Bir neçə şəxs məhkəmə binasının dəmir pəncərələrini kəsərək binaya daxil olub


Bakının Nərimanov rayonunda bir neçə şəxs məhkəmə binasının dəmir pəncərələrini kəsərək, binaya daxil olub. Onların məqsədi heç də oradan hansısa mühüm sənədləri oğurlamaq olmayıb. AzNews.az-a istinadən xəbər görə məhkəmə binasına girən şəxslər binanın hər tərəfinə məhkəmə sistemini, hakimləri və onların çıxardığı qərarları hədəfə alan təhqiramiz ifadələr yazıblar. Məhkəmənin önündə polislərin keşik çəkmələrinə baxmayaraq, binaya daxil olan şəxslər koridarlara və iclas zallarına yüzlərlə təhqiramiz yazı yazıblar.

Bildirilir ki, binaya girən şəxslər ötən ay Nərimanov rayon Məhkəməsinin hakimlərindən birinin çıxardığı qərara etiraz etmək üçün bu addımı atıblar. Məsələnin ictimailəşməsini istəməyən məhkəmə rəsmiləri binadakı yazıların silinib təmizlənməsi üçün təyin olunmuş bütün prosesləri təxirə salıblar.

Məsələ ilə bağlı Nərimanov rayon Polis İdarəsində araşdırma başlanıb. Hadisəni törədən şəxslər axtarılır.

Qeyd edək ki, bazar günü olduğu üçün Nərinamov rayon Məhkəməsindən telefonlarımıza cavab verən olmadı. Ancaq Nərimanov rayon Polis İdarəsindəki mənbələrimiz hadisənin baş verdiyini təsdiqlədilər.