Belələri ölkədə at oynatdıqca, bahalıq, inhisarçılıq, korrupsiya davam edəcək

Bu ölkədən çoxunun başından tüstü çıxarıb gedəcəyəm.

“Böyük Yaradanın ən kiçik məxluqları - arı, bülbül, qaranquşun qurduqları yuvaları ən məhşur memar qura bilməz. İnsan oğli ilə həşarat və quşların fərqi odur ki, bütün arı, bulbul və qaranquşlar eyni yuvanı qura bilir, bütün insanlar isə özlərinə yuva qura bilmir. İndiki dövrdə yalnız arxalı, pullu, vəzifəli şəxlər asanlıqla nəinki özlərinə və yaxınlarına yuva qurur, hətta imarətlər, villalar ucaldırlar”.

Bu fikirlər journalist həmkarımız Məhbub Zülfüqarlının redaksiyamıza ünvanladığı mətbunuda yer alıb.

Məhbub bə yazır ki, Suriya, İraq, Liviya, ərəb ölkələrində gedən prosesləri izləmək kifayətdir ki, dünyanın faniliyini anlayasan: “Ancaq Azərbaycandakı vəzifə sahiblərinin bir çoxu var-dövlətin köləsidirlər. Onlar pulla alınan kölədən daha rəzildirlər. Rəzil insanların ən dəhşətlisi cahil insanlardır. Külək hansı istiqamətə əsirsə, belə cahil və rəzillər o səmtə sürünəcək. Azad insanların böyük düşmənləri həm də kölələrdir. Kölə müstəqil deyil, ağasının sifarişini yerinə yetirməyi fəxr bilir. Killer, qatil, işverənləri də kölə hesab etmək lazımdır. Sifarişli qətllərin mənbəyini də cahil təbəqədə axtarmaq lazımdır. Azərbaycanın Suriyaya dönməməsi üçün ən böyük xilas yolu, süni bahalaşma, sabotaj yaradanları, əhalini asılı vəziyyətə salanları, dilənçiliyi, səfaləti artıranları, dəhşətli iqtisadi böhran yaradanları cəzalandırmaq, ölkədə islahatlar keçirmək lazımdır”.

Jurnalist həmkarımız hesab edir ki, ölkədə barış mühiti mütləq formalaşdırılmalıdır: “İmam Sadiq (ə) buyurur ki, “qiymətlərin bahalaşması insanların əxlaqını və davranışlarını pis edər, əmanətdarlığı aradan aparar və insanları sıxıntıya salar.” Vətənpərvər, xalqını, dövlətini sevənlər cani-dildən çalışmalıdılar ki, bahalıq olmasın. Bahalığı isə süni surətdə yaradan korrupsionerlər, monopolist, inqilab-iğtişaşlardan xeyir güdənlər yaradır. Məhəmməd (s.ə.s) deyirdi: “Hər kəs ki, bir gecədə ümmətim üçün bahalıq arzu edərsə, Allah Təala, onun 40 illik əməlini aradan aparar.” Bahalığa bəraət qazandıran qələm, mətbuat əhli öz imanını yandırar”.

Məhbub Zülfüqarlı hesab edir ki, bu barədə hansı dindar, molla səbrli davranmağı tövsiyə edirsə, obyektiv şəraitləri anlamır, yarınma yolunu tutmaqla, böyük günaha sahib olur: “Tanınmış psixoterapevt Elmir Əkbər mətbuata açıqlamasında “tanınmış psixoloq Dəyanət Rzayevin intihar etməyib, qətlə yetirilib”yazdı. Dəyanət, bilirisiniz nə qədər adama çörək verirdi? Sonra, hamısı bir nəfər kimi Dəyanətə düşmən kəsildi, üzünə durdular. Çünkü, hamısı saxtakar idi. Dəyanətin də onların saxtakarlığından xəbəri var idi. Onlar Dəyanətin yanında gözükölgəli idilər. İndi, azadlığa çıxa bilərlər, artıq, Dəyanət yoxdur. Elmir Əkbər müsahibəsinin sonunda isə vurğulayır: “Hələ bəziləri durub deyir ki, intihar edənlərə cənnətdə yer yoxdur. Ayıb olsun! Dəyanət, sağlığında çox savab işlər görüb. Düzdür, yanında xəstə mənəviyyatlı, zəhərli insanlar olub. Ölkəmizdə idarəetməyə soxulmuş monopolistlər dağıdıcı bahalığı, rüşvətxorluğu, korrupsiyanı çiçəkləndirirlər. Özləri isə bağlarında ayı, canavar, çoban itləri saxlayırlar, Onlar qatil, işverən, ev dağıdanlardan qatı-qatı təhlükəli, ikiüzlü, ziyankardırlar. Belələrinin damarında düşmən qanı axır. Bu gözəl, riyasız xalqa torba tikənlərin özlərinin torbası cırılsa da, o qədər sırtıq və hiyləgərdirlər ki, istənilən anda 180 dərəcə dəyişməyi bacarırlar. Buqələmun bunlara baxanda əcdadlarına rəhmət oxudur. Bunları bu xalqa rus, fars, erməni sırıyıb. Ölkədən mühacirət edənlərin, intihara əl atanların, ailəsi dağılanların bədbəxtliyinin səbəbi bu monopolistlərdir. Belələri ölkədə at oynatdıqca, bahalıq, inhisarçılıq, korrupsiya davam edəcək”.

İmişli rayonunda yaşayan journalist həmkarımız Məhbub Zülfüqarlı daha sonra məktubunda rayonda üzləşdiyi problemlərdən bəhs edir: “Avtoyol” rəisi Şükür Aslanovu tənqid etdiyimə görə, məni 3 saxta şikayətlə ev tikdirdiyi Rayon Polis Şöbəsi rəisinin əli ilə tapdırdı. Məni polisə apardılar. Şükür Aslanov rəis əvəzi Habil Ağayevin otağına girərək, məni hədələyəndən sonra, arxamca gələnlərin kimliyini öyrənib sakitləşmdi. “Avtoyol” rəisini məni həbs etdirmək üçün “tikinti kralı” Əvəz Şükürova yaxın şəxslər “körükləmişdi”.

Həmkarımız yazır ki, ötən yazılarının birində Əfqanıstan veteranı Qaraş bəyin Əvəz Şükürovun 200 hektarlıq tut bağında ayağını don vurduğundan yazıb: “Qaraş bəy isə Prezidentə, nazir Səlim Müslümova şikayət etmişdi. Onu şikayətinə görə rayonda müxtəlif idarələrə çağırırlar. Qarşısına ağ kağız qoyurlar ki, izahat versin və yazsın ki, əsəbi, dəli olduğu üçün ölkə rəhbərliyinə şikayət yazıb. Qaraş bəy isə onlara cavab verir ki, əsəbi olsaydım, məni Əfqanıstana aparmazdılar və 4 qız köçürdə bilməzdim”.

Jurnalist yazır ki, yerli məmurlar bir dəfə onu da bu cür etiraf yazmağa məcbur etmək istəyiblər: “30 avqust 2016-cı ildə “Avtoyol” rəisi şikayəti geri götürəndən sonra polis rəisinin müavini Habil Ağayev qarşıma ağ kağız qoymuşdu. Rəis müavini tələb edirdi ki, əsəbi olduğum üçün Əvəz Şükürov və onun yaxınlarından şikayət etdiyimi yazım. Lakin mən yazmadım. Mən yazmadım”.

Jurnalist yazır ki, bu məsələ ilə bağlı DİN və Baş Prokurorluğa 6 dəfə şikayət edib: “Ancaq bu məktubların birinə də qaneedici cavab verilmədi. Heç kim etiraf etmədi ki, sözügedən izahatı mən yox, Habil Ağayevin göstərişi ilə sahə müvəkkili yazıb. Hər dəfə də mənə belə cavab verilirdi: “İmişli rayon prokurorluğu, rayon polis şöbəsi şikayətinizi araşdırıb, sizə cavab verəcək. Sonunsu şikayətimdən sonra cavab verildi ki, şikayətiniz araşdırıldı, təsdiqini tapmadı. Mən prokuror köməkçisi Sultan Muradova “çox sağ ol” deyirəm. O, məndən şikayət etmiş “Avtoyol” rəisinin və Əvəz Şükürovun yaxınının iç üzlərini acdı. Daha dəqiqi, Avtoyol” rəisinin və Əvəz Şükürovun yaxınının haqqımda yazıb təsdiq etdirdikləri, vicdandan uzaq, yalançı ifadə və izahatları Sultan Muradovun sayəsində oxudum və mənəvi dinclik tapdım. Mənə qurduqları oyunu Ahıl Ziyalılara Qayğı İB-nin hüquqşunası pozmuşdu. Bəndəniz inanclı, 4 müqəddəs kitaba, 124 min peyğəmbərə, 12 imama və 14 məsuma tapınan biridir. Bu dünyada qazancım etdiyim yaxşılıqlardır. Atım, arabam, villam olmayıb, olmayacaq da. İmam Əli (Ə) belə yerdə buyurur: “Yaltaqla dostluq etmə ki, o yağlı dili ilə səni aldadar və yanlış işi nəzərində düzgün cilvələndirər.”

Müəllif məktubunun sonunda Əvəz Şükürova bir xatırlatmasını da yazır: “Məhz mərhum ağsaqqal qardaşın Rüstəm Əvəzovun hüquqlarını qoruduğuma görə, bazarlar sahibi, indi səninlə bir “krışada” olan, Əziz Quliyev CPM-in 1473-148-ci maddəsi ilə məni sizə görə həbs etdirmək istəyirdi. Sizlər onda da məni darda qoydunuz. Gözləyirdiniz ki, Əziz Quliyev məni 5 il həbs etdirəcək. Yaxşılığa yamanlıq etmişdiniz, indi də edirsiniz. İmam (ə) ona görə demişdi: “Əgər, dostun və din qardaşın səninlə rabitəni kəsibsə, sən onu qoru, fərq etməz, çətin də olsa, döz və səbr et. Çalış ki, dostluq rabitəsi zay olmasın”. Sizlər isə zəmanəyə bənzəyirsiniz. Əli (ə) demişkən, insanlar valideyinlərindən çox, zəmanəsinə bənzəyərlər. Mənim sığınacaq istəyimdən çoxları sevincək olub, bayram ovqatındadırlar. Amma, Şaban demişkən, bədxahlarımın cavabını verib gedəcəyəm. Bu ölkəni, vətəni, xalqı doğmalarım qədər sevirəm. Kimlərin sığınacaq istəyimdən məyus olduğunu, kimlərin sevindiyini görub dostumu, düşmənimi daha çox tanıya bildim. Ağılsız, qəddar, yaltaq dostdansa, ağıllı düşmən daha yaxındır. Allah hamının köməyi olsun! Hər kəs etdiyi pisliyin əvəzini mütləq alacaq, etdiyi yaxşılığın da əvəzini mütləq alacaq”.

Məhbub Zülfüqarlı