Veteranlar prezidentə müraciət etdi

Bölgələrdən tez-tez şikayət məktubları alırıq. Bu məktublarda vətəndaşlar yerli məmurlar tərəfindən hüquqlarının pozulmasından, məmur özbaşınalığından, korrupsiya və rüşvətxorluğun baş alıb getməsindən bəhs edirlər. Nə yazıqlar ki, hüququ pozulanlar arasında müharibə veteranları və əlillər də var. “Gündən xəbər”in redaksiyasına daxil olan şikayətlərdən birində də elə bu barədə söz açılır. Qazax rayonundan olan bir qrup müharibə veteranları və əlilləri Ali Baş Komandan, Prezident İlham Əliyevə müraciət ediblər. Müraciətin surəti redaksiyamıza da ünvanlanıb.

Şikayət məktubunun müəllifləri bildirilər ki, Qazax İcra Qrupunun rəisi Ramiz Şəmmədovun müharibə veteran, 2-ci qrup Qarabağ əlili İlham Civişovu yumruqlamasını əks etdirən videogörüntülər onları çox sarsıdıb: “Ağsaqqal veteran İlham Civişov onu vuran Ramiz Şəmmədova sual verib ki, “məni niyə vurursan”. O da cavabında “yaxşı edirəm” deyib. Həmdə bu hadisə günün günorata çağı Civişovun ailə üzvlərinin, həyat yoldaşı və yeniyetmə oğlunun gözü qarşısında baş verib. Civişov döyüşlərdə düşməni məhv edib torpaqlarımızın müdafiəsində duran zaman Ramiz kimiləri görəsən hardaydı? Yaşının az olmasını nəzərə alsaq, yəqin ki, Ramiz top-tüfəng səsi gələndə anasının yanına qaçıb, onun qucağında gizlənirmiş. Amma indi Ramiz böyüyüb, vəzifə sahibi olub, hələ çiynində paqonu da var. Ramizin qolu güclənib və qarşısındakının kimliyinə varmadan ona qapaz da vurur. Bu biabırçılıqdır! Budurmu cəmiyyətimizin vətən qoruyucusuna, əsl döyüşcüyə qoyduğu hörmət və bəslədiyi münasibət?”

Şikayət müəllifləri bildirilər ki, onlar mətbuat vasitəsiylə bütün Qarabağ veteranlarını və əlillərini bu haqsızlığa reaksiya verməyə çağırırlar: “Ramiz Şəmmədovun əməlinə etiraz əlaməti olaraq, 8 mart tarixində, saat 12.00-da Qazax şəhər məhkəməsinin qarşısında mitinq keçirəcəyik. Veteranları, vətəndaşları bu mitinqdə fəal iştirak etməyə dəvət edirik. Veteran, əlil silahdaşımız İlham Civişovu, ailəsi və ictimayyət qarşısında rüsvay edən Ramiz Şəmmədovun cəzalandırılması və tutduğu vəzifədən kənarlaşdırılmasıyla bağlı tədbirlər görməyi və müvafiq dövlət orqanlarına rəsmi müraciət etməyi tövsiyə edirik. Düşünürük kiŞ Ramiz Şəmmədov mütləq cəzalanmalıdır. Çünki bu hadisə unudulası və həzm olunası bir əməl deyil”.

Qazax veteranları bildirilər ki, onlar bu məsələylə bağlı Beynəlxalq Əlillər Cəmiyyəti İctimai Birliyinin sədri Tahir Xudiyevə və Qarabağ Müharibəsi Əlilləri, Veteranları və Şəhid Ailələri Ictimai Birliyinin sədri: Mehdi Mehdiyevə müraciət ünvanlayıblar: “Mətbuat vasitəsiylə bir daha xahiş edirik ki, Ramiz Şəmmədovun məsuliyyətə cəlb olunması üçün səylərini əsirgəməsinlər”.

Şikayətçilərin sözlərinə görə, 17 fevral 2017-ci il tarixdə Beynəlxalq Əlillər Cəmiyyəti İctimai Birliyinin sədri Tahir Xudiyev onlara məktub yazaraq, məsələ ilə bağlı öz mövqeyini belə bildirib: “Bir ictimai birlik kimi, biz də RAmiz Şəmmədovun bu hərəkətini pisləyirik, sizinlə həmrəy olduğumuzu bildiririk”.

Qazax rayonundan olan veteranlar sual edir ki, müharibə şəraitində olan bir ölkədə döyüşcü-əlilə qarşı belə münasibətə və davranışa nə ad qoymaq olar? Onların sözlərinə görə, əgər buna məhkəmə icrası adı qoymağa çalışsaq, alınmayacaq: Məhkəmə icrası qapaz-yumruqla olmur. Nəinki veteran-əlilə qarşı ümumiyyətlə, vətəndaşa qarşı bu cür kobud davranış mədəniyyətsizlik və vəzifə səlahiyyətindən sui-istifadə etməkdir. Vurandan sonrada “yaxşı edirəm” sözü məmura yaraşmayan bir ifadədir. Cənab Prezident İlham Əliyev mütamadi olaraq məmurları vətəndaşlarla nəzakətlə davranmağa çağırır. Lakin cənab prezident, Ramiz kimiləri Sizin siyasətinizin və tövsiyələrinizin əksinə getməklə dövlət maraqlarını öz maraqlarına qurban verir. Düşünürük ki, Ramiz kimi şəxslər dövlətə ləkədir. Həmin videogörüntüdə Ramiz Şəmmədova 400 manat rüşvət verilməsi faktı da öz əksini tapmışdır. Ramiz Şəmmədov isə susmaqla pulu aldığını özü də bilmədən isbat etmişdir”.
Mürəaciət müəllifləri sonda dövlət başçısından bu məsələ ilə bağlı tədbir görülməsi barədə göstəriş verməsini də xahiş edirlər: “Hörmətli Ali Baş Komandan! Biz baş vermiş bu məsələylə bağlı Qazax rayom Məhkəməsinin sədri Məhərrəm Allahverdiyevdən də narazı və şikayətciyik. Bu hadisənin üstündən 3 ay keçsə də, Ramiz Şəmmədov cəzalanmayıb. Cəzasızlıq mühiti isə belə halların çoxalmasına səbəb olur. Qazax rayon Məhkəməsinin sədri Allahverdiyev Məhərrəm Ələkbər oğlunun bu məsələyə yanaşmasını isə biganəlik kimi başa düşürük. Çünki bu hadisə də məsuliyyətin 50 faizi də məhkəmə sədrinin üzərinə düşür. Məhərrəm Allahverdiyev arada bir maddi maraqlarını kənara qoyub tabeçiliyində olan işcilərinə nizam-intizam və insanlarla qanuna uyğun, mədəni davranış qaydalarını aşılasa, heç də pis olmazdı.

Cənab Prezident! Azərbaycan döyüşcülərinin Ali Baş Komandanı kimi bütün Qarabağ Veteranları, Əlilləri və Şəhid Ailələri adından Sizdən xahiş edirik səsimizə səs verin! Siz həmişə xalqın yanında olmusunuz. Xalq da həmişə Sizin yanınızdadır! Bird aha xahiş edirik ki, ədalətin bərpa olunmasında yardım edəsiniz və Ramiz Şəmmədovun vəzifədən kənarlaşdırılması və cinayət məsuliyyətinə cəlb olunmasıyla bağlı tapşırıq verəsiniz”.

Samir