Sahibkar: “Ya icra başçısı pulumu qaytarsın, ya da məni vətəndaşlıqdan çıxarın”

“Zərdabın icra başçısı Lütfəli Babayev pulumu qaytarmaq istəmir. O, mənim 65 min dollarımı mənimsəyib. Mingəçevirdə icra başçısı işlədiyi dövrdə Lütfəli Babayev 65 min dollar pulu ölkə başçısı İlham Əliyevin Mingəçevirə səfəri öncəsi şəhərdə yerləşən Heydər Əliyev adına parkı təmir etmək adı ilə alıb. Amma həmin söhbətdən sonra nə İlham Əliyev Mingəçevirə gəldi, nə də ki, park təmir olundu. Babayev pulu mənə “atdı” və 2007-ci ildən bəri haqqımı ala bilmirəm. Görünür, ölkə başçısının sahibkarların və vətəndaşların hüquqları ilə bağlı verdiyi tapşırıq Lütfəli Babayevə aid deyil”.

Bunları “Bizim Yol”a sahibkar Fəqan Nəsibov bildirib. Sahibkar deyir ki, uzun müddətdir icra başçısı ilə arasında olan çəkişmə həll edilmir. Onun sözlərinə görə, artıq heç bir dövlət orqanı məsələni araşdırmaq istəmir, tək çıxış yolu ailəvi şəkildə Azərbaycan vətəndaşlığından imtina etməkdir: “İcra başçısı etdiyi əmələ görə, prezident seçkisi ərəfəsində hökuməti pis vəziyyətə qoyub. Artıq Azərbaycanda hər kəs bilir ki, Lütfəli Babayev mənim 65 dollarımı dələduzluq yolu ilə mənimsəyib. Ona dəfələrlə müraciət etmişəm, bu məsələnin ictimailəşməsini istəmədiyimi bildirmişəm. Lakin nəticəsi olmayıb. Ona görə də məcbur qalıb mətbuata bu barədə danışmışam”.

İş adamı icra başçısının ailə üzvləri ilə, Lütfəli Babayevin qardaşı Xanəli Babayevlə, bacısı oğlu, həm də sürücüsü ilə, kürəkəni ilə görüşərək məsələnin həllinə çalışıb. Qarşı tərəf problemin ictimailəşdirilməməsi qarşılığında və mətbuata təkzib verilməsi şərti ilə 65 dolların qaytarılacağına vəd verib. Sonuncu vədi sahibkara bu günlərdə icra başçısının kürəkəni verib. Belə ki, iyulun 10-dan başalayaraq vəsaitin bir hissəsinin veriləcəyinə söz versə də, L.Babayevin kürəkəni də vədinəəməl etməyib.

Sahibkar icra başçısı ilə bağlı sonuncu dəfəprezident İlham Əliyevə müraciət edəcəyini bildirib: “Nəzərə alın ki, icra başsçısının dələduz əməli ilə bağlı hüquq-mühafizə orqanlarına dəfələrlə edilən müraciətim nəticəsiz qalıb. Odur ki, müraciətimdə Prezidentdən xahiş edirəm, təyin etdiyi icra başçısının vətəndaşı aldatması ilə bağlı tədbir görülməsinə tapşırıq versin, ya da mənim vətəndaşlıqdan çıxarılmağımla bağlı müavafiq tədbir görsün”.