İcra başçısının iş adamına “biznes güzəştlər”i
Saatlı rayonunda cərəyan edən özbaşınalıq faktları ilə bağlı məlumatlar var. Rayondakı qaynağın verdiyi xəbərə görə, icra başçısı Siracəddin Cabbarov rayondakı bütün obyektləri rəsmən satışa çıxarıb. Deyilənlərdən belə aydın olur ki, icra başçısı rayona müştəri də tapıb.
Mənbənin söylədikləri: “Siracəddin Cabbarov demək olar ki, rayonu Rusiyada yaşayan iş adamı Əlizaman Sabir oğlu Rəhimova satıb. Rayon mərkəzindəki “Muğan” restoranı Əlizaman Rəhimova 30 min dollara satılıb. Heydər Əliyev prospektində yerləşən xəstəxananın yanındakı 3 min kvadratmetrlik torpaq sahəsi, eyni ünvandakı meşə zolağının ərazisindəki 2 böyük restoranın sahəsi - 2 hektardan çox ərazi Əlizaman Rəhimova satılıb”.
Bundan başqa mənbə bildirir ki, rayonu Əlizaman Rəhimova satmaqla kifayətlənməyən Siracəddin Cabbarov iş adamının bacısı oğlunu icra hakimiyyətində ərazi idarəetmə şöbəsinin müdiri vəzifəsinə təyin edib. Bunun müqabilində isə o, Əlizaman Rəhimovdan 100 min manat alıb. Rayondan verilən xəbərdə qeyd olunur ki, tərəflər arasında “sövdələşmələr” bu gün də davam edir: “Saatlının mərkəzindəki “Muğan” parkı da iş adamına satılacaq. Və bununla bağlı bazarlıq da gedir”. Hazırda Siracəddin Cabbarov Rusiyanın Kislovodsk şəhərində dincəlir. Əslində, bu həm ziyarət, həm də ticarətdir. Çünki orada icra başçısı Əlizaman Rəhimovla görüşərək bazarlıqlarını davam etdirirlər”.
Rasim