Axşam saat 18-də qaralan hava bir də səhər saat 7-də işıqlanacaq!

gundemxeber.az Quran oxusaq bilərdik ki, dekabrın 21-də heç bir qiyamət-zad olmayacaq. İstəyirsiz evinizin bir küncündə qalmış, amma buna heç layiq olmayan kitabı mən açım oxuyum: “Həqiqətən, o saatı (qiyamətin qopacağı vaxtı) ancaq Allah bilir.” (Loğman curəsi, 31-ci ayə). Və ya Naziat surəsi, 42-44-cü ayələrə diqqət yetirək: “Ya Peyğəmbər! Müşriklər səndən o saatın nə vaxt gələcəyi (qiyamətin nə vaxt qopacağı) barəsində soruşarlar. Sən onu (onun vaxtını) nə bilirsən?! Onu sonuna qədər (bütün təfərrüatı ilə) bilmək ancaq sənin Rəbbinə məxsusdur”.
Başqa vaxt kəlməbaşı bu kitaba and içərək onun ən düzgün mənbə olduğunu bildirirsiniz. Nə oldu, bəs indi niyə ona inanmırsınız?
Açığı, bu mövzuya toxunmağı belə səviyyəsizlik sanırdım. Amma vaxt yaxınlaşdıqca hətta ictimaiyyətimizin tanınmış simalarının da təlaşa düşməsi qələmi əlimə götürməyə vadar etdi. Məsələn, o gün saytdan oxuyuram ki, xalq artistimiz Amaliya Pənahova qiyamətə hazırlaşır. Digər tanınmışlar, o cümlədən ətrafımda olan və həmişə ağlına qiymət verdiyim şəxslərin də dərin təlaşa düşməsi belələrini ayıltmaq istəyinə düşməyimin əsas səbəblərindəndir. Gör savadlılarımız bu gündədirsə, zavallı təhsilsizlər nələr çəkir… Ey cəhalət əhli, yuxarıda Qurani-Kərimdən gətirdiyim ayəni gördünüz. Bəs başa düşdünüzmü ki, qorxduğunuz qiyaməti sizi yaradan Allahdan başqa heç kim bilə bilməz?! İndi bildinizmi ki, uca rəbbimiz bu saatın nə vaxt olacağını hətta hamıdan üstün tutduğu peyğəmbərinə də bildirməyib! Əgər bu ayəni gördükdən sonra yenə ürəyinizdə şübhə varsa onda kişi kimi deyin ki, biz Qurana inanmırıq…
İndi isə ateistləri başa salaq (onsuz da hazırda cəmiyyətimizin az qala yarısı ateistdi və Allahın adını yalnız yas mərasimində kiməsə “Allah rəhmət eləsin, Allah səbr versin” deyəndə dillə gətirirlər). Ey mənim ateist dostum, əgər dinə xurafat, özünə elmli deyirsənsə onda de görüm min illər bundan əvvəl yaşamış və səmada adi gözlə görünənlərdən başqa heç nə görməyən mayalılar hardan bilirdilər ki, düz bu vaxt – 2012-ci il dekabrın 21-də yerə hansısa səma cismi toxunacaq və həyat məhv olacaq. İndi deyirsiz ki, yaxşı, qiyamətin olmayacağını tutarlı əsaslarla sübut etdin, onda bu qaranlq söhbətinə nə deyirsən?
Bəli, həmin gün qaranlıq olacaq! Ay haray, tədbir görün, mütləq qaranlıq olacaq! Bu qaranlıq düz 13 saat davam edəcək! Dekabrın 21-i axşam saat 18-də qaralan hava bir də səhər saat 7-də işıqlanacaq! Hə, necədi? Bəs min il əvvəlki “Maya bacı”dan tutmuş indiki əhlikeflərə qədər hamı siz qorxaqlarla məzələnə bilir, mən məzələnə bilmirəm?!
Zarafatı bir kənara qoyub bu qaranlıq məsələsinin daha eybəcər yalan olduğuna baxaq. Ay mənim bazarlarda şam qoymayan qardaşım, həmin gün qaranlığın olması üçün hansı elmi əsas var? Əhlikeflər bildirir ki, o gün Günəş sistemi böyük bir qaranlıq boşluqdan keçəcək. Yaxşı, Quran oxumursan, heç olmasa Quranın digər əmrinə uyğun olaraq elm öyrən, hərdən Astronomiya kitabını vərəqlə! Onsuz da fəza qaranlıqdan ibarətdi. Kainata səpələnmiş cisimlərin təxminən 1/200-i tam işıqsızdı. Bu işıqsızlar digər nəhəng işiqlı ulduzun hesabına işıqlanır. Məsələn, sənin yaşadığın və dağılmasından qorxduğun Yer kürəsi yalnız özündən 109 dəfə böyük olan Günəşdən işıq alır. Biz elə hər gün Günəşlə birgə qaranlıq fəzada üzürük. Məhz həmin gün qaranlıq necə ola bilər?
Bəzi əhlikeflər isə bildirir ki, həmin gün planetlərin hit-paradı baş verəcək və yer qaranlığa qərq olacaq. Özü qədər eybəcər fikir hələ eşitməmişdim. Hətta səsi quyunun dibindən çıxan və bir dənə də olsun yaddaqalan mahnısı olmayan Səməd Səmədovun xalq artisti adı alması kimi dəhşətli xəbər də mənə bu qədər eybəcər görünməmişdi. Günəş sistemində hətta neçə planetin olmasını da bilməyən elmsizlərə üz tuturam: o gün planetlər eyni xətt üzrə düzülsə belə, bizimlə Günəş arasında olan cəmi 2 planet var ki, onlar da qaranlıq yarada bilməz! Ən sadəsi ona görə ki, həmin planetlər – Merkuri və Venera Yerdən də balacadı və heç bir halda onların kölgəsi yerə qədər uzana bilməz! Fizika oxusaydınız bilərdiniz ki, kölgənin davamlılığı sırf həmin cismin həcmiylə mütənasibdir. Belədə Yerlə ən yaxın halda 40 milyon km məsafədə yerləşən Veneranın hansısa kiçicik də olsa qaranlıq yaradacağından söhbət belə gedə bilməz!!!
İnanıram ki, sadə insanlar üçün çox sadə yazdığım bu yazımı oxuyacaq vətəndaşlarımız bundan sonra pulunu havayı yerə şam və konservlərə verməyəcək… Hansısa əhlikeflərə yox, Allaha inanın! Onda nəinki qaranlıq, hətta Qiyamət də sizi qorxuda bilməz!

Ruslan Aqil