“Azərinvest” şirkəti zəlzələdən zərər çəkən evlərdə işləyənlərin pulunu vermir; 180 min manat borc qaytarılmır, icra başçısı isə deyib ki...
“Azərinvest” şirkətinə Zaqatala rayonunda deyilənə görə - “bu gün-sabah” adı qoyulub. Müxtəlif bölgələrdən gəlmiş 80-dən çox işçi bu şirkətdən əmək haqlarını ala bilmədiklərini və “get-gələ” salındıqlarını deyirlər. Onlar Zaqatala şəhərində və kəndlərində zəlzələdən zərər çəkmiş evlərdə çalışıblar.
Hacıqabulun Meyniman kəndindən Zaqatalaya işləməyə gələn Həzi Həziyev “Azadlıq” radiosuna bildirib ki, aylardır evinə geri dönə bilmir: “10 ildir hakim partiyaya - YAP-a üzvlük haqqı ödəyirəm. 10 ilin tamamında yardım üçün YAP-ın Zaqatala rayon şöbəsinə üz tutdum, amma oradan bizi polislərlə uzaqlaşdırdılar”.
Həm də müharibə veteranı olan H. Həziyev deyir ki, bütövlükdə 1700 manat alacağı var və bu məbləğin yarıdan çoxunu burada gözlədiyi müddətdə mağazalara yığılan borcuna sərf edəcək. O, Zaqatala rayon məhkəməsinə və prokurorluq orqanlarına həm şifahi, həm də məktubla müraciət etdiyini, amma indiyədək cavab almadığını da bildirir.
Əslən Naxçıvandan olan Müşfiq Əlizadə də rayona işləmək üçün üz tutanlardandır. Şikayətçi tək məhkəməyə deyil, Milli Təhlükəsizlik Nazirliyinin rayon şöbəsinə və icra hakimiyyətinə də müraciət etdiyini söyləyir:
“Haraya şikayətə getsəm, ilk öncə əmək müqaviləsinin olub-olmadığını soruşurlar. Mən də onlara hamı kimi müqavilə bağlamadan çalışdığımı deyirəm. Burda günahkar bizi görsələr də, əslində, bizi çalışdıranlardır günahkar. Axı əmək müqaviləsi bağlatdırmadan yüzlərcə işçi çalışdırmağın özü böyük qanun pozuntusu və vergidən yayınmaq deməkdir. Çalışdığımız bütün evlərdə foto çəkilişlərimiz var. Lazım gəlsə, ev sahibləri də bizə şahidlik edə bilərlər”.
Müşfiq Əlizadə öz haqlarını qorumaq üçün yerli hüquqşünasa da üz tutduqlarını və aldıqları cavabdan sarsıldıqlarını deyir:
“Rayon İcra Hakimiyyətinə müraciətdən sonra hüquqlarımızın bərpasında bizə yardımçı olacaq hüquqşünas nə desə yaxşıdır - ”Gedin, yol kəsin!". İndi hansı zəmanədir ki, biz yol kəsək? Məgər hüquqi dövlətdə yaşamırıq? Biz özümüz qanunla hərəkət edərkən, hüquqi yolla məsələni həll etmək istərkən, “hüquq adamı” bizə yolu kəsməyi məsləhət verir. Şikayətimizi bildirmək üçün rayon icra başçısı Mübariz Əhmədzadəyə yaxınlaşdıq. Onun da cavabı belə oldu: “Bura işləməyə gələndə məndən soruşmuşdunuz?”.
Yevlaxın Aran qəsəbəsindən gələn Ağaəli Əsədovun isə 4 min manat alacağı var. Bu məbləği çox çətinliklə qazandığından, belə asanlıqla qoyub heç yana getməyəcəyini deyir.
Rayon sakinlərindən də eyni duruma düşənlər var. Təkcə zəlzələdən zərər çəkmiş Muğanlı kəndindən 32 nəfər öz haqqını gözləyir. lAzərinvest» MMC-dən də cavab almaq mümkün olmayıb. Şikayətçilərin sözlərinə görə, iş icraçıları ilə son görüşlərində onlar “Biz heç kimdən qorxmuruq. Kimə istəyirsiniz şikayət edin” deyiblər.
Pullarını ala bilməyənlərin rayondakı ərzaq və tikinti malları mağazalarına külli miqdarda borcları yığılıb qalıb. Şikayətçilər onlara veriləcək məbləğin 180 min manat civarında olduğunu bildirirlər.