İlham Əliyevə müraciət edən məhbus övladları «fövqəlnazir»i həbsin sifarişçisi kimi göstərib

2008-ci ildə həbs edilərək 11 il azadlıqdan məhrum edilən Raquf Hidayətovun övladları ölkə başçısı Ilham Əliyevə müraciət ünvanlayıb. Müraciətin bir surəti də redaksiyamıza daxil olub.
Xatırladaq ki, bundan əvvəl də Raquf Hidayətov fövqəladə hallar naziri Kəmaləddin Heydərova məktub yazmışdı. Həmin məktub da mediada dərc edilmişdi. Raquf Hidayətovun Kəmaləddin Heydərova məktub yazmasının səbəbi isə onu həbs etdirən “Azərtikinti” servisin rəhbəri Bağır Muradovun “fövqəlnazir”ə yaxın olmasıdır. Raquf Hidayətovun övladları Ilham Əliyevə yazdıqları müraciətdə bu məsələyə diqqət çəkir və atalarının həbs olunmasının təfərrüatlarını ölkə başçısının diqqətinə çatdırırlar. Kifayət qədər ilginc məqamların yer aldığı müraciəti oxuculara təqdim edirik:
“Hörmətli prezident, mənim atam Hidayətov Raquf Xosrov oğlu 2-ci qrup əlil şəkər xəstəsidir. 2008-ci il 21 iyulda həbs olunaraq Bakı şəhər 11 saylı cəzaçəkmə müəssisəsində cəza çəkir. Ailəmizin başına gələn bu hadisənin səbəbkarı Bakı şəhər ”Azərtikinti" servisin direktoru Bağır Muradovdur.
Nəzərinizə çatdırım ki, atam Bağır Muradov tərəfindən Ağdam rayon sosial yardım fondunun binasının tikilməsində sahə rəisi vəzifəsinə təyin olunub. Atam tikintidə istifadə olunan materialları tikintiyə ayrılan pul gələnə kimi satış mərkəzlərindən nisyə olaraq öz adına götürürdü. Bir müddətdən sonra demək olar ki, tikintinin 70 faizi başa çatdıqdan sonra Bağır Muradov qəfildən atamı işdən uzaqlaşdırdı. Atam bunun səbəbini soruşduqda Bağır Muradov deyib ki, tikinti yararsız aparılıb. Bu bəhanədən sonra atam Bağır Muradova nisyə götürdüyü materialların pulunu və fəhlələrin əmək haqlarının ödənilməsini xahiş edib. Bağır Muradov isə cavabında “Bakıya gələrsən söhbət edərik” deyib. Birinci dəfə atam onunla görüşəndə “get sonra gələrsən pulu verəcəyəm” deyib. Bu hal bir neçə dəfə təkrarlanıb. Bağır Muradov Hər dəfə atamı aldadaraq yola salıb. Yeri gəlmişkən, Bağır Muradov Azərbaycanın nüfuzlu şirkətlərindən olan “Gilan Holdinq”in prezidentinin qardaşıdır. O, Həm də özünü FHN Kəmaləddin Heydərovun yaxın qohumu, əmisi kimi tanıdıb. Atam Bağır Muradovun hər dəfə onu aldatdığını görüb fövqəaldə hallar naziri Kəmaləddin Heydərova pulun verilməməsi ilə bağlı teleqram ünvanlayıb. Amma bunun də nəticəsi olmayıb. Bundan sonra atam yenidən fəhlələrin haqqını və tikinti materiallarının pulunun ödənilməsi üçün o zaman tikinti nazirliyində müavin vəzifəsində çalışan Ağalar müəllimlə görüşüb məsələni ona danışıb. Ağalar müəllim də məsələ ilə bağlı Bağır Muradova zəng edib. Onun zəngindən sonra Bağır Muradov yenidən atamı öz ofisinə çağırıb. Bağır Muradovun ofisinə getdikdə o, tikintiyə ayrılmış 100 min manatlıq sənədi atama göstərib deyib ki, bu sənədə qol çəkəndən sonra (guya bu məbləğ tikintiyə sərf olunub) tikinti materiallarına və fəhlələrə olan 27 min manat borcu götürə bilərsən. Atam buna etiraz edib. Deyib ki, mən bu pulları sərf etməməmişəm, ona görə də sənədə qol çəkən deyiləm. Bağır Muradov da atama deyib ki, o zaman bir qəpik də almayacaqsan. Əlavə edib ki, kimə istəyirsən şikayət elə, mənə heç kim heç nə edə bilməz, sənin nəslini kəsərəm. Daha sonra o atamı təhqir edərək otaqdan çıxmağı əmr edib. Bundan sonra isə Yasamal rayon prokurorluğunda atama bıçaqlanmayla bağlı cinayət işi açılıb. Muradovun işçilərindən ibarət yalançı şahidlər təşkil olunub. Istintaq Kəmaləddin Heydərovun sifarişilə ədalətsiz olaraq aparılaraq atama qəsdən adam öldürməyə cəhd ittihamı irəli sürülüb. Sonra da məhkəmə sifarişlə atamı 11 il azadlıqdan mərhum edib.
Hakim hökm çıxararkən atamın nə birinci məhkumluğunu, nə ziyalı olmasını, nə də 2-ci qrup əlil olmasını nəzərə alıb. Apelasiya və Ali məhkəmələr də sifarişlə hökmü qüvvədə saxlayıb.
Hörmətli prezident, mənim atam Bağır Muradovun zindanında yatan məhbusudur. Ağdam rayon sosial yardım fondunun binasında istifadə olunan materialların pulunun bir hissəsini evimizi banka girov qoyaraq ödəmişik. Peşman da deyilik. Başımıza gələn bu ağır hadisədən sonra anamız atamızın dərdinə dözməyərək dünyasını dəyişdi. Bu 4 il ərzində sizə yüzə yaxın məktub göndərməyimizə baxmayaraq (hələ də göndəririk) heç birinə cavab gəlməyib. Onun üçün dedik heç olmasa prezidentimiz, xalqımız Azərbaycanda, Bərdədə yaşayan bir ailənin acısını, iztirabını mətbuatdan oxusun.
Hörmətli prezident, Murad Bağırovun məhbusu olan atamız Hidayətov Raquf Xosrov oğlunu əfv etmənizi xahiş edirik. Əgər bu da mümkün olmasa, o zaman bəzi ədalətsiz məmurların əlindən bu ölkənin vətəndaşlığından çıxıb hər hansı bir ölkəyə getməyimizə kömək edin".
Raquf Hidayətovun övladları qəzetimiz vasitəsilə xarici ölkələrin Azərbaycandakı səfirliklərinə də müraciət edərək onlardan dəstək istəyirlər.

Tahir