Naxçıvan Dövlət Universitetinin keçmiş rektoru İsa Həbibbəylidən sonra Slavyanın rəhbəri Kamal Abdulla diplom alverçisi Şəlalə Hüseynova ilə tələyə salınıb “vuruldu”; eyni qruplaşmadan olan sabiq rektorlara qarşı “səlib yürüşü”ndə növbə kimindir?

Kamal Abdullanın Bakı Slavyan Universitetinin rektoru vəzifəsindən azad olunmasının şok təfərrüatları məlum olub. Bu barədə “Gündəm-xəbər”ə səhih məlumat verən qaynağımız qeyd edir ki, hər şey bir neçə gün ərzində həll olunub.
Bakı Slavyan Universitetinin müəllimi Şəlalə Hüseynovanın diplom satması rektorun müqəddəratını müəyyənləşdirib. Ali təhsil haqqında diplom təşkil edəcəyi adı ilə 8 min manat pul tələb edərək həmin məbləğin 3.700 manatını alıb, sonradan qalan 4.300 manatını alarkən cinayət başında yaxalanan müəllimə əslində K.Abdullanın “vurulması” üçün qurulan tələ olub.
Mənbə bildirir ki, Ş.Hüseynova barəsində fakta görə Cinayət Məcəlləsinin 178.3.2 (dələduzluq) və 310-cu (vəzifəli şəxsin səlahiyyətlərini mənimsəmə) maddələri ilə cinayət işi başlanıb. Onun hazırda həbsdə olduğu və səhhətinin də ağırlaşdığı bildirilir.
Mənbə bildirir ki, K.Abdulla naxçıvanlıdır və bu qruplaşmaya qarşı başlanmış “səlib yürüşü” davam edəcək. Qaynağımız qeyd edir ki, Ş.Hüseynova sırf planlaşdırılan əməliyyatdır. Onun ardınca faktdan istifadə edib, rektoru vəzifədən atmaq istəyiblər.
“Gündəm-xəbər”ə danışan özəl qaynağımız deyir ki, əslində isə K.Abdulla universitet kimi yemli obyektdən məhrum edilərək, quru və formal bir vəzifəyə təyin olunub. Halbuki, BSU-də dövr edən pullar və buradakı imkanlar müşavirlikdən qat-qat üstün idi. Ona görə də K.Abdulla əslində “vurularaq” vəzifəyə təyin olunub.
Hazırda 3 prorektor arasında seçim edilir. Rektor vəzifəsinə gətirilməsi gözlənilənlərdən biri Elmi işlər üzrə prorektor Seyfəl Həsənov, digər namizəd isə Tədris işləri üzrə prorektor Asif Hacıyevdir. Ancaq daha çox rektor təyin edilməsi gözlənilən namizəd deputat Sahibə Qafarovadır. Beynəlxalq əlaqələr üzrə prorektor olan Sahibə xanım millət vəkili və Azərbaycanın AŞPA-dakı nümayəndə heyətinin üzvü olduğu üçün onun rektor təyin edilməsi daha real görünür.
Mənbəmiz bildirir ki, K.Abdullaya “tikilən torba” Ş.Hüseynovanın diplom alverçisi olması ilə şərtləndirilirsə, onun vəzifədən çıxarmaqda məqsəd naxçıvanlı trionun hakimiyyətdə zəiflədilməsidir. Bundan əvvəl trio olan Naxçıvan Dövlət Universitetinin rektoru İsa Həbibbəylinin istefası, indi K.Abdullanın yola salınması belə deməyə əsas verir ki, növbə Bakı Dövlət Universitetinin rektoru Abel Məhərrəmova çatıb. Sadəcə, BDU-dakı aksiyadan dərhal sonra onun istefaya göndərilməsi böyük rezonans doğura bilərdi. BDU rektorunu hədəfdən yayındırmaq, şimşəkləri üzərindən çəkmək və diqqəti başqa istiqamətə yönləndirmək üçün K.Abdulla nişan seçildi.
Mənbə qeyd edir ki, A.Məhərrəmov mətbuatın gündəmindən çıxandan sonra prezident sərəncamı ilə yola salınacaq. Çünki hökumət artıq yeni strategiya seçib. Ona problem yaradan, adı tez-tez qalmaqalda çəkilən, ümumiyyətlə cəmiyyətin bilmərrə şəkildə qəbul etmədiyi məmurları yola salmaq xəttini tutub. Çünki əvəzolunmaz məmur yoxdur və istənilən perspektivli şəxsi təyin etmək olar.
Bunu da təhsil naziri, əmək naziri, metropoliten sahələrində müşahidə etmişik. Eyni zamanda naxçıvanlı üçlüyün taxtdan salınması planları işə düşüb. Artıq iki rektor - İ.Həbibəyli və K.Abdulla işdən çıxarılıb, sonuncu plan da yerinə yetirilsə, arsenalda yeni proseslər cərəyan edə bilər. Əldə etdiyimiz xəbər görə, İ.Həbibbəyli, K.Abdulla və A.Məhərrəmov hakimiyyətdə eyni qruplaşmaya daxildir. Onların arasında dostluq münasibətlərinin də olduğu qeyd edilir.
Güman olunur ki, hər üç naxçıvanlı kadrın hədəfə alınması sırf iqtidardakı ikinci güc tərəfindən planlaşdırılıb. Belə ki, onların istefasına nail olmaqla köhnə qvardiyanın zəifləmiş, öləzimiş göstərilməsi ictimai rəydə böyük fikir yaradacaq.
Mənbə bildirir ki, yaxın vaxtlarda daha səs-küylü istefalar gözlənilir: “Misir Mərdanov, Füzuli Ələkbərov, Aydın Bəşirov, bir neçə icra başçısı, metro rəisi və s. dəyişdirilib. Hökumət birdəfəlik islahatlara gedə bilmir. Çünki köhnə qvardiya təzyiq edir və qocaman məmurlar kreslonu buraxmırlar. Prezident də tədricən hissə-hissə fürsət düşən kimi onları yola salır. Onlar qalması hökumətə sərf etmir. Prezident komandasında onları görmək istəmir.
Bu mənada Abel Məhərrəmovun da istefası istisna deyil. Həmçinin, onun postuna göz dikənlər var. İsa Həbibəyli də vəzifəsiz qalmadı, akademiyada müavin qoydular. Misir Mərdanovu da boş buraxmadılar, fizika institutuna rektor təyin etdilər, Kamal Abdulla da işsiz qalmadı. Amma ümumilikdə bu proses naxçıvanlı qruplaşmanı hakimiyyətin orbitindən çıxarmaq məqsədi güdür”.
Mənbənin sözlərinə görə, Paşayevlərin iqtidarda güclənməsi istiqamətindən gedən işlərin miqyası böyüyəcək. Bunu islahatlar paketi adı altında həyata keçirib, çoxlu sayda məmuru işdən uzaqlaşdıracaq, ya da rütbəsini endirəcəklər.
Daha aşağı ranqlı vəzifələrə təyin etməklə onları zəif duruma salmağa çalışacaqlar. Əslində Paşayevlərin iqtidarı birdəfəlik götürmək planı var idi. Amma bu, baş tutmadı. 2013 seçkilərindən sonra bu klanın hakimiyyətə bütövlükdə yiyələnməsi üçün təkamül yolu seçildi. Tədricən, köhnə qvardiyanı komandadan uzaqlaşdırmaq və ölkəyə sahiblənmək strategiyası qüvvədə qalır”.
Son olaraq qeyd edək ki, bu proseslərin daha qızğın və amansız şəklini mətbuat səhifələrində görəcəyik. Həmçinin, istefalar dalğasının Novruz bayramı ərəfəsində və sonrası davam etdiriləcəyi proqnoz olunur.
Rafiq Qara