Avqustun 17-də gecə saat 23 radələrində “Bulla-dəniz” yatağındakı 90 nömrəli neft quyusunda partlayış baş verib. Bu barədə virtualaz.org saytına açıqlamasında Neftçilərin Hüquqlarını Müdafiə Komitəsinin rəhbəri Mirvari Qəhrəmanlı deyib.

Təşkilat sədri bildirib ki, qazma məhlulunun xüsusi cəkisinin düz secilməməsi nəticəsində quyuda açıq fontan, yəni partlayış baş verib: “İlkin məlumatlara görə, ağır yaralananlar olub. Lakin yaralanan neftçilər gizli şəkildə özəl klinikaların birinə yerləşdirilib”.

M.Qəhrəmanlı qeyd edib ki, partlayış Kompleks Qazma İşləri İdarəsinin rəhbərliyinin səhlənkarlığı və səhvi ucbatından baş verib.

Hadisə ilə bağlı Dövlət Neft Şirkəti də məlumat yayıb. Məlumatda bildirilir: “90 saylı kəşfiyyat quyusu “Bulla-dəniz” yatağının şimal-şərq qanadında 29 saylı özüldən məhsuldar qatın VIII horizontunun karbohidrogen potensialının qiymətləndirilməsi məqsədilə layihələndirilib. Quyuda qazma işlərinə ötən il noyabrın 6-da başlanıb, dənizin dərinliyi 26,5 metr olub. 17.08.2013-cü il tarixində gecə saat 23 radələrində 5868 metr dərinlikdə qazma zamanı quyuda qaz təzahürləri müşahidə olunub. Kəsilişə görə bu dərinlik məhsuldar qatın VIII horizontunun ortasına uygun gəlir. Qaz təzahürünün qarşısını almaq üçün qazma briqadası tərəfindən mümkün olan bütün tədbirlər görülüb. Buna baxmayaraq gecə saat 23:30-da quyu açıq qaz fontanına keçib və yanğın baş verib. Görülən təcili tədbirlər nəticəsində platformada olan işçilər evakuasiya olunaraq sahilə çıxarılıb. Hal-hazırda özülün ətrafında yanğınsöndürən gəmilər yanğına nəzarət edir. Quyunun bağlanması üçün tədbirlər planı hazırlandıqdan sonra yanğının söndürülməsinə başlanacaq. Baş vermiş hadisənin səbəbləri araşdırılır”.

Qeyd edək ki, artıq hadisə sosial şəbəkədə müzakirəyə çevrilib. Ekspert İlham Şaban partlayışla bağlı “Bir bahalı quyu da beləcə getdi...Ona çəkilən xərclər çox böyük idi, sadəcə prozodkaya baxmaq kifayətdir” yazıb.

Faktla bağlı araşdırmalarımız davam edəcək.