Vahid Ələkbərovu niyə tez-tez Kremlə çağırır...
“LUKoil” prezidenti onun sevimli oliarxına çevrilib; Rusiya prezidenti Administrasiyasındakı mənbə: “Son vaxtlar onu tez-tez Kremldə görmək olar...”
Azərbaycanlı neft maqnatı, “LUKoil” şirkətinin prezidenti Vahid Ələkbərov hazırda Rusiya prezidenti Vladimir Putinin ən sevimli oliqarxıdır.

Virtualaz.org saytına bu barədə Rusiya qaynaqlarından məlum olub. Bildirilir ki, “Qazprom” rəhbəri Aleksey Millerlə “Rosneft” prezidenti İqor Seçin arasında “müharibə”nin getdiyi bir vaxtda “LUKoil” prezidenti Vahid Ələkbərov sürətlə özünə xal yığmaqdadır.

“Son vaxtlar onu tez-tez Kremldə, prezident Putinin kabinetində görmək olar. Deyilənə görə, o, müntəzəm olaraq öz biznesinin inkişafı ilə bağlı prezident Vladimir Putinlə məsləhətləşir. Hazırda heç bir neft layihəsi Ələkbərovdan yan keçmir” - deyə Prezident Administrasiyasındakı mənbə bildirib.

Rusiya hökumətindəki mənbələr isə bildirirlər ki, ölkədə benzinin qiyməti tez-tez məhz Vladimir Putinlə Vahid Ələkbərovun görüşlərindən asılı olur. O da maraqlıdır ki, oktyabrın əvvəllərində oliqarx Asiya regionunun şərqində öz biznesini genişləndirmək planlarını açıqlayıb. Ələkbərov bildirib ki, Çin neft şirkətlərinin rəhbərləri ilə danışıqlara başlayacaq.

“Hansı ki, Çin ənənəvi olaraq Seçinin votçinası hesab edilir, orada “Rosneft”in öz maraqları var” - deyə hökumətdəki mənbə bildirib.

Xəbər verdiyimiz kimi, V.Putin V.Ələkbərovu rəsmən sonuncu dəfə Azərbaycandakı prezident seçkilərinin ertəsi günü - oktyabrın 10-da qəbul etmişdi. Lakin rəsmi qəbulla yanaşı belə görünür ki, Rusiya prezidenti azərbaycanlı neft maqnatı, qalmaqallı “Milyarderlər ittifaqı”nın üzvü və rəsmi Bakı ilə münasibətləri cəmi iki-üç ay əvvələ qədər heç də ürəkaçan olmayan V.Ələkbərovu qeyri-rəsmi formatda da tez-tez Kremldə qəbul edir.

V.Ələkbərov Kremlin bəzi dairələrinin Azərbaycanda hakimiyyəti dəyişməyə yönəlmiş planlarında əsas aktyorlardan biri hesab edilirdi. Təsadüfi deyildi ki, Gürcüstan prezidenti Mixail Saakaşvili Bakıya səfərindən dərhal sonra Rusiyanın Vahid Ələkbərov və Söyün Sadıqov kimi adamların köməyi ilə Azərbaycanda hakimiyyəti dəyişməyə hazırlaşdığı haqda bəyanat vermişdi.

Lakin sonradan vəziyyət dəyişdi və V.Ələkbərov Azərbaycan prezidentinə dəstəyini ifadə edən bəyanat verdi. Putinin Bakıya səfərində də Ələkbərov onu müşayiət edirdi.

Azərbaycandakı seçkilərdən sonra Rusiya qaynaqları xəbər vermişdi ki, Ələkbərov hazırda Putinin ən çox etimad göstərdiyi oliqarxdır. Belə ki, Rusiya prezidentinin Azərbaycandakı biznes maraqlarının kurasiyasını məhz “LUKoil” prezidentinə tapşırdığı bildirilirdi.

Məlumatlarda deyilirdi ki, əvvəlcə Rusiyanın Azərbaycandakı layihələrini Putinin ən yaxın adamı və Kremlin “boz kardinalı” hesab olunan “Rosneft” prezidenti, KQB məktəbinin yetirməsi İqor Seçinə həvalə etmək nəzərdə tutulurdu. Lakin bir vaxtlar Kremldə əsas söz sahibi olan Seçinin hədsiz ambisiyaları onun təsir imkanlarının azalmasına səbəb olub.

“Polit.ru” saytı yazırdı ki, bu il avqustun 13-də Vladimir Putinin Azərbaycana səfəri zamanı “Rosneft"lə ARDNŞ arasında razılaşma imzalandı. Sənədin imzalanması iki ölkə prezidentlərinin iştirakı ilə baş verdi. Razılaşmada ilkin olaraq söhbət “Abşeron” yatağının işlənməsinə dair birgə müəssisənin yaradılmasından, habelə potensial olaraq “Şahdəniz-2” layihəsində iştirakdan gedirdi.

Lakin sayt yazır ki, mötəbər məlumatlı qaynaqların bildirdiyinə görə, bu yaxınlarda konsepsiya dəyişib. “Rosneft” böyük ehtimalla artıq Azərbaycan layihələrində iştirak etməyəcək və dəqiqdir ki, Seçin Azərbaycandakı Rusiya biznes maraqlarının baş provayderi olmayacaq.

Mötəbər qaynaqlardan birinin sayta verdiyi məlumata görə, Seçinin başçılıq etdiyi şirkətin azərbaycanlılarla əməkdaşlığına Vahid Ələkbərov qarşı çıxıb.

Sayt qeyd edir ki, “LUKoil” çoxdan Xəzərdə işləyir, o cümlədən Azərbaycan layihələrində. Məsələn, “Şahdəniz-2”-də “LUKoil”un 10 faiz payı var. Vahid Ələkbərov iki ay əvvəl prezident seçkilərində İlham Əliyevin namizədliyini dəstəklədi. Çətin ki, Rusiyanın regiondakı biznes maraqlarının provayderi olaraq “Rosneft” Vahid Ələkbərova lazım olsun.

Ötən həftə, noyabrın 8-də “Rosneft”un Direktorlar Şurası ARDNŞ-lə imzalanmış razılaşmaları müzakirəyə çıxardı. Lakin bu müzakirələrin hansı məqsəd daşıdığı və qərarların nədən ibarət olduğu məlum deyil. Bununla belə, Putinin Azərbaycandakı biznes layihələrini Ələkbərova həvalə etməsi xəbərləri fonunda məsələnin “Rosneft” direktorları tərəfindən hansı kontekstdə müzakirəyə çıxarıldığı maraq doğurur.