Keçmiş məhkəmə tibb eksperti əmindir ki, Təbrizli yaşı ilə həyat tərzi arasındakı fərqə görə dünyasını dəyişib...

YAP-ın qurucularından olan Suris Təbrizlinin qəfil ölümü suallar yaradıb. Sağlam həyat tərzi keçirən YAP-ın “Dədə Qorqud”unun ailə üzvləri onun səhhətində heç bir probleminin olmadığını deyirlər. Onun həyat yoldaşı Rəfiqə Təbrizli “Azadlıq” radiosuna demişdi ki, Təbrizlinin sağlıq durumundan heç bir şikayəti olmayıb: “Qapını açdıq ki, uzanmış vəziyyətdədir. Eynəyi gözündə, oxuduğu kitab da düşüb sinəsinin üstünə...”

S.Təbrizli 2007-ci ildə YAP əleyhinə sərt çıxış edərək partiyadan uzaqlaşmışdı. Bu uzaqlaşmadan sonra YAP-ın ən sərt tənqidçisi statusundan geri də çəkilmirdi. Belə bir kəskin mövqe sərgiləyən S.Təbrizlinin qəfil ölümü ən müxtəlif fikirlərin yayılmasına səbəb olub. Onun meyitinin yarılmasına ailə üzvlərinin razılıq verməsi də şübhələri bir qədər artırıb – “şübhə yox idisə, niyə meyitin yarılmasına icazə verilib” sualı aktuallaşıb.

Digər tərəfdən, meyitin müayinəsini həyata keçirən məhkəmə tibb-ekspertinin “ürək damar çatışmazlığı” diaqnozu şübhələri əksiltmədi. Nədən ki, belə bir “növbətçi” diaqnoz az qala bütün qəfil dünyasını dəyişənlərə qoyulur.

Vaxtilə məhkəmə tibb eksperti olmuş ADP lideri Sərdar Cəlaloğlu isə “Yeni Müsavat”a deyib ki, Sirus Təbrizlinin həyat tərzi ilə yaşının uyğun olmaması onun ölümünə səbəb ola bilərdi: “Çində, Asiya ölkələrində yaşlı insanlar üçün təhlükəsiz idman növləri tətbiq olunur. Çox təəssüf ki, Sirus Təbrizli öz yaşının xüsusiyyətlərini nəzərə almayıb. Gənc orqanizm üçün qəbul edilən olan idman növləri ilə məşğul olurdu. Görünür, həmin ağır idman növləri ilə məşğul olması ürəyini həddən artıq yükləyib”.

S.Cəlaloğlu S.Təbrizlinin ölümünə kiminləsə telefonla danışıb əsəbiləşməsinin səbəb ola biləcəyi fikirləri ilə razılaşmayıb. Onun zəhərlənə biləcəyi ehtimalı haqda isə bunları deyib: “Bunu meyiti müayinə edən məhkəmə eksperti deyə bilər. Zəhərlənməni laborator müayinə ilə müəyyən etmək mümkündür. Laborator təsdiq olunmayıbsa biz deyə bilmərik ki, Sirus Təbrizlini zəhərləyiblər və ya əksinə. Zəhərlənmə o qədər konkret haldır ki, bunu orqanların müayinəsindən dəqiq müəyyən etmək mümkündür. Əlbəttə ki, gec təsir edən, izi qalmayan, orqanizmdən tez çıxan zəhərlər də var. Zəhərlənmə olanda ölümdən əvvəl orqanizmin ona reaksiyaları olur - halsızlıq, mədə-bağırsaq sisteminin pozulması və s. Əgər Sirus Təbrizli kitab oxuya bilibsə, deməli, zəhərlənmə əlaməti olmayıb. Bəzi qaz halında zəhərlər var ki, ani ölüm verir. Amma həmin qaz hansı məkanda istifadə olunursa, orada olan hər bir canlı ölür. Yəni zəhərlənmə zamanı ağız köpüklənməsi, bədəndən maye ifrazı olur. Bəzi zəhərlənmələrdə dərinin rəngində kəskin dəyişmələr müşahidə olunur. Əgər ölümündən əvvəl ayrı-ayrı zəhər qruplarına aid əlamətlər olmayıbsa, deməli, zəhərlənmə də olmayıb”.

S.Cəlaloğlu əmindir ki, S.Təbrizli yaşı ilə həyat tərzi arasındakı fərqə görə dünyasını dəyişib: “Mən onun başı üstə durmuş vəziyyətdə fotosunu görəndə yanımda olanlara dedim ki, bu adam orqanların yaşını nəzərə almır. Elə orqanizm var ki, 20 yaşındadır, amma ürək faktiki olaraq 40 yaşlı insanın ürəyi kimi qocalıb, beyin isə 70 yaşlı birinin beynidir. Həmin 20 yaşlı orqanizm infarkt olanda deyirlər ki, 20 yaşlı bir orqanizm necə infarkt olur? Yəni nəzərə alınmır ki, ürək digər orqanlarla münasibətdə sürətlə qocalır. Orqanizmin hər bir orqanının bioloji yaşı fərqlidir. Bu nəzərə alınmalı idi”.

S.Cəlaloğlu bildirib ki, Azərbaycanda əksər zəhərləri müəyyən edən laboratoriya mövcuddur: “Bəzi zəhərlər var ki, orqanizmə düşəndən sonra tez bir şəkildə parçalanır və izləri itir. Bu tip zəhərləri müəyyən etmək çətindir. Amma bununla belə, çürüməyən, ölümdən sonra uzun müddət qalmayan meyitlərdə bütün növ zəhərlənmələri müəyyən etmək mümkündür”.