Rektordan şikayətlənən keçmiş döyüşçü Arif Paşanın qohumları şantaj və təhdidlərlə üzləşib

Redaksiyamıza müraciət edən Sabunçu rayonu, Musabəyov küçəsi ev 23 b-də yaşayan Hafiz Novruzov Bakı Slavyan Universitetinin rektoru Kamal Abdulladan şikayətlənən keçmiş döyüşçü Arif Paşanın qohumlarının şantaj və təhdidləri ilə üzləşdiyini deyir.
Novruzovun sözlərinə görə, Bakının Füzuli küçəsi 36, mənzil 67-də qeydiyyatda olan Ziyadə Yusif qızı Paşayevanın etibarnamə ilə qanuni nümayəndəsidir: «O, Türkiyə vətəndaşı olan həyat yoldaşı Əli Çoşkunun Bakı Slavyan Universitetinin yeməkxanasını ayı 1500 dollar olmaqla icarəyə götürdüyünü, lakin müəyyən müddət sonra universitet rəhbərliyi tərəfindən aldadıldığını, həmçinin, rektor Kamal Abdullanın müxtəlif vaxtlarda ondan və ərindən ümumilikdə 44090 manat pul alaraq mənimsədiklərini iddia edirdi.
Onun bu sözlərinə inanıb, qanuni nümayəndəsi kimi işlə məşğul olmağa başladım. Lakin ilkin araşdırma zamanı aydın oldu ki, Ziyadə heç də iddia etdiyi kimi dürüst deyil. O, faktları təhrif edərək, məni perspektivi olmayan bir çirkin prosesə cəlb eləmək istəyirdi. Bu səbəbdən də onu gələcəkdə perspektivi olmayan məhkəmə və digər orqanlarda təmsil etməkdən imtina etdim. Elə həmin gündən də Ziyadə və oğlunun təhdid, şantaj və digər təzyiqləri il üz-üzə qaldım».
H.Novruzovun sözlərinə görə, dəfələrlə real vəziyyəti qarşı tərəfin diqqətinə çatdırsa da, xeyri olmayıb: «Məni keçmiş döyüşçü Arif Paşanın adı ilə də hədələdilər və bu gün də belə təhdidlərini davam etdirirlər. Hətta məni şantaj edirlər ki, guya mən Kamal Abdulladan rüşvət alaraq, geri çəkildim. Mənə çox iyrənc mesajlar yazan, təhdid edən bu adamlarla bağlı artıq hüquq-mühafizə orqanlarına da müraciət etmişəm. Gözləyirəm və ümid edirəm ki, hüquq-mühafizə qurumları faktları araşdırıb, tədbirlərini görəcəklər».