Azərbaycanda həbs qətimkan tədbiri bir çox hallarda qanunsuz olaraq seçilir, məqsəd isə rüşvət almaqdır!

Adından da göründüyü kimi, həbs qətimkan tədbiri şübhəli, təqsirləndirilən şəxsin araşdırmadan, istintaqdan yayınmasının qarşısını alamaq üsuludur. Demokratik quruluşlarda kiminsə barəsində ittiham tərəfinin vəsatətilə həbs tədbiri seçilməsi ciddi pozuntu sayılır və onun müdafiəsinə maneə kimi qiymətləndirilir. Demokratiya yolu seçən ölkəmizdə yeri gəldi-gəlmədi, cinayət, təqsir sübut olundu-olunmadı, öncədən şəxsə qarşı həbs seçilməsi adi hal alıb. Hətta sanksiyasında cərimə nəzərdə tutulan, az ağır cinayət sayılan maddələrlə də ittiham tərəfi, istintaq orqanı həbsə üstünlük verir, məhkəmələr isə yüngülləşdirici halları belə nəzərə almadan uzun müddətli həbs qətimkan tədbirini gözüyumulu imzalayır.


Maraqlıdır, görəsən digər qətimkan tədbirləri - ev dustaqlığı, polisin nəzarətinə verilmə, başqa yerə getməmək haqqında iltizam, girovluğa, zaminliyə verilmə bəs nədən ötrüdür? Özü də seçilən bir neçə aylıq həbs müddətində müstəntiq bəzən heç bir dəfə də olsun məhbusu dindirməyə belə gəlmir!?

Belə çıxır, öncədən təqsirsizlik prezumpsiyası pozularaq vətəndaş həbsə məhkum edilir, həbsdən rüşvət amacı ilə yararlanılır?! Fikir verin, milyonlarla dövlət malını yeməkdə şübhəli bilinənlərə həbs seçilmir, adi yol qəzasına görə vətəndaşa həbs seçilir və yenidən artırılır. Məntiq varmı? Siyasi işləri çıxsaq, burada rüşvətdən özgə məntiq görünmür. Özəlliklə öhdəsində azyaşlı uşaqlar olan, əlilliyi olan şəxslərin barəsində həbs qətimkan tədbiri seçilməsi istintaq-ittiham-məhkəmə üçlüyünün gəlirli “həbs qətimkan biznesi”ndən güzəştə getməyəciyinin göstəricisidir. Fikir verin, gözdən əlili sanksiyasında cərimə də nəzərdə tutulan cinayətdə şübhəli kimi vergi müstəntiqi hətta məhkəməsiz qəfəsə salıb. Nə prokuorluq, nə ombudsman, nə millət vəkilləri, nə hüquq müdafiə, nə əlil-veteran təşkliatları, nə də mətbuat gözdən əlilin ədalətsiz həbsinə reaksiya verir!!!

Onu da vurğulayaq ki, şübhəli şəxsin məhkəməsiz 48 saat saxlanılması da qanunsuzdur və insan haqlarına tüpürməkdir. Fikir verin, insanı “şübhəli şəxs” qismində məhkəmə qərarı olmadan həbs edirlər, insan haqları üzrə müvəkkil, prokuror, deputat bildirir ki, məhkəməsiz 48 saat saxlanma qanunidir!?? Belədə hansı hüquqdan insanlıqdan danışmaq olar?

Məğrur Bədəlsoy


P.S.Azərbaycanda demokratiya elə “qıcqırıb” ki,çağırış vərəqi oldu-olmadı,dövlət orqanlarına gedəndə “şübhəli şəxs” qismində həbs edilməyəcəyinə zəmanət yoxdur.Məni zənglə Vergilər Nazirliyinə çağırıblar.48 saat ərazi üzrə Yasamal polisində “şübhəli” olmaq şans(sızlığ)ım var...

gundemxeber.az