Binə Ticarət Mərkəzindəki etiraz aksiyasında saxlanılan etirazçıların işi üzrə növbəti məhkəmə prpsesi keçirilib. Qaradağ rayon Məhkəməsindən Modern.az-a verilən məlumata görə, məhkəmədə şahidlər dindirilib, habelə polis əməkdaşları şahid qismində ifadə veriblər.

Məhkəmədə Daxili İşlər Nazirliyinin əməkdaşları bildiriblər ki, saxlanılanlar aksiyada iştirak etsələr də, polisə qarşı heç bir müqavimət göstərməyiblər.

Saxlanılanların yaxınlarının dediyinə görə, aksiya iştirakçılarına qarşı irəli sürülən ittihamlardan bəziləri yüngülləşdirilib. Belə ki, aksiya iştirakçılarının hamısının üzərindən polisə müqavimət maddəsi üzrə ittiham götürülüb.

Növbəti məhkəmə prosesi gələn həftənin birinci günü keçiriləcək

Xatırladaq ki, bu il yanvarın 19-da «Binə» Ticarət Mərkəzində fəaliyyət göstərən bir qrup sahibkar rəhbərliyin icarə haqqını qaldırmasına etiraz olaraq Bakı-Astara magistralının ticarət mərkəzinin yaxınlığından keçən hissəsini bağlamağa cəhd göstərib. Nəticədə aksiya iştirakçıları polis əməkdaşları arasında qarşıdurma baş verib, 10 polis müxtəlif dərəcəli bədən xəsarətləri alıb, bir neçə xidməti avtomobilə isə ziyan vurulub. Aksiyaçılardan da xeyli adam yaralanıb.

Etirazçılar Malik Məhərrəmov, Nicat Paşayev, Əbülfəz Əliyev, Samir Zeynalzadə, Səid Ədilov, Məhəmməd Mürsəliyev, Elnur Əliyev, Samid Hüseynov, Qüdrət Kişiyev və Vaqif İbrahimov polis əməkdaşları tərəfindən saxlanılaraq istintaq orqanına təhvil verilib.

Faktla bağlı Bakı şəhər Prokurorluğunda Cinayət Məcəlləsinin 221.3 (xuliqanlıq) və 315.2-ci (hakimiyyət nümayəndəsinə qarşı müqavimət göstərmə və ya zor tətbiq etmə) maddələri ilə cinayət işi başlanıb.