Abşeron RİH-nin nümayəndəsi Hüseyn Seyidov torpaq satmaqla məşğuldur...

Bakı şəhəri, Maştağa qəsəbəsi, Subtropik sovxoz, ev 42 ünvanda yaşayan Bağırov Zülfüqar Babacan oğlu redaksiyamıza müraciət etmişdir. Müraciətdə qeyd olunur ki, biz 50 ildir adına “Subtropik” yaşayış massivi deyilən yerdə yaşayırıq. Mənim atam da, anam da burada yaşayıb və dünyalarını dəyişiblər. Hal-hazırda mənim 15 nəfərlik ailə üzvlərim burada yaşayır. Oğlanlarım, onların ailələri bu qəsəbənin sakinləridir.
03 mart 2008-ci il tarixdə Abşeron rayon icra hakimiyyətinin adından Maştağa “Subtropik” kənd təsərrüfatı müəssisəsinin direktoru Seyidov Hüseyn Yunis oğlu ilə müqavilə imzalayaraq torpaq sahəsini icarəyə götürmüşəm. Müqavilə Abşeron rayon icra hakimyyəti başçısının 28 dekabr 2006-cı il tarixli 499 saylı sərəncamı əsasında hazırlanıb. Həmin müqavilədə torpaq sahəsinin sərhədləri də müəyyən edilməklə mənim ailəmin istifadəsinə verilmişdir. Sərəncamda torpaq sahəsinin icarəyə 11 il müddətinə ayrılması göstərilmişdir.
Zülfüqar Bağırov sonra qeyd edir ki, mənim xəbərim olmadan hazırda Abşeron rayon icra hakimiyyəti başçısının nümayəndəsi olan Hüseyn Seyidov mənə ayrılmış torpağı qanunsuz olaraq başqa şəxslərə satıb. Və həmin şəxslər mənim icarəmdə olan torpaq sahəsində özləri üçün ev tikirlər. Dəfələrlə bu barədə Hüseyn Seyidova, Abşeron rayon icra hakimiyyətinə şikayət etsəm də heç bir faydası olmayıb.
Şikayətçi daha sonra Hüseyn Seyidovun qanunsuz əməllərindən, korrupsiyaya qurşanmasından bəhs edir.
Abşeron rayon icra başçısının “Subtropik” yaşayış massivi üzrə nümayəndəsi Hüseyn Seyidov bizim ailənin sayına uyğun olaraq bizə torpaq sahəsi vermir. Hüseyn Seyidov torpaqları satıb pullarını mənimsəyir. Kənd rayonlarından gələn şəxslərə rüşvətlə 4-5 hektar torpaq verir, biz 50 ildir burada yaşamağımıza baxmayaraq bizə torpaq vermir. Hüseyn Seyidov 20 hektar torpağı göstərərək yalandan deyir ki, bura prezident İlham Əliyevindir sizə verə bilmərəm.
Mən başa düşmürəm ölkə başçısının Maştağada 20 hektar torpaq nəyinə lazımdır..? Əlbəttə qəsəbə nümayəndəsi bunu yalandan deyir ki, camaata torpaq verməsin.
Abşeron Rayon İcra Hakimiyyətində iqtisadçı işləyən Qara Qurbanov, Abşeron torpaq şöbəsindən Mübariz Vəliyev Hüseyn Seyidovla əlbir olub torpaqları satırlar. Görəsən, Korrupsiyaya qarşı mübarizə İdarəsi hara baxır..?
Hüseyn Seyidov 2 uşaqlı ailəyə qanunsuz olaraq 4 hektar torpaq sahəsi verir. İcra nümayəndəsi özü üçün 7 hektar torpaq sahəsi götürüb. Əvvəlki torpağını başqasına satıb.
Dövlətin kömək üçün əkinçilərə, sahibkarlara verdiyi subsidiya kartlarını Hüseyn Seyidov yığıb cibində saxlayır. Nə üçün? Məqsəd nədir..? Yəqin ki, dövlətin ayırdığı pulları mənimsəmək...
Müraciətin sonunda 15 nəfərlik ailənin başçısı olan Zülfüqar Bağırov ölkə başçısından onun və ailə üzvlərinin hüquqlarının qorunması üçün müvafiq dövlət orqanlarına, Abşeron RİH-nin başçısı Zakir Fərəcova göstəriş verməsini xahiş edir.
Şikayətçinin bizə təqdim elədiyi fotolarda bir çox iri məmurların Maştağa ərazisindəki torpaq sahələri əks olunub. Dünən icra başçısının müavini şikayətçiləri qapıdan qovalayıb..

Fərid