dindirilməsini tələb ediblər.

Miryusif Mahmudovun vəkili İlhamə Həsənova çıxışında bildirib ki, sənədlərdə FHN-nin icra başçısı Xaləddin İsgəndərova ünvanladığı məktublar saxtadır: “FHN-nin nazir müavininin Xaləddin İsgəndərova ünvanlanan məktubda qeyd edilir ki, 2012-c ildən 6 məktub göndərilib və guya həmin məktublarda poliuretanla üzlənən binalarda təhlükənin olduğu göstərilir. Məktublarda guya yanğın siqnalının daxil olduğu, buna görə də binaların ətrafında növbətçiliyin təyin olunması istənilir. Ancaq qeyd edilən məktubların heç biri icra hakimiyyətində çəktubların qəbulu jurnalında qeydə alınmayıb. Həmin məktublar saxtadır və məsuliyyətdən yayınmaq üçün yazılıb”.

Prokuror Fərid Nağıyev isə qeyd edib ki, nazir müavini tərəfindən imzalanan məktubun saxtalaşdırılması mümkün deyil: “Bu məktubların kimlərinsə, məsuliyyətdən yayınması məqsədi ilə yazılması haqda səsləndirilən fikirlər əsassızdır. Digər şəxslərlə bağlı da iş ayrılıb və əgər onların da günahı sübuta yetirilərsə, məsuliyyətə cəlb olunacaqlar”.

Proses dekabrın 6-da davam edəcək.

Ötən il mayın 19-da Binəqədi rayonu ərazisində, metronun “Azadlıq” stansiyasının yaxınlığında 16 mərtəbəli yaşayış binasında baş verən yanığında 15 nəfər həyatını itirib, 30 nəfərdən çox şəxs xəsarət alıb. “Qlobal Stone” MMC-nin baş direktoru Uğur Bəşirov, “Global Construction” MMC-nin təsisçisi və idarə heyətinin sədri Miryusif Mahmudov, həmin cəmiyyətin idarə heyətinin sədr müavini Ələkbər Əsgərov, Binəqədi rayon İcra Hakimiyyəti başçısının sabiq birinci müavini Qəzənfər Novruzov, 2012-2013-cü illərdə Binəqədi rayon Mənzil Kommunal Təsərrüfat Birliyinin rəisi işləmiş rayon icra hakimiyyətinin təsərrüfat şöbəsinin müdiri olmuş Ədalət Rəcəbov, Binəqədi rayonu, 72 saylı Mənzil Kommunal İstismar Sahəsinin rəisi Nizami Orucov, “Dərnəgül Boru Zavodu” Qapalı Səhmdar Cəmiyyətinin sınaq laboratoriyasının müdiri Ağacavad Məmmədov həbs olunublar.