Məhkəmə sədri İman Nağıyevin rəhbərliyi altında məhkəmə maxınasiyaları

Bakı Apellyasiya Məhkəməsinin sədri İman Nağıyev üçün Azərbaycan qanunları pul qazanmaq vasitəsinə çevrilib. Ara-sıra Bakı Apellyasiya Məhkəməsində İman Nağıyevin tapşırıqları ilə məhkəmə komediyaları quran hakimlər artıq bu tapşırıqları yerinə yetirməkdən cana doyublar. Bu isə İman Nağıyevi hakimlərə qarşı qəzəbləndirib.
"Gündəm Xəbər"ə daxil olan məlumatlarda bildirilir ki, məhkəmə sistemində əmək fəaliyyətinə Yasamal Rayon Xalq Məhkəməsində tərcüməçi kimi başlayan və 8 il bu vəzifədə çalışmış Bakı Apellyasiya Məhkəməsinin hazırkı sədri İman Nağıyev tabeliyində olan 46 hakimi tutduğu vəzifənin imkanlarından sui-istifadə etməklə, təzyiq altında saxlayır.

Qanun şah deyil, sədr qanundur

“Məhkəmə hakimlərindən heç biri onun tapşırığını geri çevirmək cəsarətində deyillər. Sədr istənilən iş üzrə hansı tapşırığı verirsə, 46 hakimin hər biri də həmin tapşırıq üzrə qərar çıxarırlar.
Maraqlısı budur ki, qanunsuz qərarlarının Ali Məhkəmədə ləğv olunma ehtimalını nəzərə alan həmin hakimlər və şəxsən sədr İman Nağıyev yuxarı instansiya məhkəməsinə də «əl uzatmaq»dan da çəkinmirlər. Nəticədə Ali Məhkəmə də saxta və əsassız qərarları qüvvədə saxlamaqla, Avropa İnsan Haqları Məhkəməsinə göndərilən işlərin sayını çoxaltmış olurlar. Bu isə Azərbaycana zərbədir.” Bu sözləri qəzetimizə tanınmış vəkillərdən biri deyib. Onun sözlərinə görə, İman Nağıyev və hakimlər iş üzrə əvvəlcə sənədlər və fakt deyil, zərərçəkən və ya cavabdeh kimdir, onlar kimlərin qohumudurlar, hansı vəzifədə işləyirlər, maliyyə imkanları necədir və sair kimi halları əvvəl araşdırırlar: “Sonra isə İman Nağıyev hansı tərəfin xeyrinə qərar çıxarılması haqda hakimə tapşırığını verir. Düzdür, pulsuz qərar demək olar ki, yoxdur. Məsələn, iri dövlət şirkətlərinin məhkəmə çəkişmələrindən tutmuş, dövlət məmurlarına qədər olan işlərin hamısında birmənalı olaraq bir pillə üstün olan tərəfin xeyrinə pul alıb qərar çıxarılır. Məmurlardan rüşvət vəkilləri vasitəsiylə alınır».
Bir müddət öncə Milli Məclisin komitə sədrlərinin birinin İman Nağıyev vasitəsiylə bir prosesi yönləndirdiyini deyən müsahibimizin sözlərinə görə, işi aparan hakimin özü açıq etiraf edib ki, sədrin tapşırığına qarşı çıxmaq gücündə deyil: "Bu və ya digər məqamlar Bakı Apellyasiya Məhkəməsinin hakimlərini də ciddi narazı salırlar. Onlar narazılıqlarını açıq ifadə etməkdən indiyədək qorxublar. Çünki dərhal həmin hakim haqda yuxarılara yanlış məlumatlarla zəngin elə dosye hazırlanır ki, o, bir aya işindən qovula bilər".

Məhkəmə sədrinin özbaşınalıqları

Əslinə Bakı Apellyasiya Məhkəməsinin sədri İman Nağıyevin özbaşınalıqları bununla yekunlaşmır. Xatırladaq ki, bir müddən əvvəl Qaradağ rayonundan bir qurup sahibkar dövlət başçısı İlham Əliyevə Bakı Apellyasiya Məhkəməsinin sədri İman Nağıyevdən şikayətçı düşmüşdülər. Sahibkarlardan Ağahüseyn Ağayev, Mirzəkərim Hüseynov və Elnur Məmmədov dövlət başçısından Bakı Apellyasiya Məhkəməsində baş verən məhkəmə komediyalarına son qoyulmasına kömək istədiklərini bildirirdilər.
Ancaq İman Nağıyev bunun fərqində deyil. Görünür məhkəmə sədri böyük pullar qazanmaq şansını əldən vermək istəmir. Belə məlumatlardan birini isə redaksiyamıza tanınmış vəkil Əliabbas Rüstəmov verib. Məlumatlarda İman Nağıyevin qanunsuz hərəkətləri və məhkəmə işləri üzrə kimlərdən nə qədər rüşvət aldığı barədə bildirilir. Əliabbas Rüstəmov "Gündəm Xəbər"ə İman Nağıyevin sifarişli tapşırıqları əsasında qanunsuz həyata keçirilmiş məhkəmə qərarlarından danışıb. Bunlardan biri də hal hazırda iş üzrə Ali Məhkəmədə kasasiya şikayəti verilimiş “Azərkimiya” Dövlət Şirkəti ilə bağlıdır. Ə. Rüstəmov qeyd edir ki, bir neçə ofşor şirkətin rəhbəri Məmmədov Elçin İbrahim oğlu “Azərkimiya” Dövlət Şirkətinin əvvəlki rəhbərliyi ilə cinayət əlaqəsinə girərək “Gilkes”, “Emerald”, “Cohtolin” və bu kimi digər ofşor şirkətlərlə saxta sənədlər tərtib edərək Azərbaycan Respublikasından dəyəri 100 milyonlarla ölçülən strateji məhsulları ölkədən qeyri-qanuni yolla çıxardıb. Bura neft-qaz məhsulları daxildir. Vəkilin sözlərinə görə, sözü gedən qeyri-qanuni biznesdən əldə olunmuş milyonlarla gəlir Elçin Məmmədovun və “Azərkimiya” Dövlət Şirkətinin keçmiş rəhbərliyinin xarici ölkələrdə adlarına olan ofşor zonalardakı digər şirkətlərin hesabına həmin vəsaitlər daxil olub. Hətta məsələ ilə bağlı Ə.Rüstəmov dəfələrlə Baş Prokurorluğa və Milli Təhlükəsizlik Nazirliyinə müraciət etsə də bir nəticə olmayıb. Lakin iş Bakı Apellyasiya Məhkəməsinə gedib çıxdıqdan sonra vəziyyət tamamilə fərqli istiqamətdə dəyişib. Ə.Rüstəmovun bildirir ki, onda olan məlumatlara görə, Elçin Məmmədov cinayət əməllərini ört-basdır etmək üçün İman Nağıyevlə anlaşıb. Bu anlaşmanın müqabilində isə Bakı Apellyasiya Məhkəməsinin sədrinə 300 min dollar rüşvət verib. İman Nağıyev isə işi Elçin Məmmədovun xeyrinə həll edib. Lakin buna baxmayaraq sonradan Ali Məhkəmə İman Nağıyevin şifarişli qərarını ləğv edib. Bundan sonra sözü gedən şirkətin rəhbərliyi İman Nağıyevə verdiyi 300 min dolları geri tələb edib. Ancaq İman Nağıyev pulu geri qaytara bilməsə də Elçin Məmmədova digər işlərində yardımçı olacağını söz verib. Vəkilin sözlərinə görə, hal hazırda Elçin Məmmədova himayədarlıq edən İman Nağıyev onun cinayət əməllərinin ört-basdır edilməsi üçün İsveçrədə bağladığı üç milyon dollarlıq borc müqaviləsinin etibarsız sayılması üzrə qətnamənin çıxarılmasına çalışır.

İman Nağıyevin pullu məhkəmə işləri

Bundan əlavə redaksiyamıza vəkil Əliabbas Rüstəmov İman Nağıyevin bir neçə pullu məhkəmə işləri ilə bağlı daha ilginc faktlar təqdim edib. Əliabbas Rüstəmovun redaksiyamıza təqdim etdiyi məhkəmə işlərindən İman Nağıyevin qarşı tərəfdən nə qədər konkret rüşvət aldığını deyib.
Ə.Rüstəmov bidirir ki, Suraxanı rayon Məhkəməsinin hakimi Mustafayev Nürəddin Yusif oğlunun 2 (010) 67/2010 saylı iş üzrə qəbul etdiyi 06 may 2010-cu il tarixli qətnaməsindən apellyasiya şikayəti verib. Lakin Bakı Apellyasiya Məhkəməsi sözü gedən işlə bağlı, Ə.Rüstəmovun iştirakı olmadan 2 (103)-3512/2010 saylı iş üzrə 08 sentyabr 2010-cu il tarixdə sözü gedən qətnaməni qüvvədə saxlayıb.
Vəkilin sözlərinə görə, bunun müqabilində birinci instansiya məhkəməsi 30,000 min dollar, Bakı Apellyasiya Məhkəməsi isə qarşı tərəfdən 50,000 min dollar rüşvət alıb. Ə.Rüstəmov özünün araşdırmaları nəticəsində müəyyən edib ki, bu sövdələşmələr məhz İman Nağıyevin rəhbərliyi altında həyata keçirilib. Bundan sonra vəkil Əliabbas Rüstəmov İman Nağıyevin özbaşınalıqları barədə yenidən dövlət başçısı İlham Əliyevə və aidiyyatı üzrə qurumlara mürəciət edib. Lakin nədənsə bu səfər də İman Nağıyevə "gözün üstə qaşın var" deyən tapılmayıb.

Məhkəmə sədrindən daha bir qanunsuzluq

Məhkəmə işləri ilə bağlı vəkil Əliabbas Rüstəmov digər bir məsələyə də toxunub. Bu "Arif-Servis" MTK-nın işi ilə bağlıdır. Burda da Əliabbas Rüstəmov bildirir ki, bu səfər İman Nağıyev onun özünün üzərinə qarşı hücuma keçib. Vəkilin sözlərindən belə aydın olur ki, İman Nağıyev Əliabbas Rüstəmovla köhnə ədavətini aparıb. Səbəb isə Ə.Rüstəmovun İman Nağıyevdən İlham Əliyevə və müvafiq instansiyalara şikayət etməsi olub. Bu səfər Əliabbas Rüstəmova məxsus torpaq sahəsinin əlindən alınması üçün İman Nağıyev qarşı tərəfdən 130,000 min ABŞ dolları alaraq onların xeyrinə qərardad şıxarıb. Bu və digər pullu məhkəmə işləri barədə qəzetimizin növbəti saylarında oxuya biləcəksiniz. Araşdırmalarımız davam edir.
Məsələ ilə bağlı qarşı tərəfin mövqeyini dərc etməyə hazırıq.

F. Əkbərli