İcra başçısının “pir oğurluğu”nun pərdəarxası; Beyləqanda Şeyxin obyekti olan Cərciz Peyğəmbər pirində baş verən biabırçı olay barədə ziddiyyətli məlumatlar var

Məlum olduğu kimi, aprelin 29-dan 30-a keçən gecə ölkənin ən məşhur ziyarətgahlarından birindən bir aylıq nəzir pulları oğurlanıb. Həzrəti Cərciz Peyğəmbər pirində baş verən oğurluq faktı Beyləqan Rayon Polis Şöbəsində araşdırılır. Lakin faktla bağlı səslənən bəzi fikirlər müxtəlif versiyalara yol açır. Məsələn, Həzrəti Cərciz Peyğəmbər pirinin rəhbəri Hacı Cəfərqulunun və rayon rəhbərliyinin Pirdə yığılan pulların aradan çıxarılmasında əlinin olduğu iddiaları səslənir. Hadisədən sonra işindən azad olunan Hacı Cəfərqulu isə mətbuata açıqlamasında işdən çıxarılmasını öz ərizəsi ilə izah edib və bu məqsədlə rayon rəhbərliyinə müraciət etdiyini də söyləyib.
Qafqaz Müsəlmanları İdarəsinin mətbuat xidmətinin rəhbəri Rəhimə Dadaşova bildirib ki, Pirin rəhbərliyini dəyişmək idarənin səlahiyyətidir və sözügedən şəxsin rayon icra hakimiyyətinə müraciətinin səbəbini onun özündən soruşmaq lazımdır: “Dini İdarənin Təftiş şöbəsi mütəmadi olaraq yoxlamalar aparır. Həmin yoxlamaların nəticəsi olaraq Hacı Cəfərqulu vəzifəsindən azad edilib və artıq onu əvəz edən şəxs var”.
Beyləqan rayon icra başçısının 1-ci müavini Telman Məstanov da açıqlamasında İcra Hakimiyyətinin Cərciz Peyğəmbər pirinin rəhbərini dəyişmək səlahiyyətinin olmadığını vurğulayıb: “Mən bilmirəm o niyə İcra Hakimiyyətinə müraciət etdiyini söyləyib və ümumiyyətlə, müraciət edibmi? Lakin deyə bilərəm ki, icra başçısının pirin rəhbərini dəyişmək səlahiyyəti yoxdur. Bunun üçün Qafqaz Müsəlmanları İdarəsi var”.
Pirdə yığılan pulların aradan çıxarılmasında Hacı Cəfərqulu ilə yanaşı rayon rəhbərliyinin əlinin olduğu söyləntilərinə gəlincə, müavin bunu da təkzib edib: “Boşboğaz adamlar çox söz deyə bilər. Onların dediklərinin heç bir əsası yoxdur. İcra başçısı nəzirlə yığılan pula tamah salacaq adam deyil. Gözünün ucu ilə də baxmaz”.
Məlumata əsasən hər ayın sonunda Bakıdan, Qafqaz Müsəlmanları İdarəsindən gedən nümayəndələr nəzir pulları yığılan otağı açır və yığılan pullar hesablanır, pirin ehtiyacları qarşılandıqdan sonra qalan məbləğ Bakıya aparılır. Lakin bu dəfə Bakıdan gələnlər əliboş geri qayıtmağa məcbur olublar. Çünki gecə nəzirlərin toplandığı otağın qapısı sındırılıb və pullar oğurlanıb.
Məlumatda bildirilir ki, istintaq orqanları şübhəli kimi pirdə çalışan mollaları dindirir. Onlardan biri də Beyləqan şəhər ərazi nümayəndəsi Azil Aslanovun qardaşıdır. Dindirilən mollalar arasında onun olduğu da iddia olunur.
Məlumatları və ehtimalları təsdiqləyən başqa bir səbəb isə bu gün Qafqaz Müsəlmanları İdarəsinin rəhbəri, şeyxülislam Hacı Allahşükür Paşazadənin Həzrəti Cərciz Peyğəmbər pirinin rəhbəri Hacı Cəfərqulunu vəzifədən kənarlaşdırması olub. Baş verən oğurluq hadisəsindən sonra rayon rəhbərliyi ilə QMİ arasında ciddi narazılıqların yarandığı bildirilir.
“Gündəm-xəbər”i bilgiləndirən qaynağın məlumatına görə, bu hadisə Beyləqanda böyük müzakirəyə və rüsvayçılığa səbəb olub. Hadisədə icra başçısı Vaqif Abdullayevin adının hallanması onun çətinə salıb. İcra başçısı məsxərəyə qoyulub və el arasında qınaq obyektinə çevrilib. Ona görə də hazırda başçı öz adının üstündən bu ləkəni silmək üçün təbliğata başlayıb.
H.Mirzə