İnternetdəki cinayətkar şəbəkə Azərbaycana keçdiyindən, Son bir ildə cinayətkar şəbəkənin toruna düşən 4 nəfər intihar edib.


Bir müddət əvvəl sosial şəbəkələrdə istifadəçilərini intim videogörüntüləri ilə şantaj edən cinayətkar qrupun fəaliyyət göstərməsi bardə məlumat yayılmışdı.
Artıq cinayətkar şəbəkənin toruna Azərbaycandan olan internet istifadəçiləri də düşüb.
Mərakeş, Filippin və Kot-d`İvuardan olan cinayətkar qruplaşmalar internetdəki tanışlıq saytlarında, sosial şəbəkələrdə, xüsusilə də Facebook və Linkedİn-də qadın adlarına saxta profillər yaradır, “dostluq” yollayırlar.
Cinayətkar şəbəkə üzvləri ilk növbədə tora salmaq istədikləri istifadəçilərin profillərinə göz gəzdirirlər. Onlar profil istifadəçisinin böyük şirkətlərdə və ya hər hansı ictimai nüfuzlu bir vəzifədə işlədiyini gördükdə ona dostluq göndərirlər. Daha sonra istifadəçilərə görüntülü zəng vurub, onu intim hərəkətlər etməyə təhrik edirlər. Həmin vaxt görüntülər xüsusi proqramlar vasitəsilə qeydə alınır.
Sonra «Facebook» istifadəçi kişilər şantaj olunur, bu görüntülərin onun ailə üzvlərinə, tanışlarına, çalışdığı yerə göndəriləcəyi deyilir. Ardınca konkret tələb gəlir: “Əgər bunu istəmirsənsə, bizə pul ödəməlisən”.
Azərbaycanda «Facebook» sosial şəbəkəsinin istifadəçiləri “çılpaq şantaj ovu” tələsinə bir necə nəfər düşüb. "Qurbanlar" arasında adi istifadəçilərlə yanaşı cəmiyyətdə xüsusi statusa sahib olan şəxslər də var.



Cinayətkar şəbəkə üzvünə məxsus profil

Azərbaycanda cinayətkar qrupun tələsinə düşənlərdən biri (adını etik qaydalara zidd olduğu üçün açıqlamırıq) əməkdaşımızla söhbətində deyib ki, şəbəkə qadınlardan təşkil olunub.
«Mən daimi «facebook» istifadəçisiyəm. Hər gün olduğu kimi «facebook»a daxil oldum və mənə xarici ad və soyadlı bir xanımın dostluq atdığını gördüm. Xanımın dostluğunu qəbul etdim. Bir neçə saat sonra həmin xanım mənimlə yazışmağa başladı. O, birinci ingilis dilində yazdı. Mənim ona cavab yazmadığımı görəndə Azərbaycan dilində yazmağa başladı. Bizim dildə yaxşı yaza bilmirdi. Sanki hansısa tərcümə proqramından istifadə edirdi. Mən onun yazdıqlarını çətinliklə anlayırdım».



Kaira Tehdourou - Azərbaycanlı gəncə intim təklif edən cinayətkar şəbəkə üzvü


Şikayətçinin sözlərinə görə, xanım biraz yazışdıqdan sonra onunla intim söhbətlər etmək istədiyini deyib.
«Mən xanımın hansısa cinayətkar qrupun üzvü olduğunu bilmirdim. Onun intim söhbətlərinə razılıq verdim. Bir müddət danışdıqdan sonra «facebook» vasitəsi ilə mənə görüntülü zəng etdi. Mən də adi bir zəng olduğunu düşünüb, görüntünü açdım. Kamerada bir xanımın yataq otağında kameranın qarşısında yarıçılpaq vəziyyətdə uzandığını gördüm. O, məndən işarələr vasitəsi ilə soyumağımı istəyirdi. Görüntü tamamilə səssiz idi. Mən isə ehtirasımın qurbanı olaraq qızın mənə təklif etdiklərini həyata keçirməyə başladım».
Cinayətkar şəbəkənin toruna düşən şəxs bildirib ki, tamamilə soyunub, intim hərəkətlər etdikdən sonra videogörüntü kəsilib. «Mən nəyin baş verdiyini bilmədim. Hər şey bir anın içərisində oldu. Bir neçə dəqiqədən sonra mənə həmin profildən video göndərildi. Videoya baxıb özümü çılpaq görəndə şoka düşdüm. O an başa düşdüm ki, bu hansısa şantaj şəbəkəsinin işidir».
Şantaj edilən şəxsə yazan xanım ondan pul tələb edib. «Məndən kart hesabına 1000 dollar pul köçürməyimi tələb etdi. Pulu köçürməyəcəyim təqdirdə isə videogörüntüləri yayacağını dedi. Göndəriləcək pulun xeyriyyə fondlarından birinə yönləndiriləcəyini bildirdi. İndi mən çıxılmaz vəziyyətdə qalmışam. Az qalıram özümü öldürəm. Çünki bu videolar ortaya çıxsa, mənim ailə və ictimai nüfuzuma xələl gələcək. Pulu da göndərmək istəmirəm. Çünki pul karta oturan kimi daha çox istəyəcək. Videonu siləcəyinə əmin deyiləm».
Azərbaycanlı «qurban» sosial şəbəkə istifadəçilərini diqqətili olmağa çağırır. «Sosial şəbəkə istifadəçiləri hər profildən gələn dostluğu qəbul etməsinlər. İlk növbədə profilin istifadə müddətinə baxsınlar. Çünki yeni açılan xarici soyadlı qız profilləri ilə gələn dostluqların əksəriyyəti həmin şəbəkə üzvlərinə məxsudur».

Bəzi hallarda isə cinayətkar qrup üzvləri istifadəçiləri "facebook" vasitəsi ilə elektron ünvanlarına dəvət edirlər. Dəvətə qarşılıq verən istifadəçi elekron ünvan vasitəsi ilə də "qurbana" çevrilə bilər.
Qeyd edək ki, cinayətkar şəbəkə üzvləri niyyətlərinə nail olmadıqlarını gördükdə profillərin fəaliyyətini dayandırırlar.

Cinayətkar şəbəkəyə məxsus "facebook" profili


Ümumiyyətlə belə "qurban" ların sayı artsa da hüquq-mühafizə orqanlarına müraciət edən şəxslər barədə məlumat yoxdur. Məlumata görə, şantaj edilən şəxslər polisə müraciət etdikləri halda cinayətkar şəbəkə üzvlərinin qıcıqlanıb, görüntüləri yaya biləcəyindən qorxur.

Amma bu şəbəkə ilə bağlı Britaniyanın Milli Kriminal Agentliyi (National Crime Agency) internetdə tanışlıqdan sui-istifadə edən və şantaj üçün bəhrələnən, “çılpaq şantaj ovu” adlanan prosesin genişləndiyini bəyan edib. Sadəcə Britaniyada son bir ildə bu cinayətkar şəbəkənin toruna düşən 4 nəfər intihar edib.
Onlar mütəxəssislərin “sextortion” adlandırdıqları şantaja, hədə-qorxulara dözməyiblər, rüsvay olacaqlarından qorxublar.

Malik

gundemxeber.az